वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 भावाच्या निधनानंतर वहिनीशी केला विवाह; नांदेडच्या प्रफुल्ल पाटील या तरुणाने नातं जपत पोरका झालेला संसार सावरला

व्यवसायाने ऑटोरिक्षा चालक असलेल्या प्रफुल्लने भावाच्या मुलांच्या भविष्यासाठी घेतला धाडसी निर्णय; ग्रामस्थांकडून कौतुक

नांदेड: आजच्या काळात रक्ताच्या नात्यांमध्येही दुरावा वाढत चालला असताना, नांदेड जिल्ह्यातील किनवट तालुक्यातील वझरा (बु.) येथील एका तरुणाने माणुसकी आणि कौटुंबिक जबाबदारीचा अनोखा आदर्श समाजासमोर ठेवला आहे. आपल्या दिवंगत भावाच्या मुलांचे भविष्य अंधारात जाऊ नये, यासाठी प्रफुल्ल पाटील या अविवाहित तरुणाने आपल्या वहिनीशी विवाह करून पोरक्या झालेल्या संसाराला खऱ्या अर्थाने सावरले आहे.

वझरा (बु.) येथील रहिवासी अष्टपाल पाटील यांचे फेब्रुवारी २०२६ मध्ये दीर्घ आजाराने निधन झाले. अष्टपाल यांच्या निधनामुळे त्यांच्या कुटुंबावर आभाळच फाटले. त्यांच्या पश्चात पत्नी विजयालक्ष्मी, ८ वर्षांची मुलगी आणि ६ वर्षांचा अंध मुलगा असा परिवार निराधार झाला होता. कर्ता पुरुष गेल्याने मुलांचे शिक्षण, संगोपन आणि पत्नीचा उदरनिर्वाह कसा होणार, हा गंभीर प्रश्न निर्माण झाला होता.

प्रफुल्लचा धाडसी निर्णय

कुटुंबाची ही दयनीय अवस्था पाहून धाकटा भाऊ प्रफुल्ल पाटील याने केवळ सहानुभूती दाखवली नाही, तर एक धाडसी आणि कौतुकास्पद निर्णय घेतला. त्याने आपल्या वहिनी विजयालक्ष्मी यांना जीवनसाथी म्हणून स्वीकारले आणि पुतण्या-पुतणीच्या पितृछत्राची संपूर्ण जबाबदारी स्वतःच्या खांद्यावर घेतली. प्रफुल्ल व्यवसायाने ऑटोरिक्षा चालक असून अत्यंत सामान्य आर्थिक परिस्थितीतही त्याने स्वतःच्या संसाराचा विचार करण्यापेक्षा भावाच्या मुलांच्या भविष्याला प्राधान्य दिले.

"ही भावाप्रतीची जबाबदारी"

प्रफुल्ल पाटील याने या निर्णयाबद्दल म्हटले की, "माझ्या भावाच्या पश्चात ही मुले अनाथ होऊ नयेत आणि वहिनीला समाजात सन्मानाने जगता यावे, हाच या विवाहामागचा माझा मुख्य उद्देश आहे. ही माझी केवळ जबाबदारी नसून भावाप्रती असलेले माझे कर्तव्य आहे."

ग्रामस्थांकडून कौतुक

वैयक्तिक सुखाचा त्याग करून रक्ताच्या नात्याला आणि माणुसकीला महत्त्व देणाऱ्या प्रफुल्लच्या या निर्णयाचे ग्रामस्थांनी मनापासून कौतुक केले आहे. समाजात अशी उदाहरणे दुर्मिळ झाली असताना, प्रफुल्लने नातेसंबंधाची जपणूक करत खऱ्या अर्थाने ‘कर्तव्य’ आणि ‘माणुसकी’ची नवी परिभाषा लिहिली आहे.