पाईप चोरी प्रकरणी माळशिरस पोलिसांकडून ट्रॅक्टर जप्त, पालिकेकडुन ना दाद, ना फिर्याद दाखल नसल्याने पाईपसह माळशिरस ठाण्यातून ट्रॅक्टर गायब

'इंजेक्शन दिल्या दिल्या बेशुद्ध पडली; नातेवाईकांना आत सोडलं नाही; तीन तास फसवलं; वाशीला नेल्यानंतर डॉक्टरांनी सोनम आणि बाळाला मृत घोषित केले'; मनसे-शिवसेनेचा आंदोलनाचा इशारा

क्रांती न्यूज (प्रतिनिधी) - सचिन मेनकुदळे

नवी मुंबई : नवी मुंबईतील ऐरोलीच्या शासकीय रुग्णालयात (राजमाता जिजाऊ रुग्णालय) निष्काळजीपणामुळे एका गर्भवती महिलेचा (pregnant women) मृत्यू झाला आहे, तर दुसऱ्या गर्भवती महिलेची प्रकृती गंभीर आहे. या घटनेने नवी मुंबईकरांना हादरवून सोडले आहे. इंजेक्शनच्या चुकीच्या डोसमुळे ही गंभीर परिस्थिती निर्माण झाल्याचा आरोप करण्यात आला आहे. मृत गर्भवती सोनम डोंगरे (Sonam Dongre) यांचे पती करण डोंगरे (Karan Dongre) यांनी हृदयद्रावक व्यथा मांडली आहे. त्यांनी प्रशासनावर तीन तास खोटे बोलून त्यांना फसवल्याचा आरोप केला आहे.

सोनम डोंगरे या आठ महिन्यांच्या गर्भवती होत्या. प्रसूतीसाठी त्यांना ऐरोलीच्या राजमाता जिजाऊ रुग्णालयात दाखल करण्यात आले होते. उपचारादरम्यान डॉक्टरांनी त्यांना काही इंजेक्शन दिले. मात्र, या इंजेक्शनचा चुकीचा डोस असल्याचा आरोप आहे. इंजेक्शन दिल्यानंतर सोनमची तब्येत अचानक बिघडली आणि ती बेशुद्ध पडली.

करण डोंगरे यांनी सांगितले, "एकच्या सुमारास माझ्या बायकोला इंजेक्शन दिलं. इंजेक्शन दिल्या दिल्या ती जागेवरच बेशुद्ध पडली. त्यांनी आम्हाला फक्त बाहेर येऊन सांगितले की, तुमची बायको बेशुद्ध पडली. आम्ही सैरभर झालो होतो. आतमध्ये येण्याचा पूर्ण प्रयत्न करत होतो, पण त्यांनी आम्हाला अजिबात आतमध्ये सोडलं नाही."

"ते म्हणाले, 'नॉर्मल डिलिव्हरीमध्ये असं होतंच असतं. एका-दोन पेशंटना होतंच हे. हे नॉर्मल आहे, तुम्ही काळजी करायचं कारण नाही.' असे बोलून त्यांनी आम्हाला तीन तास तिथेच थांबवून ठेवले. माझ्या बायकोला त्यांनी आतमध्ये काय ट्रीटमेंट दिली, मला काहीच खबर नाही. मी त्यांना वारंवार सांगत होतो की, मी तिला दुसरीकडे हलवतो. पण त्यांनी मला अजिबात रिस्पॉन्स दिला नाही, उडवाउडवीची उत्तरे दिली," अशी व्यथा करण डोंगरे यांनी मांडली.

तीन तासांचा मौल्यवान वेळ वाया घालवल्यानंतर, ऐरोलीतील डॉक्टरांनी सोनमला वाशी येथील मनपा संदर्भ रुग्णालयात हलवण्याचा सल्ला दिला. वाशीत पोहोचल्यानंतर तेथील डॉक्टरांनी काही वेळातच सोनम आणि तिच्या पोटातील बाळाला मृत घोषित केले. करण डोंगरे यांनी आरोप केला, "ऐरोलीतील डॉक्टरांच्या निष्काळजीपणामुळेच माझे कुटुंब उद्ध्वस्त झाले आहे."

ऐरोली रुग्णालयातच रिचा मिश्रा (Richa Mishra) या दुसऱ्या गर्भवती महिलेलाही असाच चुकीचा डोस देण्यात आल्याचा आरोप आहे. तिची प्रकृती गंभीर असून, ती सध्या व्हेंटिलेटरवर आहे. तिच्यावर वाशी येथील रुग्णालयात उपचार सुरू आहेत.

सोनम डोंगरे यांचे पार्थिव ताब्यात घेण्यास नातेवाईकांनी नकार दिला आहे. त्यांनी पोस्टमार्टम पालिका रुग्णालयात न करता मुंबईतील रुग्णालयात करण्याची मागणी केली आहे. तसेच, चुकीचा डोस दिल्यामुळे सोनम आणि तिच्या बाळाचा मृत्यू झाल्याने डॉक्टरांवर डबल मर्डर केस लावण्याची मागणी नातेवाईक आणि स्थानिक राजकीय पक्षांकडून केली जात आहे.

या घटनेनंतर शिवसेना आणि मनसे यांनी महापालिका रुग्णालय प्रशासनाविरोधात तीव्र आंदोलनाचा इशारा दिला आहे.

मनसे चे नेते गजानन काळे (Gajanan Kale) यांनी तीव्र शब्दांत प्रतिक्रिया दिली. ते म्हणाले, "नवी मुंबईकरांच्या आरोग्याशी तडजोड अजिबात सहन केली जाणार नाही. न्याय मिळालाच पाहिजे. अन्यथा मनसे आरोग्य विभागाच्या अधिकाऱ्यांच्या कार्यालयाची एकही काच शाबूत ठेवणार नाही."

काळे यांनी पुढे म्हटले, "अतिशय संतापजनक घटना आहे. ऐरोली येथील राजमाता जिजाऊ रुग्णालयातील कथित निष्काळजीपणामुळे ८ महिन्यांच्या गर्भवती सोनम डोंगरे यांचा दुर्दैवी मृत्यू झाला. तसेच दुसऱ्या गर्भवती रिचा मिश्रा यांची प्रकृती गंभीर आहे. इंजेक्शनच्या दुष्परिणामामुळे ही गंभीर परिस्थिती निर्माण झाल्याचा आरोप आहे. या दाव्यांची सखोल आणि निष्पक्ष चौकशी होणे अत्यावश्यक आहे."

"गेली अनेक वर्षे नवी मुंबईकरांना अत्याधुनिक आरोग्य सुविधा उपलब्ध करून दिल्याचे दावे केले जात आहेत. मात्र, जर अशा प्रकारच्या घटना घडत असतील, तर त्याची जबाबदारी कोणाची, याचे उत्तर नवी मुंबईकरांना मिळालंच पाहिजे. या संपूर्ण प्रकरणाची उच्चस्तरीय, निष्पक्ष तपासणी व्हावी," अशी मागणी काळे यांनी केली.

या घटनेनंतर महापालिका रुग्णालय प्रशासनाकडून अद्याप कोणतीही अधिकृत प्रतिक्रिया आलेली नाही. मात्र, या प्रकरणाची चौकशी होणार असल्याचे संकेत देण्यात आले आहेत. पीडित कुटुंबीयांनी न्याय मिळेपर्यंत आंदोलन सुरू ठेवण्याचा निर्धार व्यक्त केला आहे.

ऐरोली मनपा रुग्णालयातील कथित निष्काळजीपणामुळे एका गर्भवती महिलेचा मृत्यू झाला आहे, तर दुसरी गंभीर अवस्थेत आहे. मृत सोनम डोंगरे यांच्या पतीने तीन तास खोटे बोलून फसवल्याचा आरोप केला आहे. नातेवाईकांनी डबल मर्डर केस लावण्याची मागणी केली आहे. तसेच, शिवसेना आणि मनसे ने आंदोलनाचा इशारा दिला आहे. या घटनेने नवी मुंबईकरांमध्ये प्रशासनावर संताप व्यक्त केला जात आहे. आता प्रशासनाकडून या प्रकरणाची निष्पक्ष चौकशी होणे आणि दोषींना शिक्षा करणे, हीच सर्वांची अपेक्षा आहे.