विधान परिषदेसाठी सोलापूरच्या नेत्यांच्या जोर बैठका; राजेंद्र राऊत, राजन पाटील, राम सातपुते यांची चढाओढ, मुख्यमंत्री आणि पालकमंत्र्यांच्या संमतीनेच एकालाच संधी?

 “भगीरथाने गंगा आणली, भालके विकासाची गंगा आणतील” — शिंदेंचे स्वागत; “ऑपरेशन टायगर वगैरे काही नाही, बाळासाहेबांच्या विचारांमुळे नेते येत आहेत” — शिंदेंचा टोला; काका-पुतण्याचे राजकारण संपले, शिवसेनेत एकदिलाने काम — शिंदेंचे विधान; पंढरपूर, मंगळवेढा, माढा परिसरात शिवसेना मजबूत होणार

पंढरपूर: शिवसेनेत (शिंदे गट) जोरदार इनकमिंग सुरू असल्याचे चित्र समोर आले आहे. पंढरपूर येथे आज उपमुख्यमंत्री आणि शिवसेना नेते एकनाथ शिंदे यांच्या उपस्थितीत तीन बड्या नेत्यांचा पक्षप्रवेश झाला. भगीरथ भालके, त्यांच्या पत्नी आणि पंढरपूर नगराध्यक्षा डॉ. सौ. प्रणिता भालके तसेच आमदार तानाजी सावंत यांचे पुतणे अनिल सावंत यांच्यासह शेकडो पदाधिकाऱ्यांनी भगवा झेंडा हाती घेत शिवसेनेत जाहीर प्रवेश केला. यामुळे पंढरपूर, मंगळवेढा आणि माढा परिसरात शिवसेनेची ताकद वाढल्याचे स्पष्ट संकेत मिळाले आहेत.

शिंदेंचे स्वागत आणि विकासाची गंगा

पक्षप्रवेश कार्यक्रमात एकनाथ शिंदे यांनी भगीरथ भालके यांचे विशेष स्वागत केले. ते म्हणाले, “जशी भगीरथाने गंगा पृथ्वीवर आणली, तसेच भगीरथ भालके हे पंढरपूरात विकासाची गंगा नक्की आणतील. त्यांच्या प्रवेशामुळे पंढरपूर, मंगळवेढा आणि माढा परिसरात शिवसेनेची ताकद वाढणार आहे.” शिंदे यांनी भालके यांच्या खांद्यावरचा भगवा झेंडा हा फक्त शिवसेनेचा नसून तो भागवत धर्माचा, प्रभू श्रीरामांचा आणि छत्रपती शिवाजी महाराज यांच्या परंपरेचा असल्याचे नमूद केले.

 शहाजी बापूंचा तानाजी सावंतांना सल्ला

कार्यक्रमात शिवसेनेचे माजी आमदार शहाजी बापू पाटील यांनी तानाजी सावंत यांना स्पष्ट सल्ला दिला. ते म्हणाले, “तानाजी सावंत सर, धाराशिव तुमची सासुरवाडी आहे. सोलापूर तुमचे माहेर आहे. माहेर इथे आहे. आई-वडिलांचे प्रेम इथे आहे. सोलापुरातही थोडे लक्ष द्या. सोलापुरात लक्ष दिले तर चार-पाच आमदार शिवसेनेचे निवडून येतील.” शहाजी बापू पाटलांनी एकनाथ शिंदे यांना विनंती केली की, २०१९ प्रमाणे तानाजी सावंत यांना सोलापुरात लक्ष द्यायला लावा.

 भगिरथ भालकेंचा जयकुमार गोरेंवर हल्लाबोल

पक्षप्रवेशानंतर भगिरथ भालके यांनी सोलापूरचे पालकमंत्री जयकुमार गोरे यांच्यावर थेट निशाणा साधला. “निधी देणारा माणूस इथे स्टेजवर बसलाय, येऊन बघा,” असे म्हणत भालके यांनी एकनाथ शिंदेकडे हात करत गोरे यांना डिवचले. नगरपालिका निवडणुकीच्या प्रचारात गोरे यांनी भालकेंना आव्हान दिले होते — “जर भालके निवडून आले तरी निधी कुठून आणणार? माझ्याकडेच यावे लागेल.” आज भालके यांनी शिवसेनेत प्रवेश केल्याच्या पहिल्याच दिवशी गोरे यांना प्रत्युत्तर दिले.

 शिंदेंचे मोठे संकेत

एकनाथ शिंदे यांनी कार्यक्रमात शेरोशायरी आणि अभंग गात जोरदार फटकेबाजी केली. ते म्हणाले, “पैसे हे जनतेचे आहेत. ते आपण घेतोय. जनतेच्या पैशावर कोणाचाही अधिकार नाही.” पालकमंत्री जयकुमार गोरे यांनी पंचायत राज निवडणुकीत विरोधकांना “निधीसाठी आमच्याकडेच यावे लागेल” असे सुनावले होते. भालके तेव्हा विरोधी गटात होते. आज शिंदे यांनी त्याच मुद्द्यावर गोरे यांना अप्रत्यक्ष टोला लगावला.

शिंदे यांनी सांगितले, “आपला जनसेवा अजेंडा असल्यामुळे लोक माझ्याकडे येतात. आता साध्या गोळीवरही लोक येतील.” या विधानाने ‘ऑपरेशन टायगर’च्या चर्चेला पूर्णविराम दिला गेला असून, येत्या काळात मोठे इनकमिंग होणार असल्याचे संकेत दिले.

अनिल सावंत आणि तानाजी सावंत यांचा उल्लेख

अनिल सावंत आणि तानाजी सावंत यांचा उल्लेख करत एकनाथ शिंदे यांनी म्हटले की, “काका-पुतण्याचे राजकारण महाराष्ट्राने पाहिले आहे, पण हे दोघे शिवसेनेत एकदिलाने काम करतील. ऑपरेशन टायगर वगैरे काही नाही. काही चॅनलवालेच डरकाळी फोडत आहेत. ती ऐकून काही जण म्याव-म्याव करत आहेत. वंदनीय हिंदुहृदयसम्राट शिवसेनाप्रमुख बाळासाहेबांच्या तसेच वंदनीय गुरुवर्य धर्मवीर आनंद दिघे साहेब यांच्या विचारांमुळे आणि भगव्याच्या शानमुळेच दररोज हजारो नेते, लोकप्रतिनिधी, पदाधिकारी व कार्यकर्ते शिवसेनेसोबत जोडले जात आहेत.”

 राजकीय परिणाम आणि शक्यता

या पक्षप्रवेशामुळे पंढरपूर, मंगळवेढा आणि माढा परिसरात शिवसेना (शिंदे गट) मजबूत होणार असल्याचे स्पष्ट झाले आहे. भाजप आमदार समाधान औताडे यांची आगामी निवडणुकीत चिंता वाढण्याची शक्यता आहे. भगिरथ भालकेंचा जयकुमार गोरे यांच्यावर केलेला हल्लाबोल यामुळे भविष्यात भाजप आणि शिवसेना (शिंदे गट) यांच्यातील संघर्ष अधिक तीव्र होणार असल्याचे संकेत मिळत आहेत.

 कार्यक्रमातील प्रमुख मुद्दे

 शहाजी बापू पाटलांनी तानाजी सावंत यांना सोलापुरात लक्ष देण्याचा सल्ला दिला.

एकनाथ शिंदे यांनी ‘ऑपरेशन टायगर’च्या चर्चेला पूर्णविराम देत जनसेवा अजेंड्यावर भर दिला.

भगिरथ भालके यांनी जयकुमार गोरे यांना थेट आव्हान दिले.

एकनाथ शिंदे यांनी भालके यांच्या पाठीशी खंबीरपणे उभे असल्याचे सांगितले.

या कार्यक्रमाने सोलापूर जिल्ह्यातील राजकीय वातावरण तापले आहे. आगामी नगरपालिका आणि इतर निवडणुकांमध्ये भाजप आणि शिवसेना (शिंदे गट) यांच्यातील संघर्ष अधिक रंगतदार होण्याची शक्यता आहे.