वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

प्रसिद्ध इन्फ्लुएंसरची भीषण हत्या! दीड लाख रुपये घेऊन गेला, मृतदेह झाडाझुडपातील प्लॉटवर सापडला; कुटुंबाचा पोलिसांवर गंभीर आरोप

आकाश उर्फ पुष्पेंद्र बेपत्ता होण्यापूर्वी गांधी नगरला निघाला होता; सोनसाखळी व पैसे गायब, कॉल डिटेल्ससाठी 10 हजार लाच मागितल्याचा आरोप

नवी दिल्ली: सोशल मीडियावर फॅशन व्हिडिओद्वारे प्रसिद्धीच्या झोतात असलेल्या एका तरुण इन्फ्लुएंसरची भीषण हत्या झाल्याची घटना समोर आली आहे. पूर्व दिल्लीतील मंडावली परिसरातील आनंद विहार भागात असलेल्या झाडाझुडपांनी वेढलेल्या रिकाम्या प्लॉटमध्ये युट्यूबर आणि इन्स्टाग्राम इन्फ्लुएंसर पुष्पेंद्र उर्फ आकाश (वय 31) याचा मृतदेह सापडल्याने खळबळ उडाली आहे.

दीड लाख रुपये घेऊन घरातून बाहेर पडला, संपर्क तुटला

मुळचा अलिगढचा रहिवासी असलेला आकाश मंडावली येथे आई-वडील, पत्नी आणि तीन वर्षांच्या मुलीसह राहत होता. तो 'स्टायलिंग' नावाचे कपड्यांचे शोरूम चालवत असे आणि सोशल मीडियावर फॅशन व्हिडिओद्वारे कपड्यांची ब्रँडिंग करत असे. शनिवारी दुपारी 12:30 वाजता आकाश दीड लाख रुपये रोख घेऊन गांधी नगर मार्केटला निघाला. मात्र दुपारी अडीच वाजताच त्याचा मोबाइल स्विच ऑफ लागू लागला. यानंतर कुटुंबीयांनी मंडावली पोलिस ठाण्यात तक्रार दाखल केली

झाडाझुडपात सापडला मृतदेह, पैसे-सोनसाखळी गायब

सोमवारी सायंकाळी कुटुंबीयांना आकाशचा मृतदेह डीडीएच्या झाडाझुडपांनी वेढलेल्या एका प्लॉटमध्ये आढळला. त्याचा मोबाइल मृतदेहाजवळच सापडला; मात्र त्याच्याकडील सोन्याची चैन आणि दीड लाख रुपये गायब होते. कुटुंबियांना संशय आहे की कोणीतरी त्याच्याकडील पैसे लुटले आणि विषारी पदार्थ खाऊ घालून हत्या केली.

पोलिसांवर गंभीर आरोप

आकाशचा भाऊ सत्येंद्रने पोलिसांवर गंभीर आरोप केले आहेत. तो म्हणाला, "शोधकार्यात पोलिसांनी तातडीने दखल घेतली नाही, म्हणून माझ्या भावाचा मृत्यू झाला. शिवाय कॉल डिटेल्स (सीडीआर) मिळवण्यासाठी एका कॉन्स्टेबलने 10 हजार रुपयांची लाच मागितली." या आरोपांमुळे पोलिस प्रशासनावर गंभीर आरोप झाले आहेत.

पोलिसांचा दावा – शवविच्छेदन अहवालाची प्रतीक्षा

पूर्व दिल्लीचे डीसीपी राजीव कुमार यांनी सांगितले की, "प्राथमिक तपास आणि मृतदेहाच्या स्थितीवरून ही हत्या असल्याचे स्पष्ट होत नाही. पोलीस सध्या शवविच्छेदन अहवालाची वाट पाहत आहेत. सीसीटीव्ही फुटेज तपासले जात आहेत. लाचखोरीच्या आरोपांचीही चौकशी केली जात आहे. अंतिम अहवालानंतरच मृत्यूचे खरे कारण स्पष्ट होईल."

सोशल मीडियावर शोककळा

या घटनेनंतर परिसरात खळबळ उडाली असून, आकाशच्या चाहत्यांनी सोशल मीडियावर शोक व्यक्त केला आहे. पोलिसांनी प्रकरणाचा तपास सुरू केला असून, मृतदेह शवविच्छेदनासाठी रुग्णालयात पाठवण्यात आला आहे. आकाशच्या अचानक गेल्याने त्याच्या कुटुंबावर दु:खाचा डोंगर कोसळला आहे.