दिघंचीत मटका व्यवसायाचा सुळसुळाट; वारंवार तक्रारी करूनही कारवाई का नाही?

  घराचा दरवाजा तोडून हल्ला केल्याचा आरोप; फिर्यादीसह आई-वडील आणि पत्नी जखमी, ७ नामनिर्दिष्ट व ५ अनोळखी व्यक्तींविरुद्ध गुन्हा दाखल!

क्रांती न्यूज (प्रतिनिधी) -  किरण देशमुख

आटपाडी - आटपाडी तालुक्यातील तळेवाडी येथे जुन्या भांडणाच्या कारणावरून घरात घुसून एका कुटुंबाला मारहाण केल्याची आणि सोन्याचे दागिने तसेच रोख रक्कम घेऊन गेल्याची तक्रार आटपाडी पोलीस ठाण्यात दाखल झाली आहे. या प्रकरणी सात नामनिर्दिष्ट व्यक्तींसह पाच अनोळखी व्यक्तींविरुद्ध गुन्हा नोंदवण्यात आला आहे.

पोलिसांकडून मिळालेल्या माहितीनुसार, ६ ऑक्टोबर २०२६ रोजी रात्री साडेनऊ वाजण्याच्या सुमारास तळेवाडी येथील शिंदे वस्तीवर ही घटना घडल्याचे फिर्यादी रणजीत दादासो शिंदे यांनी तक्रारीत म्हटले आहे.

जुन्या भांडणाच्या कारणावरून काही व्यक्तींनी घराचा दरवाजा तोडून घरात प्रवेश केला. त्यानंतर फिर्यादी, त्यांचे आई-वडील आणि पत्नी यांना लाथाबुक्क्यांनी तसेच लोखंडी रॉड, काठी आणि चाकूने मारहाण करून जखमी केले आणि जीवे मारण्याची धमकी दिल्याचा आरोप तक्रारीत करण्यात आला आहे.

या घटनेदरम्यान फिर्यादीच्या पत्नीच्या कानातील सोन्याचे टॉप्स, त्यांच्या आईच्या गळ्यातील सोन्याची बोरमाळ आणि रोख ४६ हजार रुपये घेऊन गेल्याचेही तक्रारीत नमूद आहे.

या प्रकरणी आटपाडी पोलीस ठाण्यात गुन्हा रजिस्टर क्रमांक ३७५/२०२६ अन्वये भारतीय न्याय संहितेच्या कलम ११९(१), ११८(१), ११५(२), ३३३, ३२४(४), ३५१(३), १८९(२), १९१(२), १९१(३) आणि १९० प्रमाणे गुन्हा दाखल करण्यात आला आहे.

पोलीस हेड कॉन्स्टेबल चव्हाण यांनी गुन्हा दाखल केला असून, पोलीस हेड कॉन्स्टेबल गवंड पुढील तपास करीत आहेत. उपलब्ध माहितीनुसार, आरोपींच्या अटकेबाबत नोंद दिलेली नाही. या प्रकरणाचा पुढील तपास सुरू आहे.

या घटनेतील आरोपांची सत्यता तपासातून स्पष्ट होणार असून, पोलिसांच्या तपासाकडे लक्ष लागले आहे.