म्हसवड : धुळदेवमध्ये भयानक अपघात, दोघे जागीच ठार; तीन जखमी

राजीनाम्यानंतर सत्तासमीकरणात कायापालटाची चिन्हे; मुख्यमंत्रिपदावरून सस्पेन्स कायम

पाटणा : बिहारच्या राजकारणातील ‘नितीश पर्वा’चा अखेर अस्त झाला आहे. मुख्यमंत्री नितीश कुमार यांनी सोमवारी बिहार विधान परिषदेच्या सदस्यत्वाचा राजीनामा दिला. २००५ मध्ये बिहारमध्ये सरकार स्थापन केल्यानंतर ते सलगपणे विधान परिषदेचे सदस्य होते. विधिमंडळातील २० वर्षांच्या सेवेनंतर त्यांनी अवघ्या २९ शब्दांत विधान परिषदेला निरोप दिला.

मंत्री विजय चौधरी आणि एमएलसी संजय गांधी यांनी नितीश कुमार यांचा राजीनामा विधान परिषदेत सादर केला. मंत्री विजय चौधरी म्हणाले, “मुख्यमंत्री राज्यसभेवर निवडून आले आहेत. ही एक घटनात्मक प्रक्रिया आहे. त्यांना आज राजीनामा द्यावाच लागला.” एमएलसी संजय गांधी यांनी हा राजीनामा विधान परिषदेचे अध्यक्ष अवधेश नारायण सिंह यांच्याकडे सुपूर्द केला.

भाजपच्या दबावाचा आरोप; मंत्री भावूक

नितीश कुमार यांच्या राजीनाम्यानंतर मंत्री अशोक चौधरी भावूक झालेले दिसले. ते रडताना दिसले. विरोधी पक्षनेते तेजस्वी यादव यांनी या राजीनाम्याबाबत आरोप केला. ते म्हणाले, “भाजपने मुख्यमंत्र्यांवर राजीनामा देण्यासाठी दबाव टाकला.”

दरम्यान, बिहार भाजपचे अध्यक्ष संजय सरावगी यांनी भाजपचे राष्ट्रीय अध्यक्ष नितीन नवीन यांचा राजीनामा विधानसभा अध्यक्ष डॉ. प्रेम कुमार यांच्याकडे सादर केला. नितीन नवीन यांनी काल आसामला रवाना होण्यापूर्वी प्रदेशाध्यक्षांकडे आपला राजीनामा सादर केला होता.

आता पुढे काय? तीन शक्यता

नितीश कुमार यांच्या राजीनाम्यानंतर आता बिहारच्या सत्तासमीकरणाबाबत विविध चर्चा रंगल्या आहेत. पुढील घडामोडींबाबत तीन शक्यता व्यक्त केल्या जात आहेत:

१. सध्या खरमास १४ एप्रिलपर्यंत लागू आहे. खरमास संपल्यानंतर मुख्यमंत्री नितीश कुमार राजीनामा देऊ शकतात.

२. नितीश यांच्या मुख्यमंत्रिपदाच्या राजीनाम्यानंतर भाजप बिहारमध्ये स्वतःचा मुख्यमंत्री नियुक्त करू शकते.

३. घटनात्मक नियमांनुसार नितीश कुमार सहा महिने बिहारचे मुख्यमंत्री राहू शकतात. त्यामुळे सध्या मुख्यमंत्रिपदावरून सस्पेन्स कायम आहे.

नितीन नवीन यांची आईसाठी भावनिक पोस्ट

राजीनाम्याच्या पार्श्वभूमीवर, भाजपचे राष्ट्रीय अध्यक्ष नितीन नवीन यांनी सोशल मीडियावर आपल्या आईसाठी एक भावनिक पोस्ट केली. त्यांनी लिहिले, “माझ्या आईची सावली कदाचित माझ्यासोबत नसेल, पण तिचे अस्तित्व पूर्वीसारखेच जिवंत आहे. गेल्या पाच वर्षांत मी अनेक टप्पे आणि प्रतिष्ठा मिळवली आहे, पण या सगळ्यात एक पोकळीची भावना माझ्या हृदयाला नेहमीच कुरतडते. मी मंत्री झाल्यानंतर काही दिवसांनी माझी आई आम्हा सर्वांना सोडून गेली; जणू काही ती त्या दिवसाचीच वाट पाहत होती.”

बिहारच्या राजकारणात या घडामोडींमुळे नवे समीकरण तयार होण्याची शक्यता असून, सर्वांचे लक्ष आता आगामी काळातील निर्णयांकडे लागले आहे.