वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

राजस्थान रॉयल्सची १५२८६ कोटींना विक्री, राजस्थान आयपीएलमधील सर्वात महागडा संघ, आरआरची खरेदी कोणी केली?

अमेरिकन उद्योजक कल सोमानी यांच्या संघाने १.६३ अब्ज डॉलर्सला घेतली १०० टक्के भागीदारी; आयपीएल इतिहासातील सर्वात मोठी डील

नवी दिल्ली: इंडियन प्रीमिअर लीगच्या १९ व्या हंगामाची सुरुवात होण्यापूर्वी राजस्थान रॉयल्स संदर्भात मोठी बातमी समोर आली आहे. आयपीएलमधील या संघाची विक्री करण्यात आली असून, तो आता आयपीएलमधील सर्वात महागडा संघ ठरला आहे.

राजस्थान रॉयल्सचा नवा मालक कोण?

अमेरिकन उद्योजक कल सोमानी यांच्या संघाने राजस्थान रॉयल्सची १.६३ अब्ज अमेरिकन डॉलर्स म्हणजेच १५२८६ कोटी रुपयांना खरेदी केली आहे. कल सोमानी यांच्या संघाने राजस्थान रॉयल्सची १०० टक्के भागीदारी खरेदी केल्याचे वृत्त आहे.

कल सोमानी या इंट्राएज , ॲकडेमियन  आणि ट्रुयो.एआय  या कंपन्यांचे मालक आहेत. त्यांना अमेरिकन उद्योजक रॉब वॉल्टन यांचा पाठिंबा आहे. कल सोमानी २०२१ पासून राजस्थान रॉयल्सचे भागीदार आहेत. या डील संदर्भात गेल्या सहा महिन्यांपासून चर्चा सुरू होती.

आयपीएल इतिहासातील सर्वात मोठी डील

राजस्थान रॉयल्स १५२८६ कोटी रुपयांना विकला गेल्याने हा संघ आयपीएलमधील सर्वात महागडा संघ ठरला आहे. आयपीएलच्या इतिहासातील ही सर्वात मोठी डील आहे. कल सोमानी यांनी या डीलबद्दल म्हटले की, "आम्ही या गुंतवणुकीत खूप क्षमता पाहत आहोत. आयपीएलच्या भविष्यासाठी आम्ही उत्सुक आहोत."

आधी आली होती मोठी ऑफर

राजस्थान रॉयल्सची मोठी भागीदारी यापूर्वी मनोज बडाले यांच्याकडे होती. काही दिवसांपूर्वी राजस्थान रॉयल्सला कोलंबिया पॅसिफिक कॅपिटल पार्टनर्सकडून १.७ बिलियन डॉलर्सची ऑफर मिळाली होती. मात्र, काही तांत्रिक कारणांमुळे राजस्थान रॉयल्सच्या मालकांनी ती ऑफर धुडकावली होती.

संघाचे नेतृत्व रियान परागकडे

राजस्थान रॉयल्सचे नेतृत्व आता रियान पराग करणार आहे. गेल्या हंगामात राजस्थान रॉयल्सचा कर्णधार संजू सॅमसन होता. मात्र, आता संजू सॅमसन चेन्नई सुपर किंग्जमध्ये गेला आहे. संजू सॅमसनच्या बदल्यात सॅम करन आणि रवींद्र जडेजा राजस्थानच्या संघात आले होते. सॅम करन दुखापतग्रस्त झाला असून त्याच्या जागी दासून शनाका २ कोटी रुपयांमध्ये राजस्थानमध्ये दाखल झाला आहे.

आरसीबीच्या विक्रीचीही चर्चा

राजस्थान रॉयल्सची विक्री झाल्यानंतर आता रॉयल चॅलेंजर्स बंगळुरुच्या विक्रीची चर्चा देखील सुरू झाली आहे. अंदाज व्यक्त केला जात आहे की रॉयल चॅलेंजर्स बंगळुरुची विक्री २० हजार कोटी रुपयांपेक्षा अधिक रकमेत होऊ शकते.

आयपीएल २०२६ चे आगमन

आयपीएलच्या १९ व्या हंगामाला २८ मार्चपासून सुरुवात होणार आहे. यंदाच्या आयपीएलचा पहिला सामना रॉयल चॅलेंजर्स बंगळुरु आणि सनरायजर्स हैदराबाद यांच्यात खेळवला जाणार आहे.

राजस्थान रॉयल्सचा संघ 

रवींद्र जडेजा, सॅम करन, डोनोवन फरेरा, संदीप शर्मा, शुभम दुबे, वैभव सूर्यवंशी, लुआन-ड्राईस प्रिटोरियस, शिमरॉन हेटमायर, यशस्वी जैस्वाल, ध्रुव जुरेल, रियान पराग, युधवीर सिंग चरक, जोफ्रा आर्चर, तुषार देशपांडे, क्विना मफाका, नांद्रे बर्गर, रवी बिश्नोई, सुशांत मिश्रा, यशराज पुंजा, विघ्नेश पुथूर, रवी सिंग, अमन राव, ब्रिजेश शर्मा, ॲडम मिल्ने, कुलदीप सेन

राजस्थान रॉयल्सच्या या ऐतिहासिक विक्रीमुळे आयपीएलच्या व्यापारिक मूल्यांकनात मोठी वाढ झाली असून, आगामी काळात इतर संघांच्या विक्रीकडेही सर्वांचे लक्ष लागले आहे.