वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 मुंबईत टिंडर ॲपवरून धक्कादायक रॅकेट: श्रीमंत तरुणांना डेटिंगच्या बहाण्याने कॅफेमध्ये बोलावून लूट; दहा जणांना अटक

 टिंडर डेटिंग ॲपवरून पुरुषांना जाळ्यात ओढून साकीनाका येथील कॅफेमध्ये नेऊन धमकावून पैसे उकळल्याप्रकरणी १० जणांना अटक

 दिल्लीहून खास आणलेल्या २५ ते ३० मुलींचा समावेश; तीन महिलांसह कॅफे मालकावर गुन्हा दाखल

 पोलिसांच्या छाप्यात एका तरुणाला बसवून बाउन्सरकडून धमकावत पैसे वसूल केल्याचं उघड

मुंबई: लोकप्रिय डेटिंग ॲप टिंडरचा वापर करून श्रीमंत तरुणांना जाळ्यात ओढणाऱ्या आणि त्यांना कॅफेमध्ये नेऊन लुबाडणाऱ्या एका मोठ्या रॅकेटचा साकीनाका आणि पवई पोलिसांनी पर्दाफाश केला आहे. या प्रकरणी पोलिसांनी कॅफे मालकासह दहा जणांना अटक केली असून, त्यात तीन महिलांचाही समावेश आहे.

टिंडरवरून जाळ्यात ओढण्याची पद्धत

मिळालेल्या माहितीनुसार, दिल्लीहून मुंबईत २५ ते ३० मुलींना खास या रॅकेटसाठी आणण्यात आले होते. या मुली टिंडर डेटिंग ॲपवर श्रीमंत तरुणांना लाइक करून त्यांच्याशी संपर्क साधायच्या. विश्वासात घेतल्यानंतर त्यांना घाटकोपर येथील साकीनाका भागातील एका कॅफे क्लबमध्ये भेटण्यासाठी बोलावायच्या.

कॅफेत नेऊन भलतंच काय केलं जायचं?

कॅफेमध्ये भेट झाल्यानंतर या मुली आधी महागडे पदार्थ ऑर्डर करायच्या, ज्यामुळे २५ ते ५० हजार रुपयांपर्यंत बिल यायचे. पैसे न देण्याचा प्रयत्न केल्यास या तरुणी 'लैंगिक अत्याचाराची तक्रार करण्याची' धमकी द्यायच्या. अनेक प्रकरणांमध्ये बाउन्सरना बोलावून तरुणांना धाक दाखवला जायचा आणि जबरदस्तीने पैसे वसूल केले जायचे.

पोलिसांच्या छाप्यात उघडकीस

पोलिसांनी या कॅफेवर छापा टाकला असता, एका पीडित तरुणाला खाली बसवून बाउन्सरकडून धमकावत पैसे वसुली सुरू असल्याचं प्रत्यक्षात आढळून आलं. पोलिसांनी तात्काळ कारवाई करत कॅफे मालकासह दहा जणांना ताब्यात घेतले. याप्रकरणी साकीनाका पोलीस ठाण्यात गुन्हा दाखल करण्यात आला असून पुढील तपास सुरू आहे.

दरम्यान, मुंबईतील आणखी एक धक्कादायक घटना समोर आली आहे. धारावीमध्ये काळी जादू केल्याच्या संशयातून पतीने पत्नीचा गळा दाबून खून केला आणि व्हिडिओ कॉलवर मुलाला मृतदेह दाखवल्याची खळबळजनक घटना घडली आहे. अमृत सोलंकी याने पत्नी सूरजबेन यांची हत्या केल्यानंतर मुलाला व्हॉट्सअॅप व्हिडिओ कॉलवर मृतदेह दाखवला. पोलिसांनी आरोपीला अटक केली असून पुढील तपास सुरू आहे.