वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

काही दिवसांपूर्वीच युद्ध सुरु असतानाच १० मिसाईल डागत खळबळ उडवून दिली अन् आता किम जोंग उन लेकीला घेऊन थेट रणगाड्यावर स्वार! नेमका प्लॅन आहे तरी काय?

मुलगी किम जू एसोबत रणगाडा चालवतानाचे व्हिडिओ प्रसिद्ध; उत्तराधिकारी म्हणून तयारी सुरू असल्याच्या चर्चांना बळ, तर तज्ज्ञांमध्ये मतभेद

उत्तर कोरियाचे राष्ट्राध्यक्ष किम जोंग उन यांनी पुन्हा एकदा सर्वांचे लक्ष वेधले आहे. काही दिवसांपूर्वीच युद्ध सुरू असताना १० मिसाईल डागून खळबळ उडवल्यानंतर आता त्यांनी आपली मुलगी किम जू ए (Kim Ju Ae) यांना घेऊन थेट रणगाड्यावर स्वार होत लष्करी सामर्थ्याचं दर्शन घडवलं आहे. सरकारी माध्यमांनी प्रसिद्ध केलेल्या व्हिडिओ आणि फोटोंमध्ये हे दृश्य पाहायला मिळाले.

रणगाड्यावर बाप-लेकीचा ताजा व्हिडिओ

किम जोंग उन यांच्या देखरेखीत झालेल्या लष्करी सरावादरम्यान त्यांनी आपल्या मुलीसोबत चक्क एक रणगाडा चालवला. प्रसिद्ध झालेल्या व्हिडिओमध्ये मुलगी किम जू ए चालत्या रणगाड्याच्या ड्रायव्हरच्या जागेवरून डोकावताना दिसत आहे, तर वडील किम जोंग उन तीन सैनिकांसह त्याच रणगाड्यावर बसलेले दिसत आहेत.

दक्षिण कोरियातील तज्ज्ञांच्या मते, आधुनिक रणगाडे चालवणे तांत्रिकदृष्ट्या फार अवघड नसते. तिने सपाट जमिनीवर कमी वेगात तो सरळ चालवला असल्यामुळे तिला ते सोपे गेले असावे.

उत्तराधिकारी असल्याची जोरदार चर्चा

बाप-लेकीच्या या ताज्या व्हिडिओने किम जोंग उन आपल्या मुलीला स्वतःचा उत्तराधिकारी म्हणून तयार करत असल्याच्या चर्चेला आणि शक्यतेला मोठे बळ मिळाले आहे. दक्षिण कोरियाच्या गुप्तचर संस्थेनेही गेल्या महिन्यात असा अंदाज वर्तवला होता की, किम जोंग उन तिला आपला उत्तराधिकारी म्हणून घोषित करण्याच्या तयारीत आहेत.

सार्वजनिक कार्यक्रमांमधील वाढता वावर

२०२२ च्या अखेरीपासून मुलगी किम जोंग उन यांच्यासोबत अनेक महत्त्वाच्या लष्करी आणि इतर कार्यक्रमांमध्ये सतत दिसू लागली आहे. उत्तर कोरियाच्या सरकारी माध्यमांनी तिला किम यांची 'सर्वांत लाडकी' किंवा 'आदरणीय मुलगी' म्हणून संबोधले आहे.

नुकतेच त्यांनी एका शस्त्रास्त्र कारखान्याला भेट देऊन पिस्तूल चालवले आणि एका क्षेपणास्त्र चाचणीची पाहणीही केली. सप्टेंबरमध्ये ती वडिलांसोबत बीजिंगला गेली होती आणि नववर्षाच्या कार्यक्रमात तिने वडिलांच्या गालावर चुंबनही घेतले होते.

युद्ध तयारीचे आवाहन

किम जोंग उन यांनी रणगाडे आणि पायदळ सैनिकांच्या एका आक्रमक 'टॅक्टिकल ड्रिल'ची पाहणी केली आणि सैन्याला 'युद्धाची तयारी पूर्ण करण्याचे' आवाहन केले. हा लष्करी सराव अशा वेळी झाला आहे, जेव्हा अमेरिका आणि दक्षिण कोरिया आपला वार्षिक लष्करी सराव करत आहेत. उत्तर कोरिया अमेरिका आणि दक्षिण कोरियाच्या या सरावाकडे 'आक्रमणाची तालीम' म्हणून पाहतो आणि त्याला प्रत्युत्तर म्हणून किम अशा चाचण्या करत आहेत.

उत्तराधिकारी शक्यतेवर तज्ज्ञांमध्ये मतभेद

उत्तराधिकारी शक्यतेवर काही तज्ज्ञ असहमत आहेत. त्यांच्या मते, किम जोंग उन यांचे वय तुलनेने अजून कमी आहे आणि उत्तर कोरियाच्या सत्ताव्यवस्थेत प्रचंड 'पुरुषप्रधान' मानसिकता असल्यामुळे मुलीला सत्तेवर बसवणे सोपे नाही. तरीही किम जू ए यांचा सार्वजनिक कार्यक्रमांमध्ये वाढता वावर आणि लष्करी सरावातील सहभाग यामुळे या चर्चांना उधाण आले आहे.