वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

  'मला नयनतारा हवीय...' AIADMK खासदाराच्या वक्तव्याने राजकारण तापले; अभिनेत्रीबद्दल केले आक्षेपार्ह वक्तव्य

DMK सरकारवर टीका करताना सी.व्ही. षण्मुगम यांची जीभ घसरली; स्टॅलिन यांना लग्नाचे स्वप्न पूर्ण करण्याचे आव्हान देणाऱ्या वक्तव्याने खळबळ

तामिळनाडू विधानसभा निवडणुकीच्या पार्श्वभूमीवर AIADMK चे खासदार सी.व्ही. षण्मुगम यांनी सुपरस्टार अभिनेत्री नयनतारा हिच्याबद्दल केलेल्या एका आक्षेपार्ह वक्तव्याने राजकीय वर्तुळात खळबळ उडाली आहे. DMK सरकारविरोधात निदर्शने करताना त्यांनी केलेल्या या वक्तव्यामुळे मोठा वाद निर्माण झाला असून, विरोधी पक्षांनी याचा तीव्र शब्दांत निषेध केला आहे.

नेमके काय घडले?

तामिळनाडूच्या विल्लुपुरम येथे AIADMK पक्षाने मुख्यमंत्री स्टॅलिन यांच्या नेतृत्वाखालील DMK सरकारविरोधात निदर्शने आयोजित केली होती. राज्यातील वाढत्या लैंगिक छळाच्या घटनांकडे लक्ष वेधताना खासदार सी.व्ही. षण्मुगम यांनी भाषण केले. मात्र, यावेळी बोलताना त्यांची जीभ घसरली आणि त्यांनी अभिनेत्री नयनताराबाबत नको ते वक्तव्य केले.

स्टॅलिन यांच्यावर उपहासात्मक टीका करताना षण्मुगम म्हणाले, "अब्दुल कलाम यांनी आपल्याला स्वप्न पाहण्यास सांगितले. पण स्टॅलिन यांनी मात्र आपली स्वप्ने इतरांसोबत शेअर करायला सांगितली. जर मी म्हटले की, 'मला नयनतारा हवीय', तर स्टॅलिन हे स्वप्न पूर्ण करतील का? किंवा जर एखाद्याने स्टॅलिन यांच्याकडे मागणी केली की, 'त्याला नयनताराशी लग्न करायचे आहे', तर ते स्वप्न सत्यात उतरवतील का?"

वाद का निर्माण झाला?

खासदारांच्या या वक्तव्याला महिलांप्रती अपमानकारक आणि आक्षेपार्ह मानले जात आहे. एका सुपरस्टार अभिनेत्रीचा उल्लेख अशा प्रकारे करणे हे चुकीचे असल्याची टीका होत आहे. DMK सह इतर राजकीय पक्षांनी या वक्तव्याचा निषेध केला असून, सोशल मीडियावर देखील नयनताराच्या चाहत्यांनी खासदाराला धारेवर धरले आहे.

नयनताराची प्रतिक्रिया?

या वादानंतर अभिनेत्री नयनतारा हिने अद्याप कोणतीही प्रतिक्रिया दिलेली नाही. उल्लेखनीय म्हणजे, नयनताराचे इन्स्टाग्रामवर 10.2 मिलियन फॉलोअर्स आहेत. तामिळनाडूमध्ये एप्रिलमध्ये होणाऱ्या विधानसभा निवडणुकीपूर्वी या वक्तव्यामुळे राजकीय वातावरण चांगलेच तापले आहे.