ठाकरेंच्या शिवसेनेचे ठाणे विभागप्रमुख प्रदीप पूर्णेकर यांच्यावर दोन राऊंड गोळीबार! उपचारादरम्यान पूर्णेकर यांचा मृत्यू; ठाण्यात खळबळ

  'राज्यात ७७ हजार कोटींचे नुकसान; २०.५०% पावसाची तूट'; 'नाशिक विभागात ३४.३०% तूट'; 'मराठवाड्यात ३३,७५० कोटी खर्च'; 'यवतमाळात ५,१३६ कोटींचे नुकसान'; 'पीक विम्यात भरलेल्या हप्त्याएवढेही परत मिळाले नाहीत'; पत्रकार परिषदेत जालन्याच्या शेतकऱ्याला थेट व्हिडिओ कॉल

क्रांती न्यूज (प्रतिनिधी) - सचिन मेनकुदळे

मुंबई - राष्ट्रवादी काँग्रेस शरदचंद्र पवार पक्षाचे आमदार रोहित पवार (Rohit Pawar) यांनी पत्रकार परिषद घेऊन राज्यातील शेतकरी आणि दुष्काळी परिस्थितीवरून राज्य सरकारवर जोरदार हल्लाबोल केला आहे.

"शरद पवार यांनी आमच्यासोबत आणि कार्यकर्त्यांसोबत बैठका घेऊन माहिती घेतली आहे. त्यांनी संपूर्ण राज्यभरात आढावा घेण्याचे निर्देश दिले होते," असे सांगत रोहित पवार यांनी महाराष्ट्रातील शेतीच्या नुकसानीचा सविस्तर पाढा वाचला.

आकडेवारी मांडताना रोहित पवार म्हणाले की, २७ सप्टेंबरपर्यंत राज्यात ७८३.६ मिमी पाऊस झाला असून तब्बल २०.५० टक्के पावसाची तूट नोंदवण्यात आली आहे.

नाशिक विभागात ३४.३० टक्के तूट

कोकण विभागात ९.८० टक्के तूट

नागपूर विभागात २५ टक्के तूट

शेतकऱ्यांनी पेरणीसाठी ९५ हजार ५०० कोटी रुपये खर्च केले होते आणि १ लाख २८ हजार ८६६ कोटींचे अपेक्षित उत्पादन होते. मात्र, आता हे होणार नाही.

मराठवाड्यात सोयाबीन, कापूस, तूर, मका यासाठी ३३ हजार ७५० कोटी खर्च झाले आहेत.

संपूर्ण विदर्भात २२ हजार ४५६ कोटींचे नुकसान झाले असून, एकट्या यवतमाळ जिल्ह्यात सर्वाधिक ५ हजार १३६ कोटींचे नुकसान झाले आहे.

उत्तर महाराष्ट्रात १० हजार कोटींचे आणि अहिल्यानगर जिल्ह्यात ३ हजार ५०० कोटींचे नुकसान झाले आहे.

संपूर्ण महाराष्ट्रात एकूण ७७ हजार कोटींचे नुकसान झाले आहे. "यात फळ पीक उल्लेख नाही, ऊस देखील नाही. रब्बी हंगामाचे ३५,००० कोटी रुपयांचे नुकसान झाले आहे," असे पवार म्हणाले.

"सरसकट मदत आम्ही करणार आहोत, असं मुख्यमंत्री म्हणाले आहेत. त्यामुळे आम्ही सरसकट मदत मागणार आहोत. शेतात जाऊन त्यांनी नमूद करावं, सरसकट नुकसान झालं आहे. तशा प्रकारे मदत केली पाहिजे," असे रोहित पवार म्हणाले.

"गेल्या १० वर्षांत वापरल्या जाणाऱ्या कीटकनाशकांचे दर वाढले आहेत. बियाणांच्या बाबत १७ हजार तक्रारी आहेत," असेही रोहित पवार म्हणाले.

एल निनोमुळे पावसात मोठा खंड पडेल असा अंदाज असतानाही जुलैमध्ये झालेल्या पावसामुळे सरकार गाफील राहिले, असा आरोप त्यांनी केला.

सरकारने दुष्काळाच्या नावाने जाहीर केलेल्या सवलतींवर आक्षेप घेताना ते म्हणाले:

जमीन महसुलात सूट – एका शेतकऱ्याचा फक्त ४०० ते ५०० रु फायदा

पीक कर्जाचे पुनर्गठन – पण शेतकऱ्यांना कर्जमाफी हवीय

शेतीशी निगडित कर्जाच्या वसुलीला स्थगिती

कृषीपंपाच्या चालू वीजबिलात सूट

शालेय/महाविद्यालयीन विद्यार्थ्यांना परीक्षा शुल्कात माफी – ३० कोटी (पण मागणी – महाविद्यालयीन फी पूर्ण माफ करावी)

रोजगार हमी योजनेत नियमात शिथिलता (पण आकडेवारी किती? अशक्य आहे)

रोजगारावर आश्रित शेतकरी/शेतमजूर यांना अन्नधान्य पुरवणार (पण मागणी – २५,००० रु मदत हवी)

जनावरांच्या चाऱ्याची व्यवस्था करणार

जलसंधारणाची कामे मोठ्या प्रमाणात हाती घेणार

SDRFच्या नियमांनुसार जिरायतीसाठी हेक्टरी ८,५०० रुपये (जास्तीत जास्त १७,००० रुपये) देऊन शेतकऱ्यांचे भागणार का? एकरी ५० ते ६० हजार खर्च झाला असताना हेक्टरी किमान ५० हजार रुपयांची थेट मदत द्यावी, अशी मागणी त्यांनी केली.

"दुष्काळ जाहीर करून फक्त ८,५०० देऊन उपयोग नाही, शेतकऱ्याला हेक्टरी किमान ५० हजाराची थेट मदत द्या आणि गेल्या वर्षीसारखं फसवू नका," असेही रोहित पवार म्हणाले.

पत्रकार परिषदेदरम्यान रोहित पवार यांनी जालन्यातील एका शेतकऱ्याला थेट व्हिडिओ कॉल (Video Call) केला.

या संवादात शेतकऱ्याने व्यथा मांडताना सांगितले की, "आम्हाला पीक विम्याचे पैसे मिळालेले नाहीत. चौकशी केली असता पीक विमा बंद झाल्याचे सांगण्यात आले आणि यावर्षी कोणताही अधिकारी नुकसानीची पाहणी करायला आला नाही."

रोहित पवार यांनी स्पष्ट केले की, शेतकरी, केंद्र आणि राज्य सरकारने मिळून विमा कंपन्यांना २,३९४ कोटींचा हप्ता भरला.

मात्र, शेतकऱ्यांना नुकसान भरपाई म्हणून फक्त १,९३८ कोटी रुपये परत मिळाले. म्हणजेच भरलेल्या हप्त्याएवढे सुद्धा पैसे परत आले नाहीत.

हेक्टरी केवळ ४,३०६ रुपये मिळाले, तर मागणी १७ हजार रुपयांची होती.

तसेच, कृषी समृद्धी योजनेचे मागील ३ वर्षांचे १५ हजार कोटी रुपये दिलेले नाहीत, असा आरोपही त्यांनी केला.

तर मुख्यमंत्री फडणवीसांनी ३१,६२८ कोटींचा अंदाज जरी धरला तरी त्यातले फक्त २५ टक्केच पैसे शेतकऱ्यांपर्यंत पोहोचले, असे देखील त्यांनी सांगितले.

| मुद्दा | तपशील |

| पावसाची तूट | २०.५०% (२७ सप्टेंबरपर्यंत) |

| नाशिक विभाग | ३४.३०% तूट |

| नागपूर विभाग | २५% तूट |

| एकूण नुकसान | ७७ हजार कोटी |

| मराठवाडा | ३३,७५० कोटी खर्च |

| विदर्भ | २२,४५६ कोटी नुकसान |

| यवतमाळ | ५,१३६ कोटी |

| रब्बी | ३५,००० कोटी नुकसान |

| पीक विमा | भरलेले २,३९४ कोटी; परत १,९३८ कोटी |

| मागणी | हेक्टरी किमान ५० हजार थेट मदत |