शिंदेंच्या भाषणादरम्यान फडणवीसांची एन्ट्री, एका वाक्यात वाद संपवला; सातारा राड्याने विधिमंडळ गदगदले

१० कोटी पोटगी, एक घर आणि महिन्याचा खर्च; 'या' अटींवरच घटस्फोट देणार पवन सिंह यांची पत्नी

भोजपुरी सुपरस्टार पवन सिंह आणि त्यांच्या पत्नी ज्योती सिंह यांच्या घटस्फोटाच्या खटल्यातील सुनावणी बुधवार, २५ मार्च २०२६ रोजी आरा येथील दिवाणी न्यायालयात पार पडली. पवन सिंह दुपारी सुमारे २:२० वाजता न्यायालयात हजर झाले, मात्र ज्योती सिंह या सुनावणीसाठी उपस्थित राहिल्या नाहीत.

न्यायालयात पवन सिंह यांनी स्पष्ट सांगितले की, “मला ज्योती सिंह यांच्यासोबत राहायचे नाही आणि मी घटस्फोट घेण्यास तयार आहे.” तसेच त्यांनी वाद परस्पर संमतीने मिटवण्यासाठी वन-टाइम सेटलमेंट करण्याची तयारी दर्शवली. मात्र, ज्योती सिंह यांच्या अनुपस्थितीमुळे या विषयावर सविस्तर चर्चा होऊ शकली नाही. पवन सिंह न्यायालयातून बाहेर पडताना हताश दिसले.

 ज्योती सिंह यांच्या अटी काय?

ज्योती सिंह यांचे वकील विष्णूधर पांडे यांनी सांगितले की, पत्नी घटस्फोट देण्यास तयार आहेत, पण फक्त या अटींवर

१० कोटी रुपये एकरकमी पोटगी 

 राहण्यासाठी एक घर उपलब्ध करून द्यावे

 खटला प्रलंबित असताना दरमहा उदरनिर्वाह भत्ता 

ज्योती सिंह यांनी यापूर्वी ११ फेब्रुवारी रोजी न्यायालयात हजर राहून आपली बाजू मांडली होती.

 पवन सिंह यांची भूमिका

पवन सिंह यांचे वकील सुमन कुमार यांनी सांगितले की, अभिनेते ज्योती सिंह यांच्यासोबत पुढे राहणे शक्य नसल्याचे स्पष्ट केले आहे. न्यायालयाने प्रथम ज्योती सिंह यांची बाजू ऐकून घेतल्यानंतर वन-टाइम सेटलमेंटबाबत चर्चा होऊ शकते.

पार्श्वभूमी

ज्योती सिंह या पवन सिंह यांच्या दुसऱ्या पत्नी आहेत. त्यांची पहिली पत्नी नीलम सिंह यांनी २०१५ मध्ये आत्महत्या केली होती. पवन सिंह आणि ज्योती सिंह यांचा विवाह ७ मार्च २०१८ रोजी झाला होता.

मीडिया रिपोर्टनुसार, पवन सिंह यांची एकूण संपत्ती सुमारे १६.७५ कोटी रुपये आहे. त्यात जंगम मालमत्ता ५.०४ कोटी आणि स्थावर मालमत्ता ११.७० कोटी रुपये इतकी आहे. ते एका चित्रपटासाठी ४० ते ५० लाख रुपये मानधन घेतात.

पुढील सुनावणीची तारीख अद्याप जाहीर झालेली नाही. दोन्ही पक्ष एकत्र हजर झाल्यास वन-टाइम सेटलमेंटबाबत चर्चा होण्याची शक्यता आहे.