म्हसवड : धुळदेवमध्ये भयानक अपघात, दोघे जागीच ठार; तीन जखमी

‘तिला भूल दिली आणि जेव्हा ती उठली तेव्हा पूर्ण शरीर प्लास्टरमध्ये होते’ - वरुण धवन

मुंबई: बॉलीवूड अभिनेता वरुण धवन याने आपल्या दीड वर्षांच्या मुलीच्या आरोग्याबाबत एक भावनिक आणि धक्कादायक खुलासा केला आहे. वरुण आणि त्याची पत्नी नताशा दलाल यांची मुलगी लारा ‘डेव्हलपमेंटल डिस्प्लेसिया ऑफ द हिप’ (DDH) या दुर्मिळ आजाराने ग्रस्त होती.

या आजारात मुलाच्या कंबरेचा सांधा योग्य ठिकाणी बसत नाही किंवा सॉकेटमधून बाहेर येतो. यामुळे चालण्यात अडचण येते आणि काही वेळा एक पाय दुसऱ्यापेक्षा लहान किंवा मोठा दिसू शकतो.

एका मुलाखतीत वरुण धवन म्हणाला, “माझ्या मुलीला DDH झाला होता. त्यामुळे तिला नीट चालता किंवा धावता येत नव्हते. हा आमच्यासाठी खूप कठीण काळ होता.”

अडीच महिने पूर्ण शरीर प्लास्टरमध्ये

वरुणने पुढे सांगितले की, लारावर योग्य वेळी उपचार करण्यात आले. सुदैवाने शस्त्रक्रियेची गरज पडली नाही. विशेष प्रक्रियेद्वारे तिचा हिप योग्य ठिकाणी बसवण्यात आला. उपचारादरम्यान तिला ‘स्पिका कास्ट’ म्हणजेच विशेष प्रकारचे प्लास्टर लावण्यात आले होते. जवळपास अडीच महिने तिचे संपूर्ण शरीर प्लास्टरमध्ये होते.

“तिला भूल देण्यात आली होती. जेव्हा ती उठली तेव्हा तिचे पूर्ण शरीर प्लास्टरमध्ये होते. तो आमच्यासाठी अत्यंत भावनिक आणि कठीण क्षण होता,” असे वरुण धवन यांनी सांगितले.

सध्या लाराचे प्लास्टर काढण्यात आले असून ती हळूहळू बरी होत आहे. वरुणने सर्व पालकांना आवाहन केले की, मुलांच्या आरोग्याकडे कधीही दुर्लक्ष करू नये. हा अनुभव शेअर करण्यामागे सहानुभूती मिळवणे नव्हे, तर इतर पालकांमध्ये जागरूकता निर्माण करणे हा मुख्य उद्देश असल्याचे त्यांनी स्पष्ट केले.

३ जून २०२४ रोजी लारा धवनचा जन्म झाला होता. वरुण धवन सहसा आपल्या मुलीबद्दल जास्त बोलत नाही, त्यामुळे त्याने केलेला हा खुलासा अधिक भावनिक ठरला आहे.