वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 

PM किसान योजनेचा 22 वा हप्ता उद्या शेतकऱ्यांच्या खात्यात; अहिल्यानगर जिल्ह्यात सर्वाधिक 5.45 लाख लाभार्थी

गुवाहाटी येथे पंतप्रधानांच्या उपस्थितीत होणार निधी वितरण; राज्यातील 91.18 लाख शेतकरी पात्र, लाभार्थ्यांच्या संख्येत वाढ

मुंबई: केंद्र सरकारच्या पीएम किसान सन्मान निधी योजनेचा 22 वा हप्ता शुक्रवारी (13 मार्च) शेतकऱ्यांच्या खात्यात जमा होणार आहे. या हप्त्यासाठी राज्यातील 91 लाख 18 हजार 831 शेतकरी पात्र ठरले आहेत. विशेष म्हणजे, लाभार्थ्यांच्या संख्येत मागील हप्त्याच्या तुलनेत 1 लाख 2 हजार 590 ची वाढ झाली आहे. निधी वितरणाचा मुख्य सोहळा पंतप्रधान नरेंद्र मोदी यांच्या उपस्थितीत आसामची राजधानी गुवाहाटी येथे पार पडणार आहे.

चार महिन्यांनी हप्ता वितरण

यापूर्वी 21 वा हप्ता नोव्हेंबर 2025 मध्ये वितरित करण्यात आला होता. त्यानंतर आता सुमारे चार महिन्यांच्या अंतराने 22 वा हप्ता शेतकऱ्यांच्या खात्यात जमा होत आहे. सुरुवातीला हा हप्ता जानेवारी अखेर किंवा फेब्रुवारीमध्ये वितरित केला जाईल, अशी अपेक्षा होती; मात्र प्रशासकीय कारणांमुळे विलंब झाला. आता आसाम, पश्चिम बंगालसह काही राज्यांतील विधानसभा निवडणुकांच्या पार्श्वभूमीवर या हप्त्याचे वितरण करण्यात येत असल्याचे सूत्रांनी सांगितले.

अहिल्यानगरमध्ये सर्वाधिक लाभार्थी

राज्यातील जिल्ह्यांचा विचार केल्यास, पीएम किसान योजनेच्या 22 व्या हप्त्यासाठी सर्वाधिक 5 लाख 45 हजार 280 शेतकरी अहिल्यानगर जिल्ह्यातील आहेत. त्याखालोखाल सोलापूर जिल्ह्यात 4 लाख 92 हजार 441, कोल्हापूरमध्ये 4 लाख 64 हजार 869, साताऱ्यात 4 लाख 38 हजार 668 आणि पुणे जिल्ह्यात 4 लाख 33 हजार 706 शेतकरी या योजनेसाठी पात्र ठरले आहेत.

कृषी विभागाकडून नियोजन सुरू

राज्यातील कार्यक्रमाचे नियोजन सुरू असल्याची माहिती कृषी विभागाने दिली आहे. गुवाहाटी येथे होणाऱ्या मुख्य सोहळ्यानंतर राज्यातही विविध कार्यक्रमांचे आयोजन करण्यात येणार आहे. या योजनेअंतर्गत पात्र शेतकऱ्यांना वर्षाला 6 हजार रुपयांची आर्थिक मदत तीन हप्त्यांमध्ये (प्रत्येकी 2 हजार रुपये) देण्यात येते.

 पीएम किसान योजना: पहिले पाच जिल्हे (लाभार्थी संख्या)

| क्रमांक | जिल्हा | लाभार्थी शेतकरी संख्या |

|---------|--------|---------------------|

| १ | अहिल्यानगर | ५,४५,२८० |

| २ | सोलापूर | ४,९२,४४१ |

| ३ | कोल्हापूर | ४,६४,८६९ |

| ४ | सातारा | ४,३८,६६८ |

| ५ | पुणे | ४,३३,७०६ |

पात्र शेतकरी बँक खाते व आधार लिंक असल्याची खात्री करून घ्यावी, असे आवाहन कृषी विभागामार्फत करण्यात आले आहे.