वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

"परिस्थिती हाताबाहेर, पुरवठा बंद झाल्यास जबाबदार नाही"; इराणविरुद्धच्या युद्धात बहरीनच्या तेल कंपनीने टेकले गुडघे

युद्धाच्या आगीत बहरीन होरपळला; बापकोने घोषित केले फोर्स मेज्युअर, इराणी ड्रोन हल्ल्यानंतर तेल शुद्धीकरण कारखान्यात धुराचे लोट

इराण-इस्रायल युद्धाचा विस्तार; बहरीनची सरकारी तेल कंपनी अपयशी, म्हणाली- 'परिस्थिती आमच्या नियंत्रणाबाहेर'

मनामा : अमेरिका-इस्रायल-इराण युद्धाला आज (९ मार्च) दहावा दिवस आहे. या संघर्षाचे पडसाद संपूर्ण आखाती प्रदेशात उमटत असून बहरीनमध्ये मोठे संकट निर्माण झाले आहे. इराणी ड्रोन हल्ल्यानंतर बहरीनची सरकारी मालकीची तेल कंपनी बापको एनर्जीजने आपल्या कामकाजावर फोर्स मेज्युअर घोषित केले आहे. याचा अर्थ असा की, यापुढे कोणत्याही कारणास्तव तेल पुरवठा विस्कळीत झाल्यास त्याची जबाबदारी कंपनी घेणार नाही.

बहरीनच्या सित्रा परिसरात असलेल्या देशाच्या मुख्य तेल शुद्धीकरण कारखान्यातून दाट धुराचे लोट उठताना दिसल्यानंतर हा निर्णय घेण्यात आला. यापूर्वी सरकारने पुष्टी केली होती की, या परिसरात इराणी ड्रोन हल्ल्यात काही जखमी झाले असून मालमत्तेचे नुकसान झाले आहे. बापको एनर्जीज बहरीनची मुख्य तेल शुद्धीकरण कारखाना चालवते, जी देशाच्या ऊर्जा क्षेत्रासाठी एक महत्त्वाची सुविधा आहे.

बहरीनमध्ये स्थलांतराचे आवाहन

युद्धाची भीती आणि विध्वंस यामुळे अवघ्या आखाती देशात थरकाप उडाला असून बहरीनच्या गृह मंत्रालयाने देशभरात सायरन वाजवून नागरिकांना आणि रहिवाशांना तात्काळ स्थलांतर करण्याचे आवाहन केले आहे. एका संक्षिप्त निवेदनात, मंत्रालयाने सर्वांना शांत राहण्याचे आणि जवळच्या सुरक्षित ठिकाणी जाण्याचे आवाहन केले आहे. या संघर्षात आतापर्यंत १७०० हून अधिक लोक मारले गेले आहेत आणि हजारो जखमी झाले आहेत. लोकांना घरे सोडून आश्रय घ्यावा लागत आहे.

दुबईहून ३३० इस्रायली नागरिक सुखरूप

दरम्यान, युद्धामुळे एका आठवड्यापेक्षा जास्त काळ युएईमध्ये अडकलेल्या इस्रायली नागरिकांना सुरक्षित बाहेर काढण्यात सुरुवात झाली आहे. दुबईहून ३३० इस्रायली नागरिकांना घेऊन जाणारे पहिले बचाव विमान बेन गुरियन विमानतळावर सुरक्षितपणे उतरले आहे. त्यानंतर आणखी एक बोईंग विमान येईल, ज्यामध्ये सुमारे ३३० प्रवासी असतील.

तेल संकटावर जी७ देशांची चर्चा

वाढत्या तेलाच्या किमती आणि ऊर्जा संकटाच्या पार्श्वभूमीवर, जी७ देशांचे अर्थमंत्री आज आपत्कालीन तेल साठा सोडण्याच्या प्रस्तावावर चर्चा करतील. फायनान्शियल टाईम्समधील वृत्तानुसार, या योजनेअंतर्गत किमती नियंत्रित करण्यास मदत करण्यासाठी आंतरराष्ट्रीय ऊर्जा संस्थेशी समन्वय साधून आपत्कालीन साठ्यातील तेल बाजारात सोडले जाऊ शकते. आतापर्यंत, अमेरिकेसह तीन जी७ देशांनी या प्रस्तावाला पाठिंबा दिला आहे. तज्ज्ञांचा विश्वास आहे की, यामुळे जागतिक बाजारपेठेत पुरवठा वाढेल आणि तेलाच्या किमतींवरील दबाव कमी होऊ शकेल.