वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

  संभाजीनगर जिल्हा परिषद निवडणुकीत मोठा खेळ! ठाकरे गटाच्या 'तटस्थ' राहण्याच्या निर्णयाने शिंदे गटाला धक्का, भाजपचा मार्ग मोकळा?

 अंबादास दानवे यांनी जारी केलेल्या व्हीपमुळे राजकीय वर्तुळात खळबळ; ठाकरे गटाचे दोन सदस्य 'बेपत्ता', भाजपमध्ये जाण्याची शक्यता.

छत्रपती संभाजीनगर जिल्हा परिषदेच्या अध्यक्ष आणि उपाध्यक्षपदाच्या निवडणुकीत मोठा राजकीय ट्विस्ट पाहायला मिळाला आहे. उद्धव ठाकरे यांच्या नेतृत्वाखालील शिवसेनेने (ठाकरे गट) निवडणुकीत तटस्थ राहण्याचा निर्णय घेतला आहे. यामुळे एकनाथ शिंदे यांच्या नेतृत्वाखालील शिवसेनेला (शिंदे गट) मोठा धक्का बसला असून, भाजपला अप्रत्यक्षपणे मदत होणार असल्याचे चित्र आहे.

राज्यातील सोलापूर, संभाजीनगर, परभणी, सांगली आणि सातारा या पाच जिल्हा परिषदांमध्ये आज (18 मार्च) अध्यक्ष आणि उपाध्यक्षपदासाठी मतदान होत आहे. यातच संभाजीनगरमध्ये ठाकरे गटाने आपली भूमिका स्पष्ट केली आहे.

ठाकरे गटाचा व्हीप काय सांगतो?

शिवसेना ठाकरे गटाचे जिल्हाप्रमुख अंबादास दानवे यांनी जारी केलेल्या व्हीपमध्ये म्हटले आहे की, "दिनांक 18 मार्च 2026 रोजी छत्रपती संभाजीनगर जिल्हा परिषद अध्यक्ष व उपाध्यक्ष पदाच्या होणाऱ्या निवडणुकीत कोणत्याही उमेदवारास मतदान करू नये." या आदेशानुसार ठाकरे गटाचे सर्व 9 सदस्य तटस्थ राहतील, ज्याचा फायदा थेट भाजपला होणार आहे.

ठाकरे गटाचे दोन सदस्य गायब?

निवडणुकीपूर्वीच ठाकरे गटासाठी आणखी एक धक्का समोर आला आहे. गटाचे दोन सदस्य - संजय निकम आणि ललिता सोनवणे हे गायब असून, ते भाजपच्या गोटात गेल्याची जोरदार चर्चा आहे. यामुळे ठाकरे गटाच्या 9 सदस्यांपैकी 2 सदस्य भाजपला पाठिंबा देऊ शकतात, अशी शक्यता वर्तवली जात आहे.

संख्याबळाचे गणित:

छत्रपती संभाजीनगर जिल्हा परिषदेत एकूण 63 सदस्य आहेत. अध्यक्षपद निवडून येण्यासाठी 32 सदस्यांची आवश्यकता आहे. सद्यस्थितीतील पक्षीय बलाबल पुढीलप्रमाणे -

   भाजप: 23

   शिवसेना (शिंदे गट): 21

  शिवसेना (ठाकरे गट): 9 (दोन सदस्य भाजपकडे झुकल्याची शक्यता)

   राष्ट्रवादी (अजित पवार गट): 4

   काँग्रेस: 1 (भाजपमध्ये प्रवेश केल्याची माहिती)

   राष्ट्रवादी (शरद पवार गट): 1

   अपक्ष: 4

भाजपचे संख्याबळ किती?

ठाकरे गटाने तटस्थ राहण्याचा निर्णय घेतल्याने भाजपची बाजू अधिक मजबूत झाली आहे. भाजपचे 23, राष्ट्रवादी (अजित पवार) 4, काँग्रेसचा 1 (भाजप प्रवेश केलेला), अपक्ष 3 आणि ठाकरे गटाचे बंडखोर 2 असे एकूण 33 सदस्य भाजपच्या बाजूने एकत्र येण्याची शक्यता आहे. त्यामुळे भाजपचा उमेदवार सहज विजय मिळवू शकतो, असा अंदाज व्यक्त केला जात आहे. या सर्व राजकीय घडामोडींमुळे संभाजीनगर जिल्हा परिषद निवडणूक चांगलीच चर्चेत आली आहे.