पाईप चोरी प्रकरणी माळशिरस पोलिसांकडून ट्रॅक्टर जप्त, पालिकेकडुन ना दाद, ना फिर्याद दाखल नसल्याने पाईपसह माळशिरस ठाण्यातून ट्रॅक्टर गायब

साकीनाक्यात उघड्या मॅनहोलमध्ये ६० वर्षीय व्यक्तीचा मृत्यू; काम सुरू असताना झाकण नव्हते, बॅरिकेटिंगही नाही; राजकीय नेत्यांनी व्यक्त केला संताप; विधानसभा अध्यक्षांची 'सदोष मनुष्यवधा'ची कारवाई करण्याची मागणी

क्रांती न्यूज (प्रतिनिधी) -  किरण देशमुख

मुंबई   मुंबईत मुसळधार पावसाचा कहर सुरू असतानाच साकीनाका परिसरातून एक अत्यंत हृदयद्रावक घटना समोर आली आहे. खैरानी रोडवर उघड्या मॅनहोलमध्ये एक ६० वर्षीय व्यक्ती पडली आणि तिचा दुर्दैवी मृत्यू झाला. मोबाईलवर बोलत चालत असताना पावसाच्या पाण्यात लपलेल्या या उघड्या मॅनहोलची त्याला चुकूनही कल्पना आली नाही. मॅनहोलजवळ कोणतीही बॅरिकेटिंग किंवा इशारा नसल्याने ही दुर्घटना घडली. घटनेची माहिती मिळताच अग्निशमन दल, पोलीस आणि रुग्णवाहिका घटनास्थळी दाखल झाली. साडेतीन तासांच्या अथक प्रयत्नानंतर मृतदेह बाहेर काढण्यात आला.

ही दुर्घटना गुरुवारी, दुपारी १२.२६ वाजता घडली. साकीनाका येथील खैरानी रोडवरील सन्मान हॉटेलजवळ मोबाईलवर बोलत चालत असताना अस्लम इसाक शेख (वय ६०) हे उघड्या मॅनहोलमध्ये पडले. या ठिकाणी खासगी कंत्राटदाराकडून पावसाच्या पाण्याच्या ग्रिलची दुरुस्ती (मेन्टेनन्स) सुरू होती. त्यामुळे मॅनहोलचे झाकण काढून ठेवले होते.

या भागात सकाळपासूनच मुसळधार पाऊस सुरू होता. रस्त्यावर पाणी साचल्याने उघडा मॅनहोल दिसत नव्हता. पाण्याचा अंदाज न आल्याने ते थेट मॅनहोलमध्ये पडले. हा मॅनहोल साधारण २० ते २५ फूट खोल होता.

घटनेची माहिती मिळताच मुंबई अग्निशमन दल (MFB) , पोलीस आणि १०८ रुग्णवाहिका घटनास्थळी दाखल झाली. मॅनहोलजवळ फक्त त्यांची छत्री आणि चप्पल आढळली. आतमध्ये पाण्याचा प्रवाह खूप वेगवान होता. त्यामुळे ते पाण्यासोबत वाहून गेले होते. पोलिसांनी शोधमोहीम सुरू केली. साडेतीन तासांच्या प्रयत्नानंतर त्यांचा मृतदेह दुसऱ्या मॅनहोलमध्ये सापडला.

ही दुसरी घटना नसून, काही आठवड्यांपूर्वी मुंबईच्या महापौर रितू तावडे यांच्या पाहणीदरम्यानच एक पालिका कर्मचारी उघड्या मॅनहोलमध्ये पडला होता. त्या घटनेनंतरही मॅनहोलच्या सुरक्षेविषयी कोणतीही ठोस कारवाई झाली नाही, ही बाब अधिक चिंताजनक आहे.

या घटनेने मुंबईकरांमध्ये संताप पसरला आहे. स्थानिक लोकांचा प्रश्न आहे की, 'पावसासारखा पैसा खर्च करूनही सामान्य नागरिकांचे प्राण धोक्यात का?' सुरक्षेच्या दृष्टीने कोणतीही तरतूद नसल्याने सर्वसामान्य नागरिकांचा जीव धोक्यात येतो, हे या घटनेने अधोरेखित केले आहे.

स्थानिक आमदार दिलीप लांडे यांनी या घटनेची माहिती देताना मृतदेह सापडल्याची पुष्टी केली. त्यांनी सांगितले की, घटनास्थळी सुरक्षेचे कोणतेही उपाय नव्हते. खासगी कंत्राटदाराकडून काम सुरू होते, परंतु मॅनहोल उघडा ठेवण्यात आला होता.

विधानसभा अध्यक्ष राहुल नार्वेकर यांनी या घटनेला 'नागरिक जबाबदारीतील गंभीर अपयश' म्हटले आहे. त्यांनी मॅनहोलमुळे होणाऱ्या मृत्यूंसाठी जबाबदार अधिकाऱ्यांवर 'सदोष मनुष्यवधा' (Culpable Homicide) ची कारवाई करण्याची मागणी केली. त्यांनी स्पष्ट केले की, केवळ विभागीय कारवाई पुरेशी नाही. जबाबदार व्यक्तींना वैयक्तिकरीत्या जबाबदार धरले पाहिजे.

त्याच दिवशी, दहिसर पोलिसांनी पावसाच्या पाण्यात अडकलेल्या एका व्यक्तीची सुटका केली. पोलिसांनी तत्परता दाखवत लोखंडी जाळी कापून त्याला बाहेर काढले आणि कुटुंबीयांपर्यंत पोहोचवले.

बांधकाम काम सुरू असताना बॅरिकेटिंग आणि चेतावणी फलक नसल्याने ही दुर्घटना घडली, असा आरोप होत आहे. मुंबईतील अशा अनेक मॅनहोलची अवस्था चिंताजनक आहे. सरकार आणि महापालिका प्रशासनाने 'मॅनहोल सुरक्षा धोरण' काटेकोरपणे लागू करण्याची गरज आहे. दरवर्षी पावसाळ्यात अशा घटना घडतात, परंतु प्रशासनाकडून गंभीर दखल घेतली जात नाही.

मुंबईतील साकीनाका मॅनहोल दुर्घटना ही पुन्हा एकदा प्रशासकीय हलगर्जीपणाची शोकांतिका आहे. ६० वर्षीय अस्लम शेख यांचा मृत्यू हा 'उघड्या मॅनहोल'मुळे झाला. बॅरिकेटिंग किंवा इशारा नसल्याने पावसाच्या पाण्यात लपलेल्या या मॅनहोलची त्यांना कल्पना आली नाही. विधानसभा अध्यक्षांनी 'सदोष मनुष्यवधा' ची कारवाई करण्याची मागणी केली आहे. आता पाहावयाचे आहे की, ही दुर्घटना नेमकी का घडली आणि जबाबदार अधिकाऱ्यांवर काय कारवाई होते? तसेच, भविष्यात अशा घटना टाळण्यासाठी प्रशासन काय काय उपाययोजना करते, हे पाहणे महत्त्वाचे आहे.