म्हसवड : धुळदेवमध्ये भयानक अपघात, दोघे जागीच ठार; तीन जखमी

अणू केंद्रांवरील इस्रायली हल्ल्याचा बदला; सौदी अरेबियातील प्रिन्स सुल्तान तळाला क्षेपणास्त्रांची झेप; UAE मध्ये पाच भारतीयांना दुखापत

तेहरान / जेरुसलेम : इराण आणि इस्रायल-अमेरिका यांच्यातील संघर्षाने आता नवीन रूप धारण केले आहे. युद्धाला दुसऱ्या महिन्यात प्रवेश करताच इस्रायलने इराणमधील अणू केंद्रांवर जोरदार हल्ले केले. या हल्ल्यामुळे इराणच्या अण्वस्त्र क्षमतेला मोठा धक्का बसला असून, परिसरात किरणोत्सर्गाचा धोका निर्माण झाल्याची भीती व्यक्त होत आहे. इराणने याला "मानवतेविरुद्धचा गुन्हा" ठरवत पलटवार करण्याचा इशारा दिला आहे.

सौदी अरेबियातील अमेरिकन तळावर क्षेपणास्त्र हल्ला

इराणच्या अणू केंद्रांवरील हल्ल्याचा बदला म्हणून इराण समर्थक गटांनी सौदी अरेबियातील 'प्रिन्स सुल्तान एअर बेस' या अमेरिकन लष्करी तळावर क्षेपणास्त्रे डागली आहेत. या भीषण हल्ल्यात हवेत इंधन भरणारी तीन विमाने पूर्णपणे उद्ध्वस्त झाली असून, अनेक अमेरिकन सैनिक जखमी झाले आहेत. तळावरील तांत्रिक यंत्रणेचेही मोठ्या प्रमाणावर नुकसान झाले आहे. सौदी अरेबियाच्या भूमीवर झालेला हा हल्ला अमेरिकेसाठी थेट आव्हान ठरला आहे. युद्धात तटस्थ राहण्याचा प्रयत्न करणाऱ्या सौदीलाही आता सक्रिय व्हावे लागण्याची शक्यता निर्माण झाली आहे.

आखाती देशांमध्ये हल्ल्यांची साखळी; भारतीय नागरिक जखमी

आखाती देशांमध्ये इराणचे हल्ले आणि क्षेपणास्त्रे रोखण्याचे प्रकार सुरूच आहेत. संयुक्त अरब अमिरातीमध्ये (UAE) हवेतच रोखण्यात आलेल्या एका बॅलिस्टिक क्षेपणास्त्राचा मलबा अबू धाबीच्या खलिफा इकॉनॉमिक झोनजवळ पडल्याने दोन ठिकाणी आग लागली. या घटनेत पाच भारतीय नागरिक जखमी झाले असून, त्यापैकी दोघांची प्रकृती गंभीर असल्याचे वृत्त आहे.

सौदी अरेबियाच्या संरक्षण मंत्रालयाने रियाधच्या दिशेने रोखलेले एक बॅलिस्टिक क्षेपणास्त्र नष्ट करण्यात आल्याचे सांगितले. बहरीनमध्ये इराणने लक्ष्य केलेल्या एका परिसरातील आग नागरी संरक्षण दलाने विझवली. कुवेतमध्ये नॅशनल गार्डने गेल्या २४ तासांत सहा ड्रोन पाडल्याचा दावा केला आहे.

हौथी बंडखोरही संघर्षात सामील

इराण-इस्रायल युद्धाला २८ दिवस उलटल्यानंतर आता येमेनमधील इराण-समर्थित हौथी बंडखोरही या संघर्षात सामील झाले आहेत. टाइम्स ऑफ इस्रायलच्या वृत्तानुसार, हौथी बंडखोरांनी सुमारे २ हजार किलोमीटर अंतरावरून इस्रायलच्या दक्षिणेकडील बेअरशेबा शहर आणि आसपासच्या परिसराला लक्ष्य करून बॅलिस्टिक क्षेपणास्त्रे डागली आहेत.

इस्रायली लष्कराच्या म्हणण्यानुसार, क्षेपणास्त्र प्रक्षेपणाची माहिती मिळताच हवाई संरक्षण यंत्रणा कार्यान्वित करण्यात आली आणि हवेतच तो धोका नष्ट करण्यात आला. या हल्ल्यात कोणतीही जीवितहानी झाल्याचे वृत्त नाही. सध्याच्या युद्धादरम्यान येमेनकडून इस्रायलवर झालेला हा पहिलाच हल्ला असल्याचे मानले जात आहे.

तेहरान विद्यापीठावर इस्रायली हल्ला

इराणची राजधानी तेहरान येथील विद्यापीठावरही इस्रायलने हल्ला केल्याची माहिती समोर आली आहे. या हल्ल्यात विद्यापीठाच्या संशोधन विभागाचे मोठे नुकसान झाल्याचे सांगण्यात येत आहे. इस्रायलकडून या हल्ल्याबाबत अद्याप कोणतीही अधिकृत प्रतिक्रिया देण्यात आलेली नाही.

पार्श्वभूमी : गाझा युद्धविरामानंतर थांबलेले हल्ले पुन्हा सुरू

ऑक्टोबर २०२५ मध्ये हमास आणि इस्रायल यांच्यात झालेल्या युद्धविरामानंतर हौथी बंडखोरांनी इस्रायलवरील हल्ले थांबवले होते. मात्र, अणू केंद्रांवर झालेल्या हल्ल्यानंतर संघर्षाची पार्श्वभूमी पूर्णपणे बदलली आहे. यापूर्वी नोव्हेंबर २०२३ मध्ये हुथींनी इस्रायली जहाजे आणि नौदलाच्या नौकांवर हल्ले केले होते, तर इस्रायलने त्याला प्रत्युत्तर दिले होते.

जागतिक शक्तींनी या वाढत्या संघर्षाबाबत चिंता व्यक्त केली असून, परिसरातील शांतता व स्थैर्य धोक्यात आल्याचे म्हटले आहे. अमेरिकेने आपल्या नागरिकांना मध्यपूर्वेतील प्रवासाबाबत सतर्कतेचा इशारा दिला आहे. भारत सरकारही आखाती देशांमध्ये असलेल्या भारतीय नागरिकांच्या सुरक्षिततेबाबत आढावा घेत आहे.