वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

  इराणविरोधातील युद्धावर इटलीच्या पंतप्रधानांची अमेरिकेवर नाराजी; स्पेनच्या धाडसी भूमिकेची जगभर चर्चा

 मेलोनी म्हणाल्या- आंतरराष्ट्रीय कायद्याच्या कक्षेबाहेरचा हस्तक्षेप; स्पेनने इस्रायलमधून राजदूत माघारी बोलावले, युरोपमध्ये फूट पडण्याची शक्यता

रोम/माद्रिद: इराण आणि अमेरिका-इस्रायल यांच्यातील युद्धाने भीषण रूप धारण केले असताना, पाश्चात्य देशांमधील एकजूट मात्र भंग पावली आहे. इटलीच्या पंतप्रधान जॉर्जिया मेलोनी यांनी अमेरिकेच्या धोरणांवर थेट टीका करत युद्धाला विरोध दर्शविला आहे. तर स्पेननेही अमेरिकेच्या लष्करी कारवाईचा तीव्र शब्दांत निषेध करत आपले इस्रायलमधील राजदूत माघारी बोलावले आहेत.

मेलोनी यांचा अमेरिकेवर निशाणा

मेलोनी यांनी संसदेत केलेल्या भाषणात युद्धाचा तीव्र निषेध केला. त्यांनी मध्य पूर्वेतील लष्करी मोहिमेचे वर्णन आंतरराष्ट्रीय कायद्याच्या कक्षेबाहेरचा हस्तक्षेप असल्याचे म्हटले. इराणकडून प्रादेशिक सुरक्षेला धोका असल्याचे त्यांनी मान्य केले, परंतु अमेरिकेने केलेली ही कारवाई चुकीची असल्याचे स्पष्ट केले. विशेष म्हणजे, मेलोनी यांना युरोपमधील सर्वात विश्वासार्ह अमेरिकन सहयोगी मानले जात असताना त्यांचा हा बदलेला सूर महत्त्वाचा मानला जात आहे.

स्पेनचा कडवा विरोध आणि कारणे

स्पेनचे पंतप्रधान पेड्रो सांचेझ यांनी हे युद्ध 'अनावश्यक आणि मानवी मूल्यांना हरताळ फासणारे' असल्याचे म्हटले आहे. नाटो सदस्य असूनही स्पेनने अमेरिका आणि इस्रायलविरोधात घेतलेल्या भूमिकेची जगभर चर्चा रंगली आहे. स्पेनच्या या भूमिकेमागील प्रमुख कारणे पुढीलप्रमाणे:

   रक्तपाताचा निषेध: दक्षिण इराणमधील एका मुलींच्या शाळेवर झालेल्या अमेरिकन हल्ल्यात 175 निष्पाप विद्यार्थिनींचा बळी गेल्याची घटना समोर आल्यानंतर स्पेनमध्ये संतापाची लाट उसळली आहे. "लोकशाहीच्या नावाखाली निष्पाप मुलांचे बळी घेणे स्पेनला मान्य नाही," असे अधिकृत पत्रकात म्हटले आहे.

   आंतरराष्ट्रीय कायद्यांचे उल्लंघन: अमेरिकेने हे युद्ध सुरू करण्यापूर्वी संयुक्त राष्ट्रांची (UN) कोणतीही रीतसर परवानगी घेतलेली नाही. ट्रम्प यांनी घेतलेला हा एकतर्फी निर्णय आंतरराष्ट्रीय नियमांचे उल्लंघन असून यामुळे जगात 'जंगल राज' निर्माण होईल, अशी भीती स्पेनने व्यक्त केली आहे.

   आर्थिक फटका: इराणच्या प्रत्युत्तरामुळे होर्मुझच्या सामुद्रधुनीतून होणारा तेल पुरवठा विस्कळीत झाला आहे. ऊर्जेसाठी आयातीवर अवलंबून असलेल्या स्पेनच्या अर्थव्यवस्थेला कच्च्या तेलाच्या वाढत्या किमतींचा थेट फटका बसत आहे.

   शरणार्थी संकट: इराणमध्ये सुरू असलेल्या बॉम्बफेकीमुळे लाखो लोक विस्थापित होत आहेत. २०१५ मधील सीरिया संकटाची पुनरावृत्ती होऊन युरोपच्या सीमांवर निर्वासितांचा मोठा लोंढा येईल, अशी भीती स्पेनला आहे.

युरोपमध्ये वाढता नाराजीचा सूर

स्पेनच्या या भूमिकेला फ्रान्स, इटली आणि तुर्कीचा पाठिंबा मिळताना दिसत आहे. गेल्या आठवड्यात स्पेनचे पंतप्रधान पेड्रो सांचेझ, फ्रान्सचे अध्यक्ष इमॅन्युएल मॅक्रॉन आणि डच पंतप्रधान रॉब जेटन यांनीही या युद्धाला विरोध दर्शविला आहे. तुर्कीने तर या युद्धाला प्रादेशिक शांततेचा शत्रू संबोधले आहे. अमेरिकेने आपल्या मित्रराष्ट्रांना विश्वासात न घेता हे पाऊल उचलल्याची टीका मेलोनी यांनी केली आहे.