शिंदेंच्या भाषणादरम्यान फडणवीसांची एन्ट्री, एका वाक्यात वाद संपवला; सातारा राड्याने विधिमंडळ गदगदले

  

नीरव मोदीच्या प्रत्यर्पणाचा मार्ग मोकळा! भारत सरकार आणि सीबीआयच्या सातत्यपूर्ण प्रयत्नांना मोठे यश

यूके हायकोर्टाने फेटाळली नीरव मोदीची पुनर्विचार याचिका; ६४९८ कोटींच्या PNB घोटाळ्यातील फरार हिरे व्यापारी आता भारतात येण्याच्या जवळ

लंडन: पंजाब नॅशनल बँक (PNB) घोटाळ्याचा मुख्य आरोपी आणि फरार हिरे व्यापारी नीरव मोदी याच्या प्रत्यर्पणाचा मार्ग आता मोकळा झाला आहे. यूकेतील हायकोर्ट ऑफ जस्टिस (किंग्स बेंच डिव्हिजन) यांनी नीरव मोदीने दाखल केलेली प्रत्यर्पणाविरोधातील पुनर्विचार याचिका फेटाळून लावली आहे.

न्यायालयाने स्पष्ट नमूद केले की, प्रकरण पुन्हा उघडण्यासाठी आवश्यक “अपवादात्मक परिस्थिती” याचिकेत आढळत नाही. यामुळे भारत सरकार आणि सीबीआयच्या दीर्घकाळ चाललेल्या प्रयत्नांना मोठे यश मिळाले आहे.

काय घडले?

नीरव मोदी २०१९ पासून यूकेतील तुरुंगात कैद आहे. त्याने प्रत्यर्पण आदेशाविरोधात अनेक याचिका दाखल केल्या होत्या, ज्या सर्व फेटाळण्यात आल्या. या वेळी त्याने भारतात परतल्यास गैरवर्तन  होण्याची शक्यता व्यक्त केली होती आणि भारतीय अधिकाऱ्यांच्या हमीवर प्रश्नचिन्ह उपस्थित केले होते. मात्र न्यायालयाने हे सर्व मुद्दे ग्राह्य धरले नाहीत.

यूकेच्या क्राउन प्रॉसिक्यूशन सर्व्हिस आणि सीबीआयच्या पथकाने जोरदार युक्तिवाद केला. सीबीआयचे तपास अधिकारी विशेषतः लंडनला सुनावणीसाठी उपस्थित होते.

प्रकरणाची पार्श्वभूमी

नीरव मोदीवर पंजाब नॅशनल बँकेत सुमारे ६४९८ कोटी रुपयांची फसवणूक केल्याचा आरोप आहे. २०१८ मध्ये उघडकीस आलेल्या या घोटाळ्यात बनावट जारी करून परदेशी बँकांकडून कर्ज उचलण्यात आले होते. बँकेच्या अधिकृत प्रणालीत हे व्यवहार नोंदवले गेले नव्हते.

२०१८ पासून सीबीआय आणि ईडी नीरव मोदीला भारतात परत आणण्यासाठी प्रयत्न करत आहेत. २०१९ मध्ये लंडनमध्ये अटक झाल्यानंतर ब्रिटिश न्यायालयांनी प्रत्यर्पणाला मंजुरी दिली होती. आता शेवटची पुनर्विचार याचिका फेटाळल्याने प्रत्यर्पण प्रक्रिया लवकरच पूर्ण होण्याची शक्यता आहे.

या निकालामुळे भारत सरकार आणि सीबीआयच्या सातत्यपूर्ण प्रयत्नांना मोठे यश मिळाले असून, आर्थिक घोटाळ्यांविरुद्धच्या लढाईत ही एक महत्त्वाची उपलब्धी मानली जात आहे. 

नीरव मोदी सध्या १९ मार्च २०१९ पासून ब्रिटिश तुरुंगात आहे. त्याच्या भारतात प्रत्यर्पणाची प्रक्रिया आता अंतिम टप्प्यात आली आहे.