म्हसवड : धुळदेवमध्ये भयानक अपघात, दोघे जागीच ठार; तीन जखमी

“काळ बदलला आहे, प्रामाणिकपणे काम करा; फसवणूक करणाऱ्यांना मी मदत करणार नाही” – मंत्री पंकजा मुंडे

अंबाजोगाई: भाजप नेत्यांपैकी एक आणि महाराष्ट्राच्या मंत्रिमंडळातील मंत्री पंकजा मुंडे यांनी आपल्या संपर्क कार्यालयाच्या उद्घाटन प्रसंगी कार्यकर्त्यांना स्पष्ट संदेश दिला की, आता काळ बदलला आहे. चुकीच्या मार्गाने पैसे कमवण्याची किंवा फसवणुकीची अपेक्षा माझ्याकडून करू नका, असे बजावले.

अंबाजोगाई येथे आपल्या संपर्क कार्यालयाचे उद्घाटन करताना पंकजा मुंडे म्हणाल्या, “स्वतःची परिस्थिती आणि ऐपत ओळखून त्यात आनंदी राहणे शिका. पंतप्रधान नरेंद्र मोदी यांनी दाखवून दिले आहे की, चुकीच्या मार्गाने पैसे कमावणारे किंवा फसवणूक करणारे लोक तुरुंगातच जातात. त्यामुळे माझ्याकडून कोणत्याही घटनाबाह्य गोष्टींची अपेक्षा करू नये.”

पंकजा मुंडे यांनी एका वास्तविक घटनेचाही उल्लेख केला. त्या म्हणाल्या, “एका कार्यकर्त्याच्या मुलाने ४०-५० लाख रुपयांची लोकांची फसवणूक केली. नंतर तो मदतीसाठी माझ्याकडे आला. मी त्याला विचारले – तुम्ही ते पैसे वापरलेत, तर आता मी ते पैसे कसे देणार? मुलाने किंवा पतीने पैसे कुठून आणले हे घरातील स्त्रियांनी आणि वडिलांनी विचारायला हवे.”

त्या पुढे म्हणाल्या, “१० रुपयांचे १०० रुपये करा, पण ते कष्टाने करा. प्रामाणिकपणे काम करत असाल तर मी तुमच्या पाठीशी खंबीरपणे उभी आहे. जर मी तुम्हाला १० लाखांचे कंत्राट दिले तर त्यातून १ लाख रुपये कमवा, पण संपूर्ण १० लाख गायब करू नका.”

राजकारणातील विश्वासघात आणि कटकारस्थानांवर बोलताना पंकजा मुंडे म्हणाल्या, “राजकारणात हे होत राहतं. मीही पडले, पण ज्यांनी माझ्याविरुद्ध कारस्थान केले ते पुन्हा नकाशावरून गायब होतात. त्यांना मी काहीच करावं लागत नाही, निसर्गच काय करायचं ते करतो. चांगलं काम करणाऱ्या माणसाच्या पाठीशी सर्व शक्ती उभ्या राहतात.”

लोकसभा आणि विधानसभा निवडणुकीतील पराभव आणि घडामोडींबाबतही त्यांनी भाष्य केले. “काही लोक आपल्याला वापरून दुसऱ्यांशी संधान साधतात आणि गडबड करतात. त्यांना करू द्या. माझ्या हृदयात पाप नाही, देवाचा साक्षात आशीर्वाद आहे,” असेही त्यांनी सांगितले.

आगामी निवडणुकांसाठी रोडमॅप जाहीर करताना पंकजा मुंडे यांनी जिल्ह्यातील सहा मतदारसंघात सहा आमदार आणि खासदार भाजपकडून होणार असा विश्वास व्यक्त केला. “योगेश्वरी देवीच्या साक्षीने आम्ही ही रणनीती सुरू करत आहोत. यश-अपयश ईश्वरावर अवलंबून आहे, पण माझे स्वप्न पूर्ण करण्यासाठी मी प्रयत्न करत आहे,” असे त्यांनी म्हटले.

कार्यकर्त्यांसाठी स्पष्ट भूमिका

पंकजा मुंडे यांनी कार्यकर्त्यांना स्पष्ट केले की, एखादा कार्यकर्ता गंभीर आजारी असेल, कॅन्सरसारखा आजार असेल तर मी माझे घर गहाण ठेवूनही त्याला मदत करेन. पण चुकीच्या कामात किंवा फसवणुकीत सापडलेल्या व्यक्तीला मात्र मी मदत करणार नाही.