वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 

भारत-फ्रान्स मैत्रीचा नवा अध्याय! २०२६ वर्ष उभय देशांसाठी 'टर्निंग पॉईंट'; मुंबईत मोदी-मॅक्रॉन यांची ऐतिहासिक भेट

मुंबई: फ्रान्सचे राष्ट्राध्यक्ष इमॅन्युएल मॅक्रॉन यांचे आज मुंबईत भव्य स्वागत करण्यात आले. राज्यपाल आणि मुख्यमंत्री देवेंद्र फडणवीस यांनी विमानतळावर त्यांचे स्वागत केल्यानंतर, पंतप्रधान नरेंद्र मोदी यांनी मॅक्रॉन यांची भेट घेतली. या भेटीनंतर आयोजित संयुक्त पत्रकार परिषदेत बोलताना पंतप्रधानांनी भारत आणि फ्रान्समधील धोरणात्मक भागीदारीवर प्रकाश टाकला आणि स्वातंत्र्यवीर सावरकरांच्या ऐतिहासिक उडीच्या स्मृतींना उजाळा दिला.

सावरकरांच्या साहसाची आणि शौर्याची आठवण

पंतप्रधान मोदींनी आपल्या भाषणात फ्रान्समधील मार्सेल (Marseille) बंदराचा उल्लेख केला. ते म्हणाले, "फ्रान्सचे हे तेच मोठे बंदर आहे, जिथे पहिल्या महायुद्धात भारतीय सैनिकांनी पहिले पाऊल ठेवले होते. याच समुद्राजवळ स्वातंत्र्यवीर सावरकरांनी ऐतिहासिक उडी घेतली होती. गेल्या वर्षी मला तिथे जाऊन अभिवादन करण्याचे सौभाग्य मिळाले होते. आज भारताच्या 'गेटवे ऑफ इंडिया' असलेल्या मुंबईत मॅक्रॉन यांचे स्वागत करताना मला विशेष आनंद होत आहे."

संरक्षण आणि तंत्रज्ञानात मोठी झेप

दोन्ही देशांमधील संबंध केवळ राजनैतिक नसून ते जागतिक स्थिरता आणि विकासासाठी महत्त्वाचे असल्याचे मोदींनी नमूद केले.

• हेलिकॉप्टर निर्मिती: भारतात हेलिकॉप्टर निर्मितीच्या प्रकल्पाचे उद्घाटन ही या भागीदारीची मोठी उपलब्धी आहे. भारत आता माऊंट एव्हरेस्टपर्यंत झेप घेणारी हेलिकॉप्टर बनवणार असून त्यांची निर्यातही केली जाणार आहे.

• २०२६ चे महत्त्व: आगामी २०२६ हे वर्ष दोन्ही देशांच्या संबंधांसाठी 'टर्निंग पॉईंट' ठरेल. युरोपीय महासंघासोबतच्या 'फ्री ट्रेड ॲग्रीमेंट'मुळे (मुक्त व्यापार करार) व्यापाराला मोठी गती मिळणार आहे.

भविष्यातील सहकार्याचे मुख्य बिंदू

पंतप्रधानांनी यावेळी विविध क्षेत्रांतील सहकार्याची घोषणा केली:

1. संशोधन आणि तंत्रज्ञान: संरक्षण, क्लीन एनर्जी आणि स्पेस क्षेत्रात स्टार्टअप्सना प्रोत्साहन देण्यासाठी विशेष संशोधन केंद्रे उभारली जातील.

2. आरोग्य आणि एआय: हेल्थकेअरमध्ये आर्टिफिशियल इंटेलिजन्स (AI), डिजिटल सायन्स आणि एरोनॉटिक्सवर भर दिला जाईल.

3. सांस्कृतिक देवाणघेवाण: भारतीय संस्कृती फ्रान्समध्ये पोहचवण्यासाठी तिथे 'विवेकानंद सांस्कृतिक केंद्राची' उभारणी केली जाणार आहे.

जागतिक शांततेसाठी कटिबद्धता

"भारत आणि फ्रान्सची भागीदारी ही एक 'ग्लोबल फोर्स' आहे," असे सांगत मोदींनी युक्रेन, पश्चिम आशिया आणि इंडो-पॅसिफिक क्षेत्रात शांतता प्रस्थापित करण्याच्या भूमिकेचा पुनरुच्चार केला. तसेच, दहशतवादाचा नायनाट करण्यासाठी दोन्ही देश एकत्रितपणे काम करणार असल्याचे त्यांनी स्पष्ट केले.