वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

  बॉलिवूड अभिनेत्रीचा आईला शेवटचा निरोप; 'मिट्टी पाओ' म्हणत टिस्का चोप्राची हृदयस्पर्शी पोस्ट चर्चेत

 कर्करोगाशी झुंज देताना पम्मी अरोरा यांचे निधन; अभिनेत्रीने आठवणींना उजाळा देत वाचकांच्या डोळ्यात आणले पाणी

बॉलिवूड अभिनेत्री टिस्का चोप्रावर दुःखाचा डोंगर कोसळला आहे. गेल्या काही काळापासून कर्करोगाशी झुंज देत असलेल्या त्यांच्या आई पम्मी अरोरा यांचे ७ मार्च रोजी निधन झाले. आईच्या निधनाने व्यथित झालेल्या अभिनेत्रीने सोशल मीडियावर एक हृदयस्पर्शी पोस्ट शेअर करत आठवणींना उजाळा दिला आहे.

'मिट्टी पाओ'चा धडा

टिस्काने आपल्या पोस्टमध्ये आईच्या व्यक्तिमत्त्वाचे सुंदर शब्दांत वर्णन केले आहे. ती म्हणाली, "७ मार्चला आम्ही माझ्या आईला अखेरचा निरोप दिला. ज्यांनी तिला ओळखलं, त्यांनी तिला पहिल्याच भेटीत मनापासून प्रेम केलं. कारण ती स्वभावाने हलकी, आनंदी आणि मोकळी होती. अडचणीच्या क्षणी तिच्याकडे दोन शब्दांचं तत्वज्ञान तयार असायचं - 'मिट्टी पाओ'. म्हणजे त्या गोष्टीवर माती टाका आणि पुढे चला."

अभिनेत्रीने आईच्या हास्याची तुलना ढगांमधून डोकावणाऱ्या चंद्राशी केली आहे. ती पुढे म्हणाली, "न्याय करण्यापेक्षा विनोद आणि प्रत्येक गोष्टीपेक्षा माणुसकी हेच तिचं खरं रूप होतं."

आयुष्यातील अमूल्य धडा

टिस्काने आईकडून मिळालेल्या आयुष्यातील महत्त्वाच्या धड्याचा उल्लेख केला आहे. "तिच्याकडून मला एक अमूल्य धडा मिळाला - 'तुझ्या खिशात आधीच 'नाही' आहे. आता बाहेर जा आणि 'हो' मिळव.' हे अगदी पम्मी अरोरांसारखंच साधं, पण आशावादाने भरलेलं होतं," अशा शब्दात टिस्काने आईच्या शिकवणीचा गौरव केला आहे.

कलेचा वारसा आणि मायेची सावली

आपल्यात रुजलेल्या कलेच्या वारशाचे श्रेय टिस्काने आईला दिले आहे. "सादरीकरणाची ओढ, कथा सांगण्याची आवड, रंग आणि अभिव्यक्तीकडे झुकणारी वृत्ती ही तिने दिलेली भेट आहे," असे ती म्हणाली.

पम्मी अरोरा या बाहेरच्या जगासाठी 'अरोरा मॅडम' होत्या. शिक्षिका म्हणून त्यांनी असंख्य मुलांच्या मनात विशेष स्थान निर्माण केले होते. टिस्का म्हणाली, "ते फक्त शिक्षिका नव्हत्या, तर विद्यार्थ्यांसाठी मैत्रीण आणि आईसारख्या होत्या. पुढे अनेक विद्यार्थी पालक बनून आपल्या मुलांना त्यांच्याकडे घेऊन यायचे."

कॅन्सरशी झुंजतानाही हार न मानणारी जिद्द

कॅन्सर आणि तुटलेली कंबर यासारख्या गंभीर आजारांशी झुंजत असतानाही पम्मी यांनी कधी हार मानली नाही. टिस्काने आठवण सांगितली, "आयसीयूमध्येही एखादं गाणं लागलं की त्यांचे पंजाबी खांदे हलकेच ताल धरायचे. वेदना सहन करतानाही त्यांच्यात मोहकपणा होता."

शेवटचा निरोप

शेवटी टिस्काने भावुक मन:स्थितीत लिहिले, "तिच्या मायेच्या सावलीत वाढण्याचं भाग्य मला मिळालं. आता ही सगळी गंभीरता पाहून ती असती तर कदाचित हसत एवढंच म्हणाली असती - 'बस, आता मिट्टी पाओ.' म्हणून आम्ही अश्रूंमधूनही हसू. तिच्या आठवणी जपू. कारण ज्यांनी तिला प्रेम केलं, ते तिला कधीच खऱ्या अर्थाने हरवणार नाहीत."

या हृदयस्पर्शी पोस्टने सोशल मीडियावर चांगलीच चर्चा सुरू झाली असून चाहते आणि सेलिब्रिटींकडून टिस्कावर श्रद्धांजलीचा वर्षाव होत आहे.