विधान परिषदेसाठी सोलापूरच्या नेत्यांच्या जोर बैठका; राजेंद्र राऊत, राजन पाटील, राम सातपुते यांची चढाओढ, मुख्यमंत्री आणि पालकमंत्र्यांच्या संमतीनेच एकालाच संधी?

 

नाशिक विभागीय आयुक्त कार्यालयाने चौकशीचे आदेश दिले; सामाजिक कार्यकर्त्यांच्या आंदोलनानंतर प्रकरण उघडकीस; ट्रस्ट व्यवस्थापकाच्या खुलाशातून गंभीर धक्का

नाशिक / सप्तशृंगी गड :  महाराष्ट्रातील साडेतीन शक्तीपीठांपैकी एक असलेल्या सप्तशृंगी गडावरील श्री सप्तशृंगी निवासिनी देवी ट्रस्टच्या कारभारातून एक धक्कादायक प्रकार समोर आला आहे. मंदिरातील नक्षीकामासाठी वापरण्यात आलेल्या चांदीमध्ये सुमारे २२ किलो ४९० ग्रॅमची तफावत आढळली आहे. या ‘चांदी अपहार’ प्रकरणाने संपूर्ण राज्यभरात खळबळ उडाली असून, लाखो भाविकांच्या श्रद्धेचे प्रतीक असलेल्या या मंदिरातील भ्रष्टाचाराच्या आरोपांनी सर्वत्र संताप व्यक्त केला जात आहे. नाशिक विभागीय आयुक्त कार्यालय आणि जिल्हाधिकारी कार्यालयाने या प्रकरणाची गंभीर दखल घेत सखोल चौकशीचे आदेश दिले आहेत.

नेमके प्रकरण काय?

सामाजिक कार्यकर्ते विठोबा लच्छिराम द्यानद्यान यांनी यासंदर्भात प्रशासनाकडे पुराव्यासह तक्रार केली होती. तक्रारीनुसार, जुन्या नोंदींनुसार मंदिरातील नक्षीकामासाठी ४०६ किलो चांदी वापरण्यात आली होती. मात्र, अलीकडे प्रत्यक्ष मोजणी केली असता केवळ ३८३ किलो ७०३ ग्रॅम चांदी उपलब्ध असल्याचे आढळले. अशा प्रकारे सुमारे २२ किलो ४९० ग्रॅम चांदी गायब असल्याचे उघड झाले आहे. ही चांदी मंदिराच्या विविध भागांमध्ये नक्षीकामासाठी वापरण्यात आली होती. ती कशी, कधी आणि कोणत्या परिस्थितीत गायब झाली, याचा उलगडा होणे बाकी आहे.

 प्रशासनाची कडक पावले

२५ मार्च २०२६ रोजी प्राप्त झालेल्या या तक्रारीनंतर विभागीय आयुक्त कार्यालयाने तातडीने कार्यवाही सुरू केली. हे प्रकरण नाशिकच्या लाचलुचपत प्रतिबंधक विभागाकडे (ACB) तसेच विभागीय भ्रष्टाचार निर्मूलन समितीकडे सोपवण्यात आले आहे. अपर आयुक्त (महसूल) जितेंद्र वाघ यांनी यासंदर्भात लेखी आदेश काढून त्वरित अहवाल सादर करण्याचे निर्देश दिले आहेत.

तसेच, जिल्हाधिकारी कार्यालयामार्फत निवासी उपजिल्हाधिकारी रोहितकुमार राजपूत यांनी कळवणचे सहाय्यक जिल्हाधिकारी, तहसीलदार आणि ट्रस्टच्या कार्यकारी अधिकाऱ्यांना या प्रकरणाचा सखोल अहवाल सादर करण्याचे आदेश दिले आहेत. तसेच, तहसीलदारांना प्राथमिक अहवाल १५ दिवसांच्या आत सादर करण्यास सांगण्यात आले आहे.

 ट्रस्टच्या कारभारावरच प्रश्नचिन्ह?

ट्रस्टचे व्यवस्थापक सुदर्शन दहातोंडे यांनी चौकशी समितीसमोर दिलेल्या खुलाशात अधिक धक्कादायक माहिती उघडकीस आली आहे. त्यांच्या म्हणण्यानुसार, चांदी काढताना पंचनामा करणे, तिचे अधिकृत वजन करणे आणि सीलबंद करण्याची प्रक्रिया नियमांनुसार पार पडली नाही. म्हणजेच, कोणताही अधिकृत रेकॉर्ड ठेवल्याशिवाय ही चांदी हाताळली गेली. यामुळे हा केवळ तांत्रिक घोळ नसून नियोजित अपहार असल्याचा संशय बळावला आहे. ट्रस्टच्या कारभारात अनेक अनियमितता असल्याचे यापूर्वीही बोलले जात होते, मात्र आता मूर्तिमंत पुराव्यासह ही बाब समोर आली आहे.

कोणी आणि कशी केली चोरी?

अद्याप या प्रकरणातील चोरीचे नेमके स्वरूप स्पष्ट झालेले नाही. मात्र, चांदी नेमकी कोणत्या कालावधीत, कोणत्या पद्धतीने आणि कोणाच्या मदतीने बाहेर नेण्यात आली, याची सखोल चौकशी होत आहे. ट्रस्टमधील काही विश्वस्त किंवा अधिकाऱ्यांचा यात सहभाग असल्याचा संशय आहे. कारण मंदिरातील चांदीचे नक्षीकाम हे सहज दिसू शकेल असे नसून, ते अंतर्गत भागात होते. त्यामुळे आतल्या माणसांचाच हात असल्याची शक्यता वर्तवली जात आहे.

आंदोलनानंतर प्रकरणाला वाचा

स्थानिक सामाजिक कार्यकर्ते छगन जाधव, माजी सरपंच बेबीबाई जाधव यांनी विधीज्ञ सुरेंद्र सोनवणे यांच्या मार्गदर्शनाखाली जानेवारी २०२६ पासून याविरोधात आंदोलन छेडले होते. त्यांनी वारंवार निवेदने दिली, पत्रके दिली, मात्र सुरुवातीला प्रशासनाने त्याकडे गांभीर्याने पाहिले नाही. त्यामुळे त्यांना राज्य माहिती आयोगाच्या नाशिक खंडपीठाकडे धाव घ्यावी लागली. माहिती आयोगाने या प्रकरणाची दखल घेतल्यानंतर प्रशासकीय यंत्रणा हलली आणि अखेर चौकशी सुरू झाली.

सामाजिक कार्यकर्ते छगन जाधव म्हणाले, “ही फक्त चांदीची चोरी नाही, तर लाखो भाविकांच्या श्रद्धेची पाहिली आहे. ट्रस्टच्या कारभारात अनेक वर्षांपासून भ्रष्टाचार सुरू आहे. आता सरकारने कठोर कारवाई करून या सर्वांचे पुनर्वसन करावे.”

 फौजदारी कारवाईची मागणी

या प्रकरणात ट्रस्टचे अध्यक्ष, सर्व विश्वस्त आणि जबाबदार अधिकाऱ्यांवर फौजदारी गुन्हे दाखल करावेत, तसेच अपहार केलेल्या चांदीची रक्कम व्याजासह वसूल करावी, अशी मागणी तक्रारदारांनी केली आहे. तसेच, या प्रकरणातील दोषींना सोडले जाणार नाही, याची काळजी प्रशासनाने घ्यावी, अशीही मागणी करण्यात आली आहे. सप्तशृंगी देवीचे मंदिर हे केवळ नाशिकचे नव्हे, तर संपूर्ण महाराष्ट्राचे आराध्य स्थान आहे. अशा ठिकाणी एवढा मोठा भ्रष्टाचार उघडकीस आल्याने भाविकांमध्ये रोष आहे.

भाविकांमध्ये संताप, निषेधाचे सुरू

या घटनेची माहिती समजताच सप्तशृंगी गडावर आणि आजूबाजूच्या भागात भाविकांमध्ये संतापाची लाट पसरली आहे. अनेक भाविकांनी सोशल मीडियावर याचा तीव्र शब्दांत निषेध केला आहे. एका भाविकाने लिहिले, “ज्या मंदिरात दर्शनासाठी तासनतास रांगा लागतात, तिथेच चांदीची चोरी झाली हे लाजिरवाणे आहे. ट्रस्टच्या कारभारावर लगेच कारवाई झाली पाहिजे.”

दुसऱ्या एका भाविकाने म्हटले, “आम्ही देवीला भेटवस्तू देतो, ती चांदी कोणी चोरली? या दोषींना शासनाने फाशीपर्यंतची शिक्षा द्यावी.” अशा तीव्र प्रतिक्रिया सोशल मीडियावर पाहायला मिळत आहेत.

 ट्रस्टचे स्पष्टीकरण काय?

या प्रकरणी ट्रस्टच्या वतीने अद्याप कोणतेही अधिकृत स्पष्टीकरण देण्यात आलेले नाही. मात्र, ट्रस्टचे काही पदाधिकारी या प्रकरणी ‘तांत्रिक चुक’ असल्याचे म्हणत आहेत. त्यांच्या मते, जुन्या नोंदी आणि नवीन मोजणीत फरक झाला असेल. पण व्यवस्थापक सुदर्शन दहातोंडे यांनीच पंचनामा नसल्याची कबुली दिल्याने ही बाब पुसली जात नाही.

 मंदिराचे महत्त्व

सप्तशृंगी गडावरील श्री सप्तशृंगी निवासिनी देवीचे मंदिर हे महाराष्ट्रातील साडेतीन शक्तीपीठांपैकी एक आहे. या मंदिराला ऐतिहासिक आणि धार्मिक अशी दोन्ही महत्त्वे आहेत. दरवर्षी लाखो भाविक येथे दर्शनासाठी येतात. नवरात्रात तर येथे प्रचंड गर्दी होते. अशा मंदिरातील चांदीची चोरी ही देवीच्या भक्तांसाठी अत्यंत दुर्दैवी आहे.

 पुढे काय?

प्रशासनाने चौकशीचे आदेश दिले असले तरी, चौकशी अहवाल येण्यासाठी आणखी काही आठवडे लागू शकतात. तोपर्यंत ट्रस्टच्या कारभारावर नियंत्रण ठेवण्याची मागणीही होत आहे. सामाजिक कार्यकर्त्यांनी मागणी केली आहे की, चौकशीचा अहवाल सार्वजनिक करून दोषींवर कठोर कारवाई करावी. तसेच, भविष्यात अशा प्रकारचे गैरव्यवहार टाळण्यासाठी मंदिराच्या मालमत्तेची नियमित पडताळणी करण्याची यंत्रणा उभारावी

सप्तशृंगी गडावरील मंदिरातील २२ किलो चांदीची चोरी ही फक्त मालमत्तेची चोरी नसून, श्रद्धेचा भंग आहे. ट्रस्टच्या कारभारातील पारदर्शकतेचा अभाव आणि नियमांची पायमल्ली यामुळेच हा प्रकार घडला आहे. आता प्रशासनाने त्वरित आणि कठोर कारवाई करून दोषींना शिक्षा करावी, जेणेकरून भविष्यात कोणीही दैवी मालमत्तेशी अशी खेळत करण्याचे धाडस करणार नाही. लाखो भाविकांच्या नजरा आता या चौकशीच्या निकालाकडे लागल्या आहेत.