वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

"देवेगौडा, खरगे, पवार यांच्याकडून शिका नवीन खासदार!"; राज्यसभेत निवृत्त खासदारांचा निरोप समारंभात पीएम मोदींचा सल्ला

संसद हे महान मुक्त विद्यापीठ; निवृत्त होणाऱ्या 37 खासदारांच्या योगदानाचा गौरव, हरिवंश यांच्या कार्याचे कौतुक

पंतप्रधान नरेंद्र मोदी यांनी राज्यसभेत निवृत्त होणाऱ्या 37 खासदारांच्या सन्मानार्थ आयोजित निरोप समारंभात भावपूर्ण भाषण केले. यावेळी त्यांनी नवनिर्वाचित खासदारांना मार्गदर्शन करताना ज्येष्ठ नेते एच.डी. देवेगौडा, मल्लिकार्जुन खरगे आणि शरद पवार यांच्याकडून प्रेरणा घेण्याचा सल्ला दिला. या तिन्ही नेत्यांनी आपल्या आयुष्यातील अर्ध्याहून अधिक काळ संसदीय कामकाजात घालवला आहे, असे ते म्हणाले.

"हे सभागृह मुक्त विद्यापीठ"

पंतप्रधान मोदी म्हणाले, "हे सभागृह स्वतःच एक महान मुक्त विद्यापीठ आहे. आपल्याला येथे सतत शिक्षण मिळत राहते. येथील सहा वर्षांचा काळ हा राष्ट्राच्या जीवनासोबतच आपले जीवन घडवण्याची संधी असते." निवृत्त होणाऱ्या खासदारांच्या योगदानाबद्दल बोलताना ते म्हणाले की, या सभागृहात निरोप घेणारे सर्व सदस्य या संस्थेच्या लोकशाही परंपरेचे प्रतीक आहेत.

हरिवंश यांच्या कार्याचे कौतुक

उपसभापती हरिवंश यांच्या कार्याचे विशेष कौतुक करताना पंतप्रधान म्हणाले, "हरिवंशजी यांना या सभागृहात दीर्घकाळ सेवा करण्याची संधी मिळाली आहे. ते मृदुभाषी असून, संकटकाळात सूत्रे हाती घेण्याची जबाबदारी त्यांच्यावर येते. ते केवळ सभागृहातच नव्हे, तर देशाच्या कानाकोपऱ्यात जाऊन तरुणांना भेटतात आणि त्यांच्यासाठी कार्य करतात."

नवीन खासदारांना मोदींचा सल्ला

"जेव्हा आयुष्यात मोठे निर्णय घ्यायचे असतात, तेव्हा कुटुंबातील सदस्य दुसऱ्याचे मत घेण्याचा सल्ला देतात. संसदीय प्रणालीमध्येही 'दुसऱ्या मताची' मोठी भूमिका असते. हे दुसरे मत सर्व चर्चांना नवीन आयाम देते आणि निर्णय प्रक्रिया समृद्ध करते," असे पंतप्रधान म्हणाले. दर दोन वर्षांनी सभागृह सोडणाऱ्या मोठ्या गटामुळे नवीन सदस्यांना अनुभवी सदस्यांकडून शिकण्याची संधी मिळते, असेही त्यांनी स्पष्ट केले.

नवीन आणि जुन्या संसदेचा अनुभव

पंतप्रधान मोदी पुढे म्हणाले की, निवृत्त होणाऱ्या अनेक खासदारांना नवीन आणि जुन्या अशा दोन्ही संसदेत बसण्याची संधी मिळाली होती. हा अनुभव अमूल्य असून, भविष्यातील खासदारांसाठी तो प्रेरणादायी आहे. निवृत्त होणाऱ्या सर्व खासदारांना त्यांनी शुभेच्छा दिल्या आणि त्यांच्या योगदानाबद्दल कृतज्ञता व्यक्त केली.