विधान परिषदेसाठी सोलापूरच्या नेत्यांच्या जोर बैठका; राजेंद्र राऊत, राजन पाटील, राम सातपुते यांची चढाओढ, मुख्यमंत्री आणि पालकमंत्र्यांच्या संमतीनेच एकालाच संधी?

 “आजपर्यंत प्रचार दादांचा असायचा, आता आपला नेता दिसणार नाही” — रोहित पवारांचे भावनिक आवाहन; “पुरोगामीपणाचा खेळ मांडला, सत्तेच्या जोरावरती, कधी भावनेच्या लाटेवरती” — सदाभाऊ खोतांचा रोहित पवारांवर हल्लाबोल; बारामती पोटनिवडणुकीत महायुती विरुद्ध शरद पवार गटाचा रणकंदन तीव्र

बारामती: बारामती विधानसभा पोटनिवडणुकीचे (Baramati By Election 2026) रणशिंग फुंकले गेले असून, राजकीय आरोप-प्रत्यारोपांच्या फैरी झाडण्यास सुरुवात झाली आहे. उपमुख्यमंत्री सुनेत्रा पवार (Sunetra Pawar) या निवडणुकीच्या रिंगणात असून, त्यांच्या प्रचारासाठी शरद पवार गटाचे आमदार रोहित पवार (Rohit Pawar) मैदानात उतरल्याने सर्वांच्या भुवया उंचावल्या आहेत. याच मुद्द्यावरून आता आमदार सदाभाऊ खोत (Sadabhau Khot) यांनी रोहित पवारांवर (Rohit Pawar) सडकून टीका केली आहे.

रोहित पवार यांनी सुनेत्रा पवार यांच्या प्रचारासाठी ‘घोंगडी बैठका’ घेण्यास सुरुवात केली आहे. विशेष म्हणजे, अजित पवार यांचे गाव असलेल्या काटेवाडीतून या मोहिमेचा शुभारंभ करण्यात आला. यावेळी रोहित पवार यांचे वडील राजेंद्र पवार आणि भगिनी सई पवार देखील उपस्थित होत्या.

 सदाभाऊ खोतांचा ‘पुरोगामी’ टीकेचा बाण

रोहित पवारांच्या या भूमिकेवर सदाभाऊ खोत यांनी ‘एक्स’ या सोशल मीडिया प्लॅटफॉर्मवर पोस्ट करत कडाडून टीका केली. “खेळ मांडला खेळ मांडला..! पुरोगामीपणाचा खेळ मांडला..!! सत्तेच्या सारीपाटावर स्वयंघोषित पुरोगामी धृतराष्ट्र बनला..! पुरोगाम्यांनो, आम्ही पुरोगामीपणाचा खेळ मांडीला! सत्तेच्या जोरावरती, कधी भावनेच्या लाटेवरती, कधी जातीवादाच्या नावावरती पुरोगामीपणाचा खेळ मांडला,” असे म्हणत त्यांनी रोहित पवार यांच्यावर हल्लाबोल केलाय.

 रोहित पवार काय म्हणाले?

रोहित पवार यांनी प्रचारावेळी म्हटले होते की, “आजपर्यंत प्रचार असेल तर तो साहेबांचा असायचा, दादांचा असायचा. मी लहान असताना मी अजितदादांच्या प्रचारासाठी सायकल रॅली काढली होती. दादांनी मला जिल्हा परिषदला तिकीट दिलं होतं. त्यावेळी दादा निर्णय घेत होते. मी इथून उभा राहिलो होतो. आज पवार साहेबांमुळे हा परिवार आहे, पण नंतरच्या काळात अनेक नेते आहेत, महाराष्ट्रात जे अजितदादांमुळे आहेत, आल्या आल्या अजित दादांच्या फोटोला हात जोडावे लागतील असं स्वप्नात वाटलं नव्हतं. आता आपला नेता पुन्हा दिसणार नाही. मी दुसऱ्या पक्षात असलो तरी दादांचा मी फॅन होतो, ते माझे काका होते. ही निवडणूक बिनविरोध होण्यासाठी पवार साहेबांपासून अनेकांनी प्रयत्न केले. मोठ्या पक्षांनी उमेदवार दिला नाही. पण अपक्ष उमेदवार आहेत त्यांनी उभा राहायला नको होतं, आपल्या गावातून एक सुद्धा मत अपक्ष उमेदवारांना होणार नाही याचा प्रयत्न आपण सर्वांनी करावा. सर्व ९९ टक्के मतदान सुनेत्रा पवारांना होईल यासाठी प्रयत्न करा.”

 संजय राऊत यांचे पूर्वीचे वक्तव्य

यापूर्वी शिवसेना (उद्धव बाळासाहेब ठाकरे) गटाचे खासदार संजय राऊत यांनीही सुनेत्रा पवार यांच्या प्रचारातील शरद पवार फोटो हटवण्यावरून जोरदार टीका केली होती. “पवार म्हणजे शरद पवार, दुसरा कोणीही नाही”, “अजितदादांना मुख्यमंत्री होता आलं नाही, पण सुनेत्राताईंना भाजप मुख्यमंत्री करणार असेल तर हा मोठेपणा” अशा शब्दांत राऊत यांनी महायुतीला टोला लगावला होता.

 बारामती पोटनिवडणुकीची पार्श्वभूमी

बारामती विधानसभा मतदारसंघाच्या पोटनिवडणुकीसाठी महायुतीकडून सुनेत्रा पवार यांना उमेदवारी देण्यात आली आहे. प्रचाराच्या सुरुवातीला सुनेत्रा पवार यांच्या सोशल मीडियावरील पोस्टमध्ये शरद पवार यांचा फोटो टाकण्यात आला होता. मात्र, लगेचच तो फोटो हटवण्यात आला. यावरून राजकीय चर्चा रंगल्या. रोहित पवार यांच्या घोंगडी बैठका आणि सदाभाऊ खोत यांची टीका यामुळे बारामती पोटनिवडणुकीचा रंग अधिक तीव्र झाला आहे.

निवडणूक कार्यक्रम

 निवडणुकीची अधिसूचना जारी : ३० मार्च २०२६  

उमेदवारी अर्ज दाखल करण्याची मुदत : ६ एप्रिल २०२६  

 अर्जांची छाननी : ७ एप्रिल २०२६  

 अर्ज मागे घेण्याची मुदत : ९ एप्रिल २०२६  

 मतदानाची तारीख : २३ एप्रिल २०२६  

 मतमोजणी : ४ मे २०२६  

 निवडणूक प्रक्रिया पूर्ण करण्याची तारीख : ६ मे २०२६  

राजकीय विश्लेषण

रोहित पवार यांच्या प्रचारात सहभाग आणि सदाभाऊ खोत यांची टीका यामुळे महायुती आणि शरद पवार गट यांच्यातील संघर्ष अधिक तीव्र होत असल्याचे दिसत आहे. रोहित पवार यांनी अजित पवार यांच्या योगदानाची आठवण करून दिली, तर सदाभाऊ खोत यांनी ‘पुरोगामीपणाचा खेळ’ असा आरोप करत रोहित पवार यांना लक्ष्य केले. बारामती पोटनिवडणुकीत हा वाद निवडणुकीच्या रणांगणात मोठा मुद्दा ठरण्याची शक्यता आहे.