वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 

"गोदामाईच्या पावित्र्याचा अपमान"; रंगपंचमीच्या नावाखाली नदीपात्रात चपला-बुटांचा खच, गोदाप्रेमींचा संताप

नाशिकमध्ये रंगपंचमीच्या नावाखाली बेफाम उन्माद; गोदावरी पात्रात चपला-बूट फेकून उत्सवाचे ओंगळवाणे स्वरूप, गोदाप्रेमींची कारवाईची मागणी

रंगपंचमीच्या उत्सवाला काळीमा; गोदावरी पात्रात हुल्लडबाजांनी फेकल्या चपला-बुटा, भोसले यांची गुन्हे दाखल करण्याची मागणी

नाशिक : शहराची अस्मिता आणि धार्मिक परंपरेचे प्रतीक असलेल्या गोदावरी नदीच्या पात्रात रंगपंचमी साजरी करताना काही हुल्लडबाज तरुणांनी केलेल्या बेफाम उन्मादामुळे शहरात संतापाची लाट पसरली आहे. उत्सव साजरा करण्याच्या नावाखाली या तरुणांनी एकमेकांवर चपला आणि बूट फेकण्याचा प्रकार केल्याने गोदामाईचे पावित्र्य भंग झाल्याची भावना नागरिकांमध्ये व्यक्त होत आहे.

प्राप्त माहितीनुसार, रंगपंचमीच्या निमित्ताने मोठ्या संख्येने तरुण गोदावरी नदीच्या पात्रात उतरले होते. मात्र रंगांचा उत्सव साजरा करण्याऐवजी काहींनी आपले चपले-बूट काढून एकमेकांवर फेकण्यास सुरुवात केली. यामुळे काही वेळातच नदीपात्र चपला-बुटांनी अक्षरशः भरून गेले. या निंदनीय प्रकारामुळे नाशिकच्या सांस्कृतिक परंपरेलाच काळीमा फासल्याची प्रतिक्रिया नागरिकांकडून व्यक्त केली जात आहे.

या घटनेची दखल घेत काही गोदाप्रेमी तरुणांनी पुढाकार घेऊन नदीपात्रातून चपला-बुटांचा ढीग बाहेर काढला. या प्रकरणी भाजपा आध्यात्मिक आघाडीचे प्रमुख तुषार भोसले यांनी तीव्र संताप व्यक्त केला आहे. ते म्हणाले, "नाशिकच्या वैभवाला कलंक लावणारा आणि अत्यंत किळसवाणा प्रकार काल गोदावरी नदीच्या पात्रात घडला. गोदामाईच्या पावित्र्याचा असा धार्जिणा करणाऱ्यांवर पोलिसांनी तातडीने गुन्हे दाखल करावेत."

घटनेदरम्यान पोलीस बंदोबस्त असतानाही हा प्रकार घडल्याने प्रशासनाच्या निष्काळजीपणावरही प्रश्नचिन्ह उपस्थित केले जात आहे. महापालिका आणि पोलीस प्रशासनाने स्वतःहून या प्रकरणाची दखल घेऊन दोषींवर गुन्हे दाखल करावेत, अन्यथा न्यायालयात धाव घेण्याचा इशारा गोदाप्रेमींनी दिला आहे. तसेच भविष्यात अशा घटना टाळण्यासाठी पुढील वर्षापासून गोदावरी नदीपात्रात रंगपंचमी खेळण्यास पूर्ण बंदी घालण्याची मागणी जोर धरू लागली आहे.