वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

  IPL 2026 लिलावात पैशाचा पाऊस! सर्वात महागड्या पाच खेळाडूंवरच खर्च झाले एकूण रकमेचे 40 टक्के

 कॅमेरॉन ग्रीन 25.20 कोटींसह सर्वात महागडा; मथिशा पाथिराना, कार्तिक शर्मा, प्रशांत वीर आणि लिव्हिंगस्टोनच्या नावावर तगडी बोली

आयपीएल 2026 च्या मेगा लिलावात पैशांचा जोरदार पाऊस पडला असून, एकूण खर्च केलेल्या रकमेपैकी तब्बल 40 टक्के रक्कम केवळ पाच खेळाडूंवर खर्च करण्यात आली आहे. 16 नोव्हेंबर 2025 रोजी अबू धाबीच्या एतिहाद अरेना येथे पार पडलेल्या या लिलावात एकूण 369 खेळाडूंवर बोली लावण्यात आली, त्यापैकी 77 खेळाडूंची विक्री झाली. सर्व संघांनी मिळून 215.45 कोटी रुपये खर्च केले, मात्र यापैकी अंदाजे 86 कोटी रुपये म्हणजे जवळपास 40 टक्के रक्कम केवळ पाच खेळाडूंवर खर्च झाली.

आयपीएल 2026 च्या सर्वात महागड्या खेळाडूंची यादी:

1. कॅमेरॉन ग्रीन (25.20 कोटी रुपये)

ऑस्ट्रेलियाचा अष्टपैलू कॅमेरॉन ग्रीन आयपीएल 2026 च्या लिलावात सर्वात महागडा खेळाडू ठरला. कोलकाता नाईट रायडर्सने (केकेआर) त्याला 25.20 कोटी रुपयांच्या विक्रमी किंमतीत खरेदी केले. केवळ या हंगामातीलच नव्हे, तर आयपीएलच्या इतिहासातील सर्वात महागडा परदेशी खेळाडू बनण्याचा मान ग्रीनला मिळाला आहे. त्याची मूळ किंमत 2 कोटी रुपये होती.

2. मथिशा पाथिराना (18 कोटी रुपये)

केकेआरनेच या हंगामातील दुसरी सर्वात मोठी बोली श्रीलंकेचा वेगवान गोलंदाज मथिशा पाथिरानासाठी लावली. संघाने त्याला 18 कोटी रुपयांत आपल्या ताफ्यात सामील केले. केकेआरने केवळ या दोन खेळाडूंवर एकूण 43.20 कोटी रुपये खर्च केले.

3-4. कार्तिक शर्मा आणि प्रशांत वीर (प्रत्येकी 14.20 कोटी रुपये)

चेन्नई सुपर किंग्जने (सीएसके) दोन अनकॅप्ड भारतीय खेळाडूंसाठी विक्रमी बोली लावत सर्वांना आश्चर्यचकित केले. संघाने कार्तिक शर्मा आणि प्रशांत वीर या दोघांनाही प्रत्येकी 14.20 कोटी रुपये देऊन खरेदी केले. दोन अनकॅप्ड खेळाडूंसाठी एवढी मोठी रक्कम खर्च करून सीएसकेने एकूण 28.40 कोटी रुपयांची बोली लावली.

5. लिअम लिव्हिंगस्टोन (13 कोटी रुपये)

लिलावाच्या पहिल्या फेरीत कोणतीही बोली न लागलेला इंग्लंडचा धडाकेबाज फलंदाज लिअम लिव्हिंगस्टोन दुसऱ्या फेरीत चांगलाच महागला. सनरायझर्स हैदराबादने त्याच्यासाठी 13 कोटी रुपये मोजत त्याला संघात स्थान दिले.

यंदाचा आयपीएल हंगाम 28 मार्च 2026 रोजी सुरू होणार असून, अंतिम सामना 31 मे 2026 रोजी खेळवला जाईल. या हंगामात 10 संघांमध्ये एकूण 84 सामने खेळवले जाणार आहेत.