वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

"संजयकाका पाटलांची छुपी मदत"; सांगली झेडपीच्या सत्तास्थापनेवरून जयंत पाटलांचा गौप्यस्फोट

भाजपच्या गोटातील हालचालींची माहिती मिळत होती, पालकमंत्री चंद्रकांत पाटील माझे 'हितचिंतक' म्हणत टोला; शिंदे सेनेच्या दोन सदस्यांच्या गैरहजेरीने महायुतीचे गणित बिघडले

सांगली: सांगली जिल्हा परिषदेच्या अध्यक्ष-उपाध्यक्ष पदाच्या निवडणुकीत महाविकास आघाडीने भाजपचा करेक्ट कार्यक्रम केल्यानंतर आता राष्ट्रवादी काँग्रेस (शरदचंद्र पवार) पक्षाचे नेते जयंत पाटील यांनी मोठा गौप्यस्फोट केला आहे. या विजयात माजी खासदार संजयकाका पाटील यांनी पडद्यामागून 'छुपी' मदत केल्याचा दावा जयंत पाटलांनी केला आहे.

भाजपच्या हालचालींची माहिती मिळत होती

जयंत पाटील म्हणाले, "भाजपच्या गोटात काय हालचाली सुरू आहेत याची इत्थंभूत माहिती आम्हाला मिळत होती." या दाव्यामुळे आता भाजपमध्ये अंतर्गत अस्वस्थता वाढण्याची शक्यता आहे. संजयकाका पाटील हे भाजपमधील ज्येष्ठ नेते असून त्यांच्याकडून मिळालेल्या मदतीचा दावा राजकीय वर्तुळात चर्चेचा विषय ठरत आहे.

पालकमंत्र्यांना खोचक टोला

जयंत पाटील यांनी जिल्ह्याचे पालकमंत्री चंद्रकांत पाटील यांच्यावरही आपल्या खास शैलीत निशाणा साधला. "पालकमंत्री चंद्रकांत पाटील यांच्याबाबत मी काही बोलणार नाही, ते माझे 'हितचिंतक' आहेत," असे म्हणत त्यांनी खोचक टोला लगावला. तसेच भाजपने सत्तेचा गैरवापर केल्याचा गंभीर आरोप त्यांनी केला. "जिल्हा परिषदेत भाजपकडे बहुमत नव्हते, तरीही पोलीस यंत्रणेचा वापर करून सत्ता खेचून आणण्याचा प्रयत्न झाला. मात्र, विरोधकांनी केलेल्या टीकेकडे लक्ष न देता आम्ही आमच्या उद्दिष्टाकडे वाटचाल केली आणि यश मिळवले," असे ते म्हणाले.

सांगलीत महाविकास आघाडीचा दणदणीत विजय

सांगली जिल्हा परिषदेच्या अध्यक्षपदाच्या निवडणुकीत राष्ट्रवादी काँग्रेस (शरदचंद्र पवार) च्या संगीता पाटील यांनी भाजपच्या स्वप्नाली मासाळ यांचा पराभव केला. संगीता पाटील यांना ३४ मते मिळाली, तर स्वप्नाली मासाळ यांना केवळ २४ मते मिळाली. उपाध्यक्षपदाच्या निवडणुकीतही महाविकास आघाडीचे ऋषिकेश लाड यांनी भाजप-युतीचे उमेदवार हिम्मत जाधव यांचा ३४ विरुद्ध २५ अशा मतांनी पराभव केला. ऋषिकेश लाड हे काँग्रेस आमदार विश्वजीत कदम यांचे भाचे आहेत.

या विजयासाठी आमदार जयंत पाटील, आमदार विश्वजीत कदम आणि खासदार विशाल पाटील यांनी आखलेली रणनीती यशस्वी ठरली.

शिंदे सेनेच्या सदस्यांची गैरहजेरी

आटपाडी तालुक्यातील शिंदे गटाचे दोन सदस्य, जयदीप भोसले आणि पृथ्वीराज पाटील हे मतदानाला गैरहजर राहिले. भाजप-युतीसाठी महत्त्वाचे मानले जाणारे हे दोन सदस्य अनुपस्थित राहिल्याने युतीचे गणित बिघडले आणि महाविकास आघाडीचा विजय सुकर झाला.