वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

सोने-चांदीच्या दरामध्ये अनपेक्षित ट्रेंड, सोने आणि चांदीच्या दरातील घसरणीला ब्रेक, चांदी १२००० रुपयांनी महागली, सोनं किती रुपयांवर?

एमसीएक्सवर चांदी २.३६ लाखांच्या पार, सोन्यात ५५०० रुपयांची उसळी; युद्धसंपण्याच्या संकेतांमुळे डॉलर कमजोर, आंतरराष्ट्रीय बाजारातही तेजी

नवी दिल्ली: सोने आणि चांदीच्या दरात गेल्या ९ दिवसांपासून सुरू असलेल्या घसरणीला मोठा ब्रेक लागला आहे. मल्टी कमोडिटी एक्सचेंज (एमसीएक्स) वर आज दोन्ही धातूंच्या दरात मोठी वाढ झाल्याचे पाहायला मिळाले आहे. अमेरिका आणि इराण यांच्यातील युद्ध थांबण्याची शक्यता निर्माण झाल्याने या तेजीला हातभार लागला आहे.

चांदी १२००० रुपयांनी महागली

एमसीएक्सवर चांदीच्या दरात ५.५ टक्क्यांची म्हणजेच १२००० रुपयांची वाढ झाली आहे. चांदीचा एक किलोचा दर २,३६,१३७ रुपये प्रति किलोवर पोहोचला आहे. गेल्या काही दिवसांपासून सातत्याने घसरण झाल्यानंतर आज चांदीने ही मोठी उसळी घेतली आहे.

सोन्यात ५५०० रुपयांची उसळी

सोन्याच्या दरात ४ टक्क्यांची म्हणजेच ५५०० रुपयांची वाढ झाली आहे. सोन्याचा दर १,४४,४३४ रुपये प्रति १० ग्रॅमवर पोहोचला आहे. आंतरराष्ट्रीय बाजारातही सोन्याच्या दरात मोठी वाढ नोंदवली गेली आहे.

आंतरराष्ट्रीय बाजारातही तेजी

आंतरराष्ट्रीय बाजारात सोन्याच्या दरात २ टक्क्यांहून अधिक वाढ झाली आहे. रॉयटर्सच्या वृत्तानुसार, डॉलर कमजोर झाल्याने, युद्ध संपण्याचे संकेत निर्माण झाल्याने आणि क्रूड ऑइलचे दर कमी झाल्याने सोन्याच्या दरात २.१ टक्क्यांची वाढ होऊन तो ४५६८.२९ डॉलर प्रति औंसवर पोहोचला आहे. एप्रिल डिलिव्हरीसाठी अमेरिकेच्या सोन्याच्या वायद्याचा दर ४५६९.४० डॉलर प्रति औंस झाला आहे.

चांदीच्या दरातही आंतरराष्ट्रीय बाजारात ३.८ टक्क्यांची वाढ होऊन ती ७३.९४ डॉलर प्रति औंसवर पोहोचली आहे.

युद्धसंपण्याच्या संकेतांमुळे तेजी

सोने आणि चांदीच्या दरातील वाढीमागे अमेरिका आणि इराण यांच्यातील युद्ध थांबण्याची शक्यता निर्माण झाल्याने ही तेजी आल्याचे बोलले जात आहे. अमेरिकेचे राष्ट्रपती डोनाल्ड ट्रम्प यांनी आखाती देशातील संघर्ष थांबवण्यासाठी राजनैतिक मार्ग शोधला जात असल्याचे म्हटले आहे. लवकरच उच्च स्तरावरील शांतता चर्चा होऊ शकते, असे अमेरिकेकडून सांगण्यात आले आहे. इराणकडून अद्याप यावर प्रतिक्रिया आलेली नाही.

डॉलर कमजोर, क्रूड ऑइलचे दर कमी

ब्लूमबर्गच्या रिपोर्टनुसार सोन्यातील तेजीमागे आणखी एक कारण म्हणजे कच्च्या तेलाच्या दरातील घसरण आणि डॉलर कमजोर होणे हे आहे. डॉलर निर्देशांक जवळपास ०.२ टक्क्यांनी घसरला आहे. यामुळे सोन्याच्या गुंतवणूकदारांना याचा फायदा झाला आहे.

अनिश्चितता कायम

सोन्याच्या दरात तेजी आली असली तरी बाजारात अनिश्चितता कायम आहे. इराणची अद्याप होर्मुझच्या सामुद्रधुनीवर पकड आहे. अमेरिकेने २००० सैनिक आखाती देशांमध्ये पाठवण्याचा निर्णय घेतला आहे. ऊर्जा साधनांच्या दरात वाढ झाल्याने महागाई वाढण्याचे संकट निर्माण झाले आहे.

मार्च महिन्यात १५ टक्क्यांची घसरण

मार्च महिन्यात सोन्याच्या दरात १५ टक्क्यांची घसरण झाली होती. युद्धामुळे क्रूड ऑइलचा दर १२० डॉलर प्रति बॅरलपर्यंत पोहोचला होता. रिपोर्टनुसार काही केंद्रीय बँकांनी चलन वाचवण्यासाठी सोन्याची विक्री केली. तज्ज्ञांच्या मते सोन्याचे दर युद्ध, तेलाचे दर आणि व्याजदर यावर अवलंबून असतील.