वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

  'अपणा अजेंडा क्लियर है, भाजप को दबाना है!' शिंदेसेनेत प्रवेश करण्याआधीच उन्मेष पाटलांची व्हायरल क्लिप; भाजप आमदाराचा आक्षेप

 माजी खासदार उन्मेष पाटील उद्या शिंदे गटात प्रवेश करणार; भाजप नेते मंगेश चव्हाण म्हणाले- वरिष्ठांकडे करणार तक्रार

जळगाव जिल्ह्यासह उत्तर महाराष्ट्राच्या राजकारणात एक मोठा राजकीय ड्रामा घडत आहे. शिवसेना (ठाकरे गट) सोडून उपमुख्यमंत्री एकनाथ शिंदे यांच्या शिवसेनेत प्रवेश करण्याच्या निर्णयामुळे माजी खासदार उन्मेष पाटील चर्चेत आहेत. मात्र, या पक्षांतरापूर्वी त्यांची एक व्हायरल क्लिप चर्चेला उधाण आणणारी ठरली आहे.

नेमके प्रकरण काय?

उन्मेष पाटील हे शुक्रवारी (६ मार्च) आपल्या शेकडो समर्थकांसह मुंबईत जाऊन एकनाथ शिंदे यांच्या शिवसेनेत अधिकृत प्रवेश करणार आहेत. याच पार्श्वभूमीवर त्यांची एक जुनी क्लिप व्हायरल झाली आहे. या क्लिपमध्ये उन्मेष पाटील म्हणताना ऐकू येतात की, "अपणा अजेंडा क्लियर है, भाजप को दबाना है!" (आमचा अजेंडा स्पष्ट आहे, भाजपला दाबायचे आहे).

भाजप आमदाराचा आक्षेप

या वक्तव्यावरून भाजपचे आमदार मंगेश चव्हाण यांनी तीव्र आक्षेप घेतला आहे. चव्हाण म्हणाले, "एकनाथ शिंदेंनी कोणाला प्रवेश द्यावा हा त्यांचा विषय आहे. मात्र, 'अपणा अजेंडा क्लियर है, भाजप को दबाना है' हे नेमकं काय? आम्ही यासंदर्भात आमच्या वरिष्ठांकडे तक्रार करणार आहोत."

राजकीय पार्श्वभूमी काय?

उन्मेष पाटील हे २०१९ मध्ये भाजपच्या तिकिटावर लोकसभेत निवडून आले होते. २०२४ च्या लोकसभेला भाजपने त्यांना तिकीट नाकारल्यामुळे ते उद्धव ठाकरे यांच्या नेतृत्वातील शिवसेनेत दाखल झाले. ठाकरे गटाकडून त्यांनी चाळीसगाव विधानसभा निवडणूक लढवली होती, मात्र त्यांचा पराभव झाला. आता छत्रपती संभाजीनगरच्या बँकेकडून त्यांच्या मालमत्तेची जप्तीची कारवाई सुरू झाल्यानंतर त्यांनी शिंदे सेनेत प्रवेश करण्याचा निर्णय घेतल्याचे बोलले जात आहे.

या राजकीय सोहळ्यामुळे चाळीसगावसह जळगावच्या राजकारणात शिंदे सेनेत नवे समीकरण तयार होणार की गट-तट निर्माण होणार, याकडे सर्वांचे लक्ष लागले आहे.