वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 सांगली जिल्हा परिषद सत्तासंघर्ष: 'पहिले वर्ष अध्यक्षपद द्या, सोबत येतो'; संजय पाटील यांचा महाविकास आघाडीला प्रस्ताव

सांगली: जिल्हा परिषद निवडणुकीत कोणत्याही एका पक्षाला स्पष्ट बहुमत न मिळाल्याने सत्तास्थापनेचा पेच निर्माण झाला आहे. या पार्श्वभूमीवर, माजी खासदार संजय पाटील यांनी आमदार जयंत पाटील आणि आमदार विश्वजीत कदम यांच्याकडे एक महत्त्वाचा प्रस्ताव ठेवल्याची खात्रीलायक माहिती मिळत आहे. "पहिले वर्ष अध्यक्षपद राष्ट्रवादीला (अजित पवार गट) द्या, आम्ही सोबत येऊ," असा हा प्रस्ताव असून यामुळे सांगलीच्या राजकारणात मोठी खळबळ उडाली आहे.

पक्षीय बलाबल आणि त्रिशंकू अवस्था

जिल्हा परिषदेच्या निकालात सर्वाधिक १८ जागा जिंकून राष्ट्रवादी (शरदचंद्र पवार) पक्ष मोठा पक्ष ठरला आहे. मात्र, बहुमतासाठी आवश्यक आकडा कोणाकडेही नाही.

राष्ट्रवादी (शप): १८

भाजप: १६

काँग्रेस: ११

शिवसेना (शिंदे गट): ०७

राष्ट्रवादी (अजित पवार): ०६

इतर (रयत क्रांती, जनस्वराज्य, शिवसेना उबाठा): प्रत्येकी १

संजय पाटील आणि मविआ नेत्यांची गुप्त बैठक

गुरुवारी रात्री उशिरा आमदार जयंत पाटील, आमदार विश्वजीत कदम आणि माजी खासदार संजय पाटील यांच्यात एक महत्त्वाची बैठक पार पडली. या बैठकीत किमान समान कार्यक्रम आणि अध्यक्ष-उपाध्यक्षपदाच्या वाटणीवर चर्चा झाली. सूत्रांनी दिलेल्या माहितीनुसार, संजय पाटील यांनी शिवसेना आणि अजित पवार गट एकत्रित असल्याचे सांगत, पहिल्या वर्षाच्या अध्यक्षपदाची मागणी केली आहे. या प्रस्तावावर अंतिम निर्णयासाठी रविवारी मुंबईत पुन्हा एक महत्त्वाची बैठक होणार आहे.

दुसरीकडे भाजप-अजित पवार गटातही हालचाली

एकीकडे महाविकास आघाडीसोबत चर्चा सुरू असतानाच, दुसरीकडे राष्ट्रवादी (अजित पवार) गटाचे जिल्हाध्यक्ष निशिकांत पाटील यांनी पालकमंत्री चंद्रकांत पाटील यांची भेट घेतली आहे. "जर आम्हाला अध्यक्षपद दिले, तर आम्ही भाजपला पाठिंबा देऊ," अशी भूमिका निशिकांत पाटील यांनी मांडल्याचे समजते. या प्रस्तावावर चर्चा करण्यासाठी पालकमंत्र्यांनी सोमवारी भाजप पदाधिकाऱ्यांची बैठक बोलावली आहे.

सोमवार: पालकमंत्र्यांची भाजप पदाधिकाऱ्यांसोबत महत्त्वाची बैठक.

सांगली जिल्हा परिषदेत सत्तेच्या चाव्या आता अजित पवार गट (६ जागा) आणि शिवसेना (७ जागा) यांच्या हातात असल्याचे चित्र आहे. अजित पवार गटातील एक मोठा गट महाविकास आघाडीसोबत जाण्यास अनुकूल असला, तरी अध्यक्षपदाच्या अटीमुळे पेच वाढला आहे. आता अध्यक्षपद कोणाला मिळणार आणि सांगलीचा "गडी" कोण ठरणार, याचे उत्तर आगामी दोन दिवसांतील बैठकांनंतरच स्पष्ट होईल.