म्हसवड पालिकेच्या स्वीकृत नगरसेवक निवडी का रखडल्या; शेखर गोरेंची पुन्हा निराशा होणार का?

शिवसेना उबाठामध्ये पुन्हा मोठा भूकंप; ओमराजे निंबाळकरांसह सहा खासदार शिंदे गटात; स्पीकरांना पत्र देऊन केली जाणार बाजी

क्रांती न्यूज (प्रतिनिधी) -  किरण देशमुख

दिल्ली / मुंबई : शिवसेना (उद्धव बाळासाहेब ठाकरे) पक्षाच्या राजकीय वर्तुळात पुन्हा एकदा मोठा भूकंप झाला आहे. गेल्या काही दिवसांपासून चर्चेत असलेल्या 'ऑपरेशन टायगर'ला आज (बुधवारी, १७ जून) शिक्कामोर्तब झाल्याची माहिती समोर आली आहे. ठाकरे गटाचे सहा खासदार आपल्या सह्यांचे पत्र घेऊन लोकसभा अध्यक्ष ओम बिर्ला यांची भेट घेणार असून, ही सगळी प्रक्रिया दुपारी एक वाजेपर्यंत पूर्ण करण्यात येणार आहे.

 ६ खासदार दिल्लीत; लोकसभा अध्यक्षांना भेटणार

शिवसेनेतील वरिष्ठ सूत्रांनी दिलेल्या माहितीनुसार, ठाकरे गटाचे संजय जाधव, संजय देशमुख, नागेश पाटील आष्टीकर, ओमराजे निंबाळकर, भाऊसाहेब वाकचौरे आणि संजय दिना पाटील हे सहा खासदार दिल्लीत दाखल झाले आहेत. हे सर्व खासदार लोकसभा अध्यक्षांना भेटून स्वतंत्र गट म्हणून मान्यता मागणार आहेत.

सहा खासदारांच्या या गटाने आपल्या सह्यांचे पत्र सोबत घेतले असून, दुपारी १ वाजेपर्यंत ही प्रक्रिया पूर्ण करण्याचा मानस आहे. काही कायदेशीर सल्ले आणि तांत्रिक अडचणी दूर करून पुढची प्रक्रिया केली जाणार असल्याची माहिती आहे.

 एनडीए बैठकीनंतर ऑपरेशन टायगरला वेग

एनडीएच्या बैठकीनंतर ऑपरेशन टायगरवर शिक्कामोर्तब झाल्याची माहिती समोर आली आहे. १० जून रोजी दिल्लीतील एका पंचतारांकित हॉटेलमध्ये ठाकरे गटाच्या खासदारांनी उपमुख्यमंत्री एकनाथ शिंदे यांची भेट घेतली होती. रात्री ११ वाजता एकनाथ शिंदे यांच्या उपस्थितीत पार पडलेल्या बैठकीला ओमराजे निंबाळकर देखील दिल्लीत उपस्थित होते.

आता खासदार श्रीकांत शिंदे यांच्या शासकीय निवासस्थानी बैठक नियोजित होती. मात्र, त्या ठिकाणी हे खासदार एकत्र न येता त्यांनी दिल्लीतच एका ठिकाणी एकनाथ शिंदे यांची भेट घेतल्याची माहिती आहे.

ठाकरे गटाचा शेवटचा प्रयत्न; खासदारांना व्हिप

दुसरीकडे, उद्धव ठाकरे यांनी ही फोडाफोडी थांबवण्यासाठी शेवटचा प्रयत्न केला आहे. सर्व खासदारांना व्हिप जारी करून १८ जून रोजी दिल्लीत बैठक बोलावण्यात आली आहे. तसेच, शिवसेना (उबाठा) चे खासदार अरविंद सावंत यांनी लोकसभा अध्यक्षांना पत्र लिहून कोणत्याही फुटीर गटाला मान्यता देऊ नये, अशी विनंती केली आहे.

सावंत यांनी आपल्या पत्रात म्हटले आहे की, "शिवसेना (उद्धव बाळासाहेब ठाकरे) हा लोकसभेत एकच राजकीय पक्ष म्हणून ओळखला जावा. कोणत्याही फुटीर गटाला स्वतंत्र मान्यता, दर्जा किंवा सुविधा देऊ नये." त्यांनी दहाव्या अनुसूचीचा (विरोधी पक्ष बदल कायदा) हवाला देत सांगितले की, दहाव्या अनुसूचीतील कलम ३ काढून टाकल्यानंतर 'फुट' या संकल्पनेला कायदेशीर अस्तित्व नाही. आता फक्त 'विलीनीकरण' शक्य आहे, ज्यासाठी मूळ पक्षाचे विलीनीकरण आवश्यक आहे.

 काय आहे 'ऑपरेशन टायगर'?

'ऑपरेशन टायगर' ही शिवसेना (एकनाथ शिंदे गट) ची मोहीम आहे, ज्याच्या माध्यमातून उद्धव ठाकरे यांच्या शिवसेनेतील खासदारांना आपल्यात सामील करून घेण्याचा प्रयत्न केला जात आहे.

सहा खासदार फुटल्यास बाजी कशी मारली जाईल?  

शिवसेना (उबाठा) कडे लोकसभेत ९ खासदार आहेत. विरोधी पक्ष बदल कायद्यानुसार, पक्ष फुटण्यासाठी दोन-तृतीयांश (म्हणजे ६) खासदारांची आवश्यकता असते. त्यामुळे सहा खासदार फुटले की, शिंदे गट ही फोडाफोडी कायदेशीररीत्या साध्य करू शकतो.

 शिंदे गटात जाणाऱ्या खासदारांची यादी

 शिवसेना (उबाठा) चे ९ खासदार:

१. अनिल देसाई

२. अरविंद सावंत

३. संजय दिना पाटील

४. राजाभाऊ वाजे

५. संजय जाधव

६. संजय देशमुख

७. नागेश पाटील आष्टीकर

८. ओमराजे निंबाळकर

९. भाऊसाहेब वाकचौरे

 शिंदे गटात जाणारे ६ खासदार:

१. संजय जाधव (परभणी)

२. संजय देशमुख (यवतमाळ-वाशिम)

३. नागेश पाटील आष्टीकर (हिंगोली)

४. ओमराजे निंबाळकर (धाराशिव)

५. भाऊसाहेब वाकचौरे (शिर्डी)

६. संजय दिना पाटील (मुंबई उत्तर-पूर्व)

 संजय राऊत यांची प्रतिक्रिया: 'पैसा, पैसा आणि पैसा!'

ठाकरे गटाचे राज्यसभा खासदार संजय राऊत यांनी या घडामोडींवर तीव्र प्रतिक्रिया दिली आहे. त्यांनी एक्स (ट्विटर) वर पोस्ट करत म्हटले आहे, "पैसा, पैसा... सगळं पैसा! हे ऐकून धक्का बसला की महाराष्ट्राच्या खासदारांना आज रात्री १५ कोटी रुपये देऊ केले जात आहेत."

राऊत यांनी ठाकरेंचे खासदार कधीही फुटणार नाहीत, असा दावाही केला होता. मात्र, आता सहा खासदारांच्या हालचालींमुळे त्यांचा दावा खोटा ठरताना दिसत आहे. काही दिवसांपूर्वीच राऊत म्हणाले होते की, "आमचे सर्व खासदार एकत्र आहेत. त्यांनी उद्धव ठाकरेंना शपथ घेतली आहे." आता मात्र, तीच शपथ मोडली जात असल्याची चिन्हे आहेत.

२२ जूनची बैठक आणि पुढील घडामोडी

उद्धव ठाकरे यांनी २२ जून रोजी विधानसभा-विधानपरिषदेतील सर्व आमदार-खासदारांची बैठक बोलावली आहे. या बैठकीत आपल्याकडे उरलेले खासदार आणि आमदार एकत्र येणार की आणखी फोडाफोडी होणार, याकडे सर्वांचे लक्ष असेल.

दरम्यान, शिंदे गटाचे नेते कृपाल तुमाने यांनी दावा केला होता की, 'ऑपरेशन टायगर' अंतिम टप्प्यात आली असून १९ जूनपर्यंत ही प्रक्रिया पूर्ण होईल. आजच्या घडामोडींनंतर हा दावा खरा ठरताना दिसत आहे.

 ठाकरे गटाला मोठा धक्का

शिवसेना (उबाठा) मधील सहा खासदारांची ही फोडाफोडी ही उद्धव ठाकरे यांच्यासाठी मोठा धक्का आहे. २०२२ मध्ये एकनाथ शिंदे यांनी केलेल्या बंडानंतर ही दुसरी मोठी फोडाफोडी आहे. लोकसभेत शिवसेनेचे संख्याबळ कमी होईल, तर शिंदे गट अधिक मजबूत होईल. आता ही प्रक्रिया कायदेशीररीत्या कशी पूर्ण होते, लोकसभा अध्यक्ष काय निर्णय घेतात आणि उद्धव ठाकरे पुढे काय रणनीती आखतात, याकडे संपूर्ण महाराष्ट्राचे लक्ष लागले आहे.