वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 भाव न मिळाल्याने हताश शेतकऱ्याचा टोकाचा निर्णय; तीन एकरातील उभ्या कांदा पिकावरच फिरवला नांगर

बार्शी: कांद्याला बाजारात योग्य भाव मिळत नसल्याने सोलापूर जिल्ह्यातील बार्शी तालुक्यात एका शेतकऱ्याने टोकाचा निर्णय घेतला आहे. प्रचंड आर्थिक खर्च करून उभारलेल्या तीन एकरांतील कांदा पिकावरच त्याने ट्रॅक्टरने नांगर फिरवला. वाढता उत्पादन खर्च आणि घसरलेले बाजारभाव यामुळे हैराण झालेल्या शेतकऱ्याच्या या निर्णयामुळे परिसरात हळहळ व्यक्त केली जात आहे.

ही घटना बार्शी तालुक्यातील उंबरगे येथे घडली. संजय संदीपन देशमुख असे या हताश शेतकऱ्याचे नाव आहे.

किती आला होता उत्पादन खर्च?

देशमुख यांनी दिलेल्या माहितीनुसार, त्यांनी तीन एकर क्षेत्रावर कांदा लागवड केली होती. या पिकासाठी झालेला खर्च पुढीलप्रमाणे:

रोपांसाठी खर्च: कांदा रोपांची प्रतिकिलो ३ हजार रुपये याप्रमाणे सुमारे १० किलो रोपे खरेदी करण्यात आली. केवळ रोपांसाठी तब्बल ३० हजार रुपये खर्च झाला.

लागवड खर्च: जमिनीची तयारी आणि लागवडीसाठी सुमारे ७० हजार रुपये खर्च झाले.

फवारणी व खत खर्च: पिकासाठी आवश्यक खते आणि कीडनाशक फवारणीसाठी ३० ते ४० हजार रुपयांचा खर्च झाला.

अशाप्रकारे, केवळ तीन एकर कांदा पिकासाठी एकूण सुमारे दीड लाख रुपयांहून अधिक खर्च झाला होता. मात्र, बाजारात कांद्याला मिळणारा भाव पाहता हा खर्चही निघणे अशक्य होते.

भावच निघाला शून्य

सध्या बाजारात कांद्याला अवघा १५ ते १६ रुपये प्रतिकिलो इतका नीचांकी भाव मिळत आहे. एकरी सरासरी ८० हजार रुपयांपर्यंत पोहोचलेला उत्पादन खर्च आणि सध्याचा बाजारभाव यातील तफावत पाहता शेतकऱ्यांचे प्रचंड आर्थिक नुकसान निश्चित होते. बियाणे, खते, कीडनाशके, मजुरी, वीज व पाणी यासारख्या सर्वच बाबींवरील खर्च वाढला असताना, कांद्याच्या दरात मात्र मोठी घसरण झाली आहे.

वैतागून घेतला टोकाचा निर्णय

वाढते कर्ज, सततचा खर्च आणि हाती येत नसलेला नफा यामुळे मानसिक तणावाखाली आलेल्या देशमुख यांनी अखेर हताश होऊन उभ्या पिकावरच नांगर फिरवण्याचा निर्णय घेतला. या घटनेमुळे शेतकरी वर्गात संताप आणि हळहळ व्यक्त केली जात आहे.

शेतकऱ्यांच्या मागण्या काय?

कांदा उत्पादक शेतकरी यापूर्वीपासूनच विविध मागण्या करत आहेत. यामध्ये कांद्याला हमीभाव जाहीर करणे, निर्यात प्रक्रिया सुलभ करणे, आणि शासकीय खरेदी केंद्रे सुरू करून शेतकऱ्यांना तातडीने दिलासा देणे या मागण्यांचा समावेश आहे. बाजारभाव स्थिर मिळाला तरच शेतकऱ्यांच्या श्रमाला न्याय मिळेल, अन्यथा कांदा उत्पादकांवरील आर्थिक संकट अधिक गडद होण्याची भीती शेतकरी व्यक्त करत आहेत.