वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 'मी पुन्हा चालू शकेन की...'; बिग बॉस फेम प्रसिद्ध यूट्यूबरची प्रकृती गंभीर, इन्स्टा लाइव्ह करताना झाला होता अपघात

अनुराग डोभालचा हॉस्पिटलमधील व्हिडिओ व्हायरल; 'उजवा पाय सुन्न झाला, हलवू शकत नाही', सर्जरीनंतर चिंताग्रस्त

मुंबई: बिग बॉस ओटीटी फेम आणि प्रसिद्ध यूट्यूबर अनुराग डोभाल सध्या वैयक्तिक आयुष्यातील वादांखेरीज आता अपघातामुळे चर्चेत आहे. अलिकडेच चारचाकी चालवताना इन्स्टाग्राम लाइव्ह करत असताना त्याचा अपघात झाला होता. त्यानंतर त्याला उपचारासाठी रुग्णालयात दाखल करण्यात आले होते. आता त्याची प्रकृती अद्याप गंभीर असून, पुन्हा चालू शकेल की नाही, याबाबत त्याने चिंता व्यक्त केली आहे.

पुन्हा चालू शकणार की नाही, माहित नाही'

अनुराग डोभालने इन्स्टाग्रामवर एक व्हिडिओ शेअर केला आहे. २४ मार्चच्या रात्री रुग्णालयातून पोस्ट केलेल्या या व्हिडिओत त्याने स्ट्रेचरवरून हॉस्पिटलमध्ये नेले जात असल्याचे दिसून येते. व्हिडिओ शेअर करताना त्याने लिहिले, "आयुष्यात पुन्हा चालू शकणार की नाही, माहित नाही."

व्हिडिओत अनुरागने सर्जरीचे टाके आणि जखमाही दाखवल्या आहेत. त्याचे मित्र त्याला चादर धरून एका बेडवरून दुसऱ्या बेडवर नेत असताना तो वेदनेने ओरडतो. यावेळी तो जोरात खोकतो, ज्यामुळे त्याच्या टाक्यांवर ताण येतो.

'उजवा पाय सुन्न झाला, हलवू शकत नाही'

व्हिडिओत अनुरागने आपल्या प्रकृतीबाबत माहिती देताना सांगितले की, "तुम्हाला माझ्या प्रकृतीबद्दल माहिती द्यायची होती. हा उजवा पाय पूर्णपणे सुन्न झाला आहे. मी हा पाय हलवू शकत नाही. मुळात हा संपूर्ण भाग टाक्यांनी झाकलेला आहे. या संपूर्ण भागावर शस्त्रक्रिया झाली आहे. यामुळे नसा खराब झाल्या आहेत. कसे बरे होईल, आता मला माहित नाही."

नेटकऱ्यांच्या शुभेच्छा

अनुरागच्या पोस्टवर नेटकऱ्यांनी मोठ्या प्रमाणात कमेंट करत त्याच्या तब्येतीची विचारपूस केली आहे. एका युझरने लिहिले, "भाऊ, तुम्ही चॅम्पियन आहात, तुम्ही पुन्हा बाईक चालवू शकाल. हसत राहा. सर्वकाही ठीक होईल." दुसऱ्या युझरने लिहिले, "खंबीर राहा. चांगले दिवस येतील." तर आणखी एका नेटकऱ्याने लिहिले, "भाऊ तू लवकर बरा व्हावास, यासाठी मी महादेवाकडे प्रार्थना करीत आहे."

वैयक्तिक आयुष्यातील वाद

अनुराग डोभाल अलिकडेच आपल्या कुटुंबावर गंभीर आरोप केल्यामुळेही चर्चेत होता. कुटुंबाच्या त्रासामुळे टोकाचे पाऊल उचलणार असल्याचे त्याने म्हटले होते. मात्र, दरम्यानच्या काळात झालेल्या या अपघाताने त्याच्या चाहत्यांमध्ये चिंतेचे वातावरण निर्माण झाले आहे.

सध्या नेटकरी त्याच्या तब्येतीची विचारपूस करत असून, त्याची पोस्ट सोशल मीडियावर चर्चेचा विषय ठरत आहे. चाहत्यांनी त्याला लवकरात लवकर बरे होण्यासाठी शुभेच्छा दिल्या आहेत.