वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 ५२ वर्षांच्या अभिनेत्याने २६ वर्षांनी लहान मुलीशी बांधली साताजन्माची गाठ; ट्रोलिंगमुळे नात्यात मिठाचा खडा? म्हणाला...

मिलिंद सोमण म्हणाला, 'मला ट्रोलिंगचा त्रास झाला नाही, पण अंकिता खचून गेली होती'; नातं १३ वर्ष टिकून राहिल्याचा आनंद, १९९५ च्या वादग्रस्त फोटोशूटवरही भाष्य

मुंबई: फिटनेसच्या बाबतीत कायम चर्चेत असणारा अभिनेता मिलिंद सोमण बॉलिवूड, टेलिव्हिजन आणि मॉडेलिंग या तिन्ही विश्वात स्वत:ची वेगळी ओळख निर्माण करण्यात यशस्वी ठरला आहे. २०१८ मध्ये त्याने आपल्यापेक्षा २६ वर्षांनी लहान असलेल्या अंकिता कोंवर हिच्याशी लग्न करून मोठी खळबळ उडवली होती. तेव्हापासून या जोडप्याला मोठ्या प्रमाणावर ट्रोलिंगचा सामना करावा लागला आहे.

मला त्रास झाला नाही, पण अंकिता खचून गेली'

नुकत्याच दिलेल्या एका मुलाखतीत मिलिंद सोमण यांनी ट्रोलिंगबद्दल मनमोकळेपणाने भाष्य केले. ते म्हणाले, "मला ट्रोलिंगचा मुळीच त्रास झाला नाही, पण अंकिताला मात्र त्याचा त्रास झाला, कारण तिला फारसा अनुभव नव्हता. आम्ही त्याबद्दल चर्चा केली. मी तिला समजावून सांगितले की, ट्रोल्सना ना तू माहीत आहेस, ना मी. त्यामुळे ते जे काही बोलतात, ते केवळ त्यांचे वैयक्तिक मत असते."

अंकिता यावेळी पुरती खचून गेली होती. तिच्यावर या ट्रोलिंगचा फार गंभीर परिणाम झाला होता. पण, त्यावेळी मिलिंद तिच्यासोबत ठामपणे उभा राहिला आणि त्याने अंकिताला यातून बाहेर पडण्यास मदत केली.

'नात्याचे श्रेय तिलाच'

मिलिंद पुढे म्हणाले, "मी तिला सर्व गोष्टी समजावून सांगितल्यानंतर, तिने ट्रोलिंगची चिंता करणे सोडून दिले. याचं श्रेय आमच्या घट्ट नात्याला जाते. आज, पूर्वीपेक्षा अधिक लोकांनी आमच्या नात्याचा स्वीकार केला आहे. असं नाही की आम्हाला आमचं नातं सर्वांनी स्वीकारण्याची गरज आहे; पण हे पाहणं केवळ सुखद वाटतं. आमचं नातं १३ वर्ष टिकून राहिलंय, या गोष्टीचा लोकांना आनंद वाटतोय."

'त्या' वादग्रस्त फोटोशूटबद्दल काय म्हणाले?

मुलाखतीत बोलताना मिलिंद सोमण यांनी १९९५ मधील त्याच्या वादग्रस्त न्यूड फोटोशूटबद्दलही भाष्य केले. ते म्हणाले, "ही अशी घटना होती, ज्यामुळे न्यायालयाच्या वारंवार फेऱ्या माराव्या लागल्या होत्या. त्यावेळी मी ३० वर्षांचा होतो, एका एजन्सीने माझ्याशी संपर्क साधला होता. खरं तर, त्यापूर्वीही मी न्यूड मॉडेलिंग केलं होतं, अगदी एका वर्तमानपत्राच्या पहिल्या पानावरही मी तशा स्वरूपात झळकलो होतो, आणि त्यावेळी त्यावरून कोणताही गदारोळ झालेला नव्हता."

"मात्र, यावेळी मूळ मुद्दा त्या फोटोशूटमध्ये सहभागी असलेल्या महिला मॉडेलशी संबंधित होता. हा वाद 'कला विरुद्ध अश्लीलता' याबद्दल कमी, आणि त्या विशिष्ट पैलूबद्दल अधिक होता. लोक अनेकदा स्वरूपच चुकीच्या पद्धतीने समजून घेतात. भारतात विवस्त्र असणं हा तसा पाहायला गेलं तर अपराध नाही, पण अमेरिकेत असं केल्याने अटक होऊ शकते. पण, आपल्या देशात वेगवेगळ्या कारणाने अनेकजण नग्नावस्थेत फिरतात आणि तो आपल्या संस्कृतीचा अविभाज्य भाग आहे."

अंकिता-मिलिंदचं लग्न

अंकिता एक एअर होस्टेस होती. तिची मिलिंदशी चेन्नई येथील एका हॉटेलमध्ये भेट झाली. फार कमी वेळातच दोघांमध्ये घट्ट मैत्री झाली आणि पुढे २०१८ मध्ये त्यांनी लग्न करण्याचा निर्णय घेतला. त्यांच्या लग्नाला आता जवळपास आठ वर्षे पूर्ण झाली आहेत. मिलिंद आणि अंकिता हे दोघेही फिटनेसप्रेमी म्हणून ओळखले जातात.

या जोडप्याने वयाच्या अंतराच्या ट्रोलिंगला खंबीरपणे तोंड दिले आहे आणि आज ते अनेकांसाठी प्रेरणास्थान ठरले आहेत.