शिंदेंच्या भाषणादरम्यान फडणवीसांची एन्ट्री, एका वाक्यात वाद संपवला; सातारा राड्याने विधिमंडळ गदगदले

 आयपीएल २०२६: सीएसकेच्या सलामीचा गूढांभोव उलगडा! ऋतुराजने सांगितली संजूसोबतची जोडी, पण धोनीचा ‘गुंता’ कायम

 कर्णधार ऋतुराज गायकवाडने मुंबईत झालेल्या कर्णधारांच्या बैठकीदरम्यान संघाच्या सलामीवीरांबाबत निर्णय स्पष्ट केला. मात्र, महेंद्र सिंग धोनी कोणत्या क्रमांकावर फलंदाजीला येईल, याचे गूढ अद्याप कायम आहे.

गेल्या हंगामात सलामीची फळी ही चेन्नई सुपर किंग्स (सीएसके) साठी डोकेदुखी ठरली होती. यंदा या समस्येवर मात करण्यासाठी संघ व्यवस्थापनाने मोठा निर्णय घेतला आहे. कर्णधार ऋतुराज गायकवाडने सलामीच्या जोडीबाबतचा सस्पेन्स शेवटी उघड केला आहे.

मुंबईत झालेल्या कर्णधारांच्या बैठकीनंतर गायकवाडने स्पष्ट केले की, यंदाच्या हंगामात तो स्वतः डावाची सुरुवात करेल, तर त्याच्यासोबत संजू सॅमसन सलामीला येईल. गेल्या वर्षी अनेक प्रयोग करणाऱ्या सीएसकेने आता अनुभवी खेळाडूंवर विश्वास दाखवला आहे.

गेल्या हंगामातील डोकेदुखी

गेल्या हंगामात टॉप ऑर्डर ही सीएसकेसमोर मोठी समस्या होती. कर्णधार ऋतुराज गायकवाडला बराच काळ तिसऱ्या क्रमांकावर फलंदाजी करावी लागली होती. रचिन रवींद्र, डेव्हन कॉनवे आणि राहुल त्रिपाठी यांना सलामीवीर म्हणून संधी देण्यात आली, मात्र यापैकी कोणतीही जोडी संघाला स्थैर्य देऊ शकली नाही. हंगामाच्या मध्यात गायकवाड दुखापतीमुळे बाहेर पडल्यानंतर आयुष म्हात्रे आणि देवाल्ड ब्रेविस यांना संधी मिळाली. म्हात्रेने सात डावांत २४० धावा करत आपल्या कामगिरीने प्रभावित केले, तर ब्रेविसने सहा डावांत २२५ धावा करून फिनिशरची भूमिका यशस्वीपणे पार पाडली.

संजू सॅमसनचा समावेश

अशा स्थितीतही संघ व्यवस्थापनाने अनुभवाला प्राधान्य दिले. रवींद्र जडेजा आणि सॅम करन यांच्या बदल्यात संजू सॅमसनला राजस्थान रॉयल्सकडून सीएसकेमध्ये ट्रेड करण्यात आले.

धोनीचा ‘गुंता’ कायम

सीएसके संघातील सर्वात मोठे नाव असलेल्या महेंद्र सिंग धोनी यांच्या फलंदाजीच्या क्रमांकाबाबत मात्र अजूनही गूढ कायम आहे. याबाबत विचारले असता कर्णधार गायकवाडने चाहत्यांना पहिल्या सामन्यापर्यंत थांबण्याचे आवाहन केले. सीएसके आपल्या आयपीएल २०२६ मोहिमेची सुरुवात ३० मार्च रोजी गुवाहाटी येथील बरसापारा स्टेडियमवर राजस्थान रॉयल्सविरुद्ध करेल. त्यानंतर ३ एप्रिल रोजी चेन्नईत पंजाब किंग्सविरुद्ध तर ११ एप्रिल रोजी एम.ए. चिदंबरम स्टेडियमवर दिल्ली कॅपिटल्सविरुद्ध संघ आपल्या घरच्या मैदानावर सामने खेळेल.