वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

भूराजकीय तणावाचा बाजारावर तीव्र परिणाम; युद्धाच्या खाईत भारतीय शेअर बाजाराची होरपळ सुरूच

युद्धाच्या ढगांमुळे भारतीय शेअर बाजारात हाहाःकार; सेन्सेक्स 2400 अंकांनी कोसळला, निफ्टी 750 अंकांनी खाली

पश्चिम आशियातील युद्धतणावाचा फटका; सेन्सेक्सची 2400 अंकांची उडी खालच्या दिशेने, गुंतवणूकदारांचे 10 लाख कोटी रुपये बुडाले

नवी दिल्ली : पश्चिम आशियातील वाढत्या भूराजकीय तणावाचे गंभीर पडसाद आज भारतीय शेअर बाजारात उमटले. इराणमध्ये नवीन सर्वोच्च नेत्याची निवड आणि अमेरिकेने दिलेल्या धमकीमुळे निर्माण झालेल्या संभ्रमावस्थेत गुंतवणूकदारांनी मोठ्या प्रमाणात बाजारातून पाठ फिरवली. परिणामी, मुंबई शेअर बाजाराचा सेन्सेक्स सत्रादरम्यान २४०० हून अधिक अंकांनी कोसळला, तर निफ्टीमध्ये ७५० अंकांची घसरण नोंदवली गेली.

बाजार उघडताच सेन्सेक्सने १८०० अंकांची घसरण अनुभवली, मात्र ही घसरण सत्र सुरू राहिल्याने अधिकच गडद झाली. या घसरणीमुळे गुंतवणूकदारांना प्रचंड आर्थिक फटका बसला असून, अंदाजे १० लाख कोटी रुपयांचे नुकसान झाल्याचे प्राथमिक अनुमान आहे.

जागतिक बाजारातही खळबळ

केवळ भारतच नव्हे, तर संपूर्ण आशियाई आणि जागतिक बाजारांना युद्धाचा मोठा फटका बसला आहे. आशियातील प्रमुख बाजारांची स्थिती अत्यंत बिकट असून, जपानचा निक्की निर्देशांक ७ टक्क्यांनी, तर दक्षिण कोरियाचा कोस्पी निर्देशांक ८ टक्क्यांनी कोसळला. ऑस्ट्रेलियात ४ टक्के, तर सिंगापूरमध्ये ३ टक्क्यांची घसरण झाली. अमेरिकन बाजारातूनही मोठ्या घसरणीचे संकेत मिळत आहेत.

कच्च्या तेलाच्या किमतीत स्फोटक वाढ

युद्धाच्या तणावामुळे जागतिक स्तरावर इंधन पुरवठा विस्कळीत होण्याची शक्यता निर्माण झाली असून, कच्च्या तेलाच्या किमतीत मोठी उसळी आली आहे. मागील आठवड्याच्या तुलनेत कच्च्या तेलाच्या किमतीत २० टक्क्यांनी वाढ झाली असून, ते ११४ डॉलर प्रति बॅरलवर पोहोचले आहे. भारतासारख्या आयातदार देशासाठी हे महागाई वाढवणारे ठरण्याची शक्यता आहे.

भूराजकीय संकट अधिक गडद

इराणमध्ये अयातुल्ला खामेनी यांचे पुत्र मोजतबा खामेनी यांची 'सर्वोच्च नेते' पदी निवड झाल्यानंतर अमेरिकेचे माजी राष्ट्राध्यक्ष डोनाल्ड ट्रम्प यांनी कडक प्रतिक्रिया दिली आहे. "अमेरिकेच्या मान्यतेशिवाय कोणताही नेता टिकू शकणार नाही," असा इशारा ट्रम्प यांनी दिल्याने तणाव आणखी वाढला आहे.

जयशंकर संसदेत करणार निवेदन

पश्चिम आशियातील संवेदनशील परिस्थितीवर भारत सरकारचे बारीक लक्ष असून, परराष्ट्र मंत्री एस. जयशंकर आज संसदेत या विषयावर सरकारची भूमिका मांडणार आहेत. ते सकाळी ११ वाजता राज्यसभेत, तर दुपारी १२ वाजता लोकसभेत पश्चिम आशियातील सद्यस्थिती आणि भारताच्या धोरणाबाबत सविस्तर निवेदन देतील.