वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

मुंबईकरांसाठी गुड न्यूज, लवकरच २५०० घरांसाठी लॉटरी निघणार, किंमत किती असणार?

म्हाडाच्या लॉटरीत ईडब्ल्यूएस, एलआयजी, एमआयजी आणि एचआयजी अशा विविध उत्पन्न गटांसाठी घरे; २०२४ मध्ये किंमत २९ लाख ते ६.८२ कोटी होती

मुंबई: महाराष्ट्र गृहनिर्माण व क्षेत्रविकास प्राधिकरणातर्फे (म्हाडा) लवकरच मुंबईतील २५०० घरांच्या विक्रीसाठी लॉटरी काढली जाणार आहे. येत्या १० ते १५ दिवसांमध्ये ही लॉटरी जाहीर केली जाऊ शकते. अधिकाऱ्यांच्या माहितीनुसार लॉटरीमध्ये मुंबईतील विविध भागांतील घरांचा समावेश असेल. म्हाडाचे सीईओ मिलिंद बोरीकर यांनी काही दिवसांपूर्वीच १० दिवसांनंतर मुंबईतील २५०० परवडणाऱ्या घरांच्या विक्रीसाठी लॉटरी काढणार असल्याचे म्हटले होते.

कोणत्या उत्पन्न गटांसाठी घरे?

म्हाडाच्या नियमानुसार अर्जदारांची विविध उत्पन्न गटांमध्ये विभागणी केली जाते. या लॉटरीत खालील गटांसाठी घरे उपलब्ध करून दिली जातील:

अत्यल्प उत्पन्न गट (EWS): कुटुंबाची वार्षिक उत्पन्न मर्यादा ६ लाख रुपये

अल्प उत्पन्न गट (LIG): ६ लाख ते ९ लाख रुपये

मध्यम उत्पन्न गट (MIG): ९ लाख ते १२ लाख रुपये

उच्च उत्पन्न गट (HIG): १२ लाख रुपयांपेक्षा जास्त उत्पन्न

घरांची संभाव्य किंमत किती?

म्हाडाने २०२४ मध्ये २००० घरांसाठी लॉटरी काढली होती. त्यावेळी घरांची किंमत २९ लाख ते ६.८२ कोटी रुपयांदरम्यान होती. यंदाच्या लॉटरीतील घरांची किंमत या आधारावर निश्चित केली जाण्याची शक्यता आहे. मात्र, अधिकृत किंमत लॉटरी जाहीर झाल्यानंतरच स्पष्ट होईल.

२०२५ मध्ये लॉटरी नव्हती, २०२४ मध्ये २००० घरांची लॉटरी

म्हाडाने २०२५ मध्ये मुंबईतील घरांची लॉटरी काढली नव्हती. त्यापूर्वी २०२४ मध्ये २००० घरांसाठी लॉटरी काढण्यात आली होती. आता २०२६ मध्ये २५०० घरांची लॉटरी काढली जाणार आहे. म्हाडाकडून संगणकीय पद्धतीने विविध उत्पन्न गटातील अर्जदारांच्या यादीनुसार सोडत काढली जाते.

म्हाडाचे विविध मंडळ

म्हाडाची विविध मंडळे कार्यरत असून मुंबईशिवाय पुणे, कोल्हापूर, नाशिक, छत्रपती संभाजीनगर मंडळे देखील लॉटरी जाहीर करतात. म्हाडाची स्थापना १९७७ मध्ये झाली होती. तेव्हापासून म्हाडाने ५.२७ लाख घरे बांधली आहेत.

मागील लॉटरीतील पात्रतेच्या अटी

मागील लॉटरीच्या आधारे पात्रतेच्या खालील अटी अपेक्षित आहेत:

 अर्ज सादर करावयाच्या दिवशी अर्जदाराचे वय १८ वर्षांपेक्षा कमी नसावे.

 विवाहित अर्जदारासाठी पती/पत्नी यांचे आधार कार्ड/पॅन कार्ड आवश्यक.

 अविवाहित अर्जदारासाठी स्वतःचे आधार कार्ड/पॅन कार्ड आवश्यक.

 जाहिरात प्रसिद्ध झाल्यापासून मागील सलग २० वर्षांच्या कालावधीत महाराष्ट्र राज्याच्या कोणत्याही भागात अर्जदाराचे किमान १५ वर्षे सलग वास्तव्य असल्याबाबतचे अधिवास प्रमाणपत्र (डोमिसाईल सर्टिफिकेट) आवश्यक. (हे प्रमाणपत्र जानेवारी २०१८ नंतर दिलेले असावे व त्यावर बारकोड असणे आवश्यक आहे.)

मुंबईकरांसाठी ही लॉटरी एक महत्त्वाची संधी ठरणार आहे. लॉटरीची अधिकृत जाहिरात येत्या १०-१५ दिवसांत प्रसिद्ध होण्याची शक्यता आहे.