म्हसवड : धुळदेवमध्ये भयानक अपघात, दोघे जागीच ठार; तीन जखमी

  

मंडप व्यावसायिक अरुण महाजन यांचा मिसफायरमुळे अंत; मित्र भूषण महाजनविरुद्ध खुनाचा गुन्हा दाखल

अमळनेर (जळगाव): अमळनेर शहरातील अमलेश्वर नगर परिसरात शुक्रवारी रात्री मित्रांसोबत गप्पा मारत असताना गावठी कट्ट्यातून झालेल्या ‘मिसफायर’मुळे ३५ वर्षीय तरुण व्यावसायिकाचा जागीच मृत्यू झाला आहे. या घटनेने संपूर्ण परिसरात खळबळ उडाली आहे.

मृत तरुणाचे नाव अरुण सुरेश महाजन असे असून, तो मंडप व्यवसायाशी संबंधित होता.

नेमकी घटना काय घडली?

शुक्रवारी रात्री साडेनऊच्या सुमारास अरुण महाजन आपल्या काही मित्रांसोबत माळीवाडा परिसरात गप्पा मारत बसले होते. यावेळी त्याचा मित्र भूषण महाजन आपल्याजवळील गावठी कट्ट्याबद्दल (पिस्तूल) माहिती देत होता. कट्टा हाताळत असताना अचानक त्यातून गोळी सुटली आणि ती थेट अरुण महाजन यांच्या छातीत घुसली.

गोळी लागताच अरुण रक्ताच्या थारोळ्यात कोसळला. त्याला तातडीने जवळच्या खासगी रुग्णालयात नेले, मात्र डॉक्टरांनी त्याला मृत घोषित केले.

पोलिस कारवाई 

घटनेची माहिती मिळताच अमळनेर पोलिस निरीक्षक दत्तात्रय निकम यांनी पथकासह घटनास्थळी आणि रुग्णालयात धाव घेतली. पोलिसांनी भूषण महाजन यांच्याविरुद्ध खुनाचा गुन्हा दाखल केला आहे.

प्राथमिक तपासात हा अपघात वाटत असला तरी, पोलिस अनेक अँगलने तपास करत आहेत. कट्टा कोठून आणि कशासाठी भूषण महाजन यांच्याकडे आला? गोळी सुटण्यापूर्वी मित्रांमध्ये वाद झाला होता का? हा निष्काळजीपणाचा प्रकार होता का? या सर्व बाबींचा तपास सुरू आहे.

या घटनेमुळे अमळनेर शहरात एकच खळबळ उडाली असून, परिसरात भीतीचे वातावरण निर्माण झाले आहे.