वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 गॅस टंचाईवर राज्य सरकारचा तोडगा: केरोसिनचा पर्याय उपलब्ध करून देणार; छगन भुजबळांची विधानसभेत घोषणा

ठळक बातम्या:

 एलपीजी तुटवड्याच्या पार्श्वभूमीवर पेट्रोल पंपांवर केरोसिन उपलब्ध करून देणार

घरगुती गॅसचे उत्पादन ९००० वरून ११००० मेट्रिक टनांपर्यंत वाढवल्याची माहिती

 रुग्णालये, शैक्षणिक संस्था, वृद्धाश्रमांना एलपीजी वितरणात १०० टक्के प्राधान्य

मुंबई: राज्यात सध्या एलपीजी गॅसच्या तुटवड्यामुळे नागरिकांच्या रांगा लागल्या असून, या पार्श्वभूमीवर राज्य सरकारने मोठा निर्णय घेतला आहे. गॅस टंचाईवर तात्पुरता तोडगा म्हणून आता पेट्रोल पंपांवर केरोसिन उपलब्ध करून देण्यात येणार आहे. अन्न व नागरी पुरवठा मंत्री छगन भुजबळ यांनी सोमवारी विधानसभेत ही माहिती दिली.

एलपीजी उत्पादन वाढवल्याचा दावा

छगन भुजबळ म्हणाले, "मी बीपीसीएल, एचपीसीएल आणि आयओसीएल या पेट्रोलियम कंपन्यांच्या प्रतिनिधींशी चर्चा केली असून, त्यांनी राज्यातील घरगुती गॅसचे दैनंदिन उत्पादन ९००० वरून ११००० मेट्रिक टनांपर्यंत वाढवल्याचे सांगितले आहे. एलपीजी उत्पादनातील सर्व अडचणी दूर करण्याचे काम सुरू आहे."

प्राधान्यक्रम निश्चित

गॅस टंचाईच्या पार्श्वभूमीवर एलपीजी वितरणात प्राधान्यक्रम ठरवण्यात आला आहे. यानुसार रुग्णालये, शैक्षणिक संस्था, वृद्धाश्रम, स्मशानभूमी यांना १०० टक्के प्राधान्य दिले जाणार आहे. तर औषध उद्योगासाठी आणि संरक्षण क्षेत्रातील उपहारगृहांना ५० टक्के प्राधान्य असेल.

केरोसिनचा पर्याय का?

उज्ज्वला योजनेच्या लाभार्थ्यांना केरोसिन न देण्याचे निर्देश न्यायालयाने दिले होते. मात्र, सद्यस्थितीत सर्व नागरिकांना केरोसिन उपलब्ध करून देण्यासाठी न्यायालयाला कळवल्याचे भुजबळ यांनी सांगितले. मध्यंतरी केरोसिन पूर्णपणे बंद केल्याने केरोसिन डिलर्सची साखळी तुटली होती. त्यामुळे आता बीपीसीएल, एचपीसीएल आणि आयओसीएल या कंपन्यांच्या पंपांवर केरोसिन उपलब्ध करून दिले जाणार आहे, जेणेकरून भेसळीचा धोका टाळता येईल.

कारवाईचा आढावा

गॅस टंचाईच्या पार्श्वभूमीवर काळाबाजार करणाऱ्यांवर कारवाई करण्यात आली असून, आतापर्यंत १२०८ गॅस सिलेंडर आणि ३३ लाख रुपयांचा मुद्देमाल जप्त करण्यात आला आहे. गॅस सिलेंडरची किंमत एका महिन्यात वाढली असली तरी, एलपीजी उत्पादनही वाढवल्याचा दावा भुजबळ यांनी केला. केंद्र सरकारच्या सतत संपर्कात असून, हा प्रश्न हळूहळू सुटेल अशी अपेक्षा त्यांनी व्यक्त केली.