वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 मुख्य निवडणूक आयुक्तांविरोधात महाभियोग प्रस्ताव आणणार? टीएमसीचा पुढाकार, काँग्रेस-सपाचा पाठिंबा

 पश्चिम बंगालमधील एसआयआरमधील अनियमिततेचा मुद्दा; संविधानाच्या कलम ३२४ अंतर्गत प्रस्ताव आणणार, भाजपकडून विरोध

नवी दिल्ली: लोकसभा अध्यक्ष ओम बिर्ला यांच्या विरोधात विरोधी पक्षांनी अविश्वास प्रस्ताव आणल्याच्या पार्श्वभूमीवर आता मुख्य निवडणूक आयुक्त (सीईसी) ज्ञानेश कुमार यांच्या विरोधात महाभियोग प्रस्ताव आणण्याची हालचाल सुरू झाली आहे. पश्चिम बंगालच्या मुख्यमंत्री ममता बॅनर्जी यांच्या अखिल भारतीय तृणमूल काँग्रेसने (टीएमसी) यासाठी पुढाकार घेतला असून काँग्रेस आणि समाजवादी पार्टीसह अन्य विरोधी पक्षांनी या निर्णयाला पाठिंबा दर्शविला आहे.

टीएमसीचा दावा काय?

तृणमूल काँग्रेसचे खासदार सौगत रॉय यांनी पत्रकार परिषदेत या प्रस्तावाची घोषणा केली. ते म्हणाले, "पश्चिम बंगालमध्ये सुरू असलेल्या एसआयआर (विशेष पुनर्मतदान) प्रक्रियेत मोठ्या प्रमाणात अनियमितता झाल्या आहेत. राज्यात ५९ लाख मतदार न्यायनिर्णय प्रक्रियेत (अॅड्युडिकेशन) असून ही खूप मोठी संख्या आहे." त्यांनी मुख्य निवडणूक आयुक्त ज्ञानेश कुमार यांच्या कामकाजाबद्दल गंभीर तक्रारी असल्याचे सांगत संविधानाच्या कलम ३२४ अंतर्गत महाभियोग प्रस्ताव आणणार असल्याचे जाहीर केले.

विरोधी पक्षांची एकजूट

टीएमसीच्या या निर्णयाला विरोधी पक्षांनी पाठिंबा दर्शविला आहे. काँग्रेसचे खासदार उदित राज यांनी हा प्रस्ताव स्वागतार्ह असल्याचे म्हटले आहे. "आम्ही या मुद्द्यावर काही काळापासून संघर्ष करत आहोत. महाभियोग प्रस्तावाला आम्ही पूर्ण पाठिंबा देऊ," असे ते म्हणाले. काँग्रेस खासदार सुखदेव भगत यांनीही एसआयआर प्रक्रियेवर टीका केली. समाजवादी पार्टीचे खासदार धर्मेंद्र यादव यांनी टीएमसीच्या प्रस्तावाचे स्वागत केले असून महाभियोग प्रस्तावाच्या वेळी ते टीएमसीसोबत राहतील, असे स्पष्ट केले. काँग्रेसला पाठिंबा देणारे अपक्ष खासदार पप्पू यादव यांनीही सीईसीविरोधात कारवाईची मागणी केली.

भाजपकडून टीका

दरम्यान, भाजप नेत्यांनी या महाभियोग प्रस्तावाविरोधात भूमिका मांडली आहे. केंद्रीय मंत्री मुख्तार अब्बास नक्वी, सुकांता मुजुमदार आणि भाजप खासदार अनुराग ठाकूर यांनी काँग्रेस आणि विरोधी पक्षांवर टीका केली आहे. आता टीएमसी हा महाभियोग प्रस्ताव नेमका केव्हा आणि कशा पद्धतीने आणते, याकडे राजकीय वर्तुळाचे लक्ष लागले आहे.