वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

पनीर म्हणून चीज ॲनॉलॉग देणाऱ्या हॉटेल्सला धक्का! विधानसभेत आमदार विक्रम पाचपुतेंनी उघड केलं ‘गौडबंगाल’

“पनीर सँडविच नव्हे, चीज ॲनॉलॉग सँडविच” — एफडीएचं कडक परिपत्रक; मेन्यूवर स्पष्ट उल्लेख न केल्यास परवाना रद्द होणार; महाराष्ट्र देशातलं पहिलं राज्य

मुंबई : रेस्टॉरंट आणि हॉटेल्समध्ये पनीरच्या नावाखाली ग्राहकांना चीज ॲनॉलॉग (नकली चीज) दिलं जात असल्याची गंभीर बाब भाजप आमदार विक्रम पाचपुते यांनी विधानसभेत उपस्थित केली. त्यांनी सभागृहात दोन पांढरे तुकडे दाखवत म्हटलं, “एक खरा पनीर आणि दुसरा चीज ॲनॉलॉग. ग्राहकांना कळतच नाही की ते काय खात आहेत.”

सरकारनं घेतलं कडक पाऊल

या प्रकरणानंतर एफडीए  ने महत्त्वाचं परिपत्रक काढलं आहे. त्यानुसार:

 रेस्टॉरंटच्या मेन्यू कार्डवर चीज ॲनॉलॉग विकत असल्यास ते स्पष्टपणे नमूद करावं लागेल.

 “पनीर सँडविच” असे लिहिता येणार नाही, तर “चीज ॲनॉलॉग सँडविच” असं लिहावं लागेल.

 हा नियम १ मे २०२६ पासून सक्तीचा असेल.

महाराष्ट्र हे देशातील पहिलं राज्य आहे ज्याने चीज ॲनॉलॉगबाबत असे स्पष्ट नियम आणले आहेत. केंद्र सरकारही लवकरच याबाबत कायदा करणार असल्याची माहिती आहे.

 आमदारांचा इशारा

विक्रम पाचपुते यांनी सभागृहात सांगितलं की, चीज ॲनॉलॉग शरीरासाठी घातक आहे. त्यात जास्त प्रमाणात तेल असतं आणि काही ठिकाणी बीफचा वापरही केला जातो. शिवाय, “ॲनॉलॉग” हा शब्द बारिक अक्षरात लिहिला जाऊ शकतो, याबाबतही त्यांनी हरकत घेतली आहे.

जर एखाद्या रेस्टॉरंटने मेन्यूवर चीज ॲनॉलॉग नमूद केलं नाही तर एफडीए त्यांचा परवाना रद्द करण्याची कारवाई करू शकते.

पार्श्वभूमी

अलीकडे बाजारात आणि हॉटेल्समध्ये भेसळयुक्त पदार्थांची तक्रार वाढली आहे. चीज ॲनॉलॉग हे वनस्पती-आधारित (नट्स, सोया, टॅपिओका) घटकांपासून बनवलं जातं, पण त्याची चव, पोत आणि वितळण्याची क्षमता खऱ्या चीजसारखी असल्यामुळे ते पनीर म्हणून विकलं जातं.

सल्ला: पुढील काळात रेस्टॉरंटमध्ये पनीर ऑर्डर देताना मेन्यूवर “चीज ॲनॉलॉग” असा उल्लेख आहे का, याकडे लक्ष द्या.