म्हसवड : धुळदेवमध्ये भयानक अपघात, दोघे जागीच ठार; तीन जखमी

 

बीड-अहिल्यानगर राज्य महामार्गावर भीषण अपघात; कापशी गावाजवळ भरधाव ट्रकने कारला जोरदार धडक, आई-मुलाला बाहेर पडता आले नाही

बीड: बीड-अहिल्यानगर राज्य महामार्गावर एक हृदयद्रावक आणि भीषण अपघात घडला आहे. खडीने भरलेल्या भरधाव हायवाने कारला समोरासमोर जोरदार धडक दिल्याने कारने अचानक पेट घेतला. यात कारमध्ये बसलेल्या आई आणि तिच्या मुलाचा होरपळून जागीच मृत्यू झाला. ही अंगावर काटा आणणारी घटना केज तालुक्यातील कापशी गावाजवळ घडली.

केज तालुक्यातील साळेगाव येथील रहिवासी असलेले हे आई-मुलगा बीडच्या दिशेने कारने प्रवास करत होते. याचवेळी बीडकडून डोईठाणकडे खडी घेऊन जाणारा एक हायवा भरधाव वेगाने येत होता. कापशी गावाजवळ दोन्ही वाहनांमध्ये समोरासमोर भीषण धडक झाली.

धडक इतकी जोरदार होती की, कारच्या इंजिनमध्ये तात्काळ आग लागली. आगीने रौद्र रूप धारण केल्याने कारमधील आई आणि मुलाला दरवाजा उघडून बाहेर पडता आले नाही. बघता बघता संपूर्ण कार आगीत भडकली आणि मदतीसाठी लोक धावण्यापूर्वीच दोघांचा कारमध्येच होरपळून मृत्यू झाला.

या भीषण अपघातामुळे महामार्गावर मोठी गर्दी झाली असून परिसरात हळहळ व्यक्त केली जात आहे. घटनेची माहिती मिळताच स्थानिक पोलिसांनी घटनास्थळी धाव घेतली आणि पंचनामा सुरू केला आहे. अपघाताची नेमकी कारणे तपासली जात आहेत.

प्राथमिक माहितीनुसार, हायवाचा वेग आणि दोन्ही वाहनांमधील समोरासमोर धडक ही अपघाताची मुख्य कारणे असल्याचे सांगितले जात आहे. पोलिस अधिक तपास करत आहेत.

ही घटना बीड-अहिल्यानगर महामार्गावरील वाहतूक सुरक्षेच्या दृष्टीने पुन्हा एकदा प्रश्नचिन्ह निर्माण करणारी ठरली आहे.