शिंदेंच्या भाषणादरम्यान फडणवीसांची एन्ट्री, एका वाक्यात वाद संपवला; सातारा राड्याने विधिमंडळ गदगदले

  'पाखरा आझाद केलं तुला' फेम गीतकाराच्या स्कॉर्पिओला आग! दोन गाड्या जळून खाक, अज्ञात व्यक्तीवर गुन्हा दाखल

 नारपोलीत रात्रीच्या सुमारास अज्ञाताने आशिष शिंदे यांच्या स्कॉर्पिओला लावली आग; शेजारची गाडीही भस्मसात, सीसीटीव्ही फुटेजची तपासणी सुरू

'पाखरा आझाद केलं तुला' या गाजलेल्या गाण्यामुळे प्रकाशझोतात आलेले मराठी गीतकार आशिष शिंदे यांच्या स्कॉर्पिओ वाहनाला अज्ञात व्यक्तीने आग लावल्याची धक्कादायक घटना घडली आहे. या आगीत शेजारी उभी असलेली दुसरी गाडीही जळून खाक झाली आहे.

नेमकं काय घडलं?

गीतकार आशिष शिंदे यांचा चालक प्रतीक कांबळे याने स्कॉर्पिओ वाहन कशेळी येथील रस्त्याच्या कडेला पार्किंग केले होते. रात्रीच्या सुमारास अज्ञात व्यक्तीने या वाहनाला आग लावल्याची माहिती समोर आली आहे. आगीने क्षणात रौद्ररूप धारण केले आणि स्कॉर्पिओ भयंकरपणे पेटली. आग इतकी भीषण होती की, जवळच उभ्या असलेल्या दुसऱ्या गाडीनेही पेट घेतला.

किती नुकसान?

य आगीत स्कॉर्पिओसह दुसरी गाडी पूर्णपणे जळून खाक झाली आहे. आगीमुळे दोन्ही वाहनांचे प्रचंड नुकसान झाले असून ती कोळशाच्या ढिगाऱ्यात बदलली आहेत. सुदैवाने या घटनेत कोणतीही जीवितहानी झालेली नाही.

पोलिसांनी केली गुन्ह्याची नोंद

घटनेची माहिती मिळताच स्थानिक नागरिकांनी घटनास्थळी धाव घेत आग विझवण्याचा प्रयत्न केला. यानंतर नारपोली पोलिसांना माहिती देण्यात आली. पोलिसांनी घटनास्थळी पोहोचून पंचनामा केला असून अज्ञात व्यक्तीविरोधात गुन्हा दाखल केला आहे. आग नेमकी कशी लागली? शॉर्ट सर्किट की हे आग लावण्याचे प्रकरण आहे? याचा तपास पोलिसांकडून सुरू आहे. पोलिस सध्या सीसीटीव्ही फुटेज तपासत असून आरोपीचा शोध घेत आहेत.

या घटनेमुळे परिसरात काही काळ भीतीचे वातावरण निर्माण झाले होते. गीतकार आशिष शिंदे यांच्या वाहनाला आग लागल्याच्या घटनेमुळे चर्चांना उधाण आले आहे.