वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

  युद्धाच्या तणावाने शेअर बाजारात हाहाकार! सेन्सेक्स १,३५२ अंकांनी कोसळला, गुंतवणूकदारांचे ८.४९ लाख कोटी रुपये पाण्यात

 इराण-इस्रायल संघर्षाचा भारतीय बाजारावर भीषण परिणाम; ऑटो, बँकिंग, मेटल क्षेत्रात मोठी घसरण

मुंबई : इराण आणि इस्रायलमधील वाढत्या युद्धाच्या तणावाचा थेट परिणाम भारतीय शेअर बाजारावर झाला आहे. आठवड्याच्या पहिल्याच दिवशी सेन्सेक्स आणि निफ्टीमध्ये मोठी घसरण झाली असून, एकाच दिवसात गुंतवणूकदारांचे ८.४९ लाख कोटी रुपये बुडाले आहेत. जागतिक भू-राजकीय तणावामुळे गुंतवणूकदारांचा आत्मविश्वास डळमळीत झाला असून बाजारात मोठ्या प्रमाणात विक्री झाली.

किती घसरला बाजार?

दिवसअखेर बीएसईचा सेन्सेक्स १,३५२.७४ अंकांनी (१.७१ टक्के) घसरून ७७,५६६.१६ वर बंद झाला. तर नॅशनल स्टॉक एक्स्चेंजचा निफ्टी ४२२.४० अंकांनी (१.७३ टक्के) घसरून २४,०२८.०५ वर आला. कच्च्या तेलाच्या किमतीत झालेली वाढ आणि पश्चिम आशियात वाढलेला तणाव यामुळे बाजारातील ही घसरण झाल्याचे मत तज्ज्ञांनी व्यक्त केले.

सर्व क्षेत्रांना फटका

ऑटो, कॅपिटल गुड्स, कंझ्युमर ड्युरेबल्स, मेटल, पीएसयू बँक, ऑइल अँड गॅस आणि प्रायव्हेट बँकिंग क्षेत्रातील शेअर्समध्ये २ ते ४ टक्क्यांपर्यंत घसरण झाली. निफ्टी मिडकॅप आणि स्मॉलकॅप निर्देशांकही सुमारे २ टक्क्यांनी खाली आले. बीएसईवर एकूण ४,५३६ शेअर्समध्ये व्यवहार झाले, त्यापैकी ३,३७९ शेअर्स घसरणीसह बंद झाले, तर केवळ ९७२ शेअर्स वाढीसह बंद होऊ शकले.

कोणत्या शेअर्सना मोठा फटका?

सेन्सेक्समधील ३० पैकी २५ शेअर्स घसरणीसह बंद झाले. अल्ट्राटेक सिमेंटमध्ये ५.२३ टक्क्यांची मोठी घसरण झाली. मारुती सुझुकी, महिंद्रा अँड महिंद्रा (M&M), स्टेट बँक ऑफ इंडिया (SBI) आणि इंडिगो या शेअर्समध्ये ३.८ ते ४ टक्क्यांपर्यंत घसरण झाली.

या शेअर्समध्ये मात्र तेजी

घसरत्या बाजारातही काही शेअर्सनी तेजी दाखवली. रिलायन्स इंडस्ट्रीजमध्ये १.३७ टक्क्यांची वाढ झाली. सन फार्मा, इन्फोसिस, टेक महिंद्रा आणि एचसीएल टेक या शेअर्समध्ये ०.१३ टक्के ते ०.४८ टक्क्यांपर्यंत वाढ झाली. बीएसईवर ७२ शेअर्सनी ५२ आठवड्यांचा उच्चांक गाठला, तर ८७५ शेअर्स ५२ आठवड्यांच्या नीचांकी स्तरावर आले.