वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

 मंत्रालयात एसीबीचा मोठा दणका: लाच घेताना क्लार्क जाळ्यात; हर्षवर्धन सपकाळांचा सरकारवर घणाघात

मुंबई: राज्याच्या सत्तेचे केंद्र असलेल्या मंत्रालयात लाचलुचपत प्रतिबंधक विभागाने (ACB) मोठी कारवाई केली आहे. अन्न व औषध प्रशासन विभागातील एका लिपिकाला (क्लार्क) लाच स्वीकारताना रंगेहात अटक करण्यात आली आहे. या कारवाईमुळे मंत्रालयातील प्रशासकीय वर्तुळात प्रचंड खळबळ उडाली असून, विरोधकांनी यावरून सरकारला धारेवर धरले आहे.

नेमकी घटना काय?

मिळालेल्या माहितीनुसार, राजेंद्र ढेरंगे असे अटक करण्यात आलेल्या आरोपी लिपिकाचे नाव आहे. एका मेडिकल स्टोअरचा निलंबित झालेला परवाना पुन्हा मिळवून देण्यासाठी ढेरंगे याने ५० हजार रुपयांच्या लाचेची मागणी केली होती. तडजोडीअंती ३५ हजार रुपये देण्याचे ठरले. मंत्रालयाच्या दुसऱ्या मजल्यावर ही लाचेची रक्कम स्वीकारताना एसीबीच्या पथकाने त्याला जाळ्यात पकडले.

उपमुख्यमंत्र्यांच्या (विधानसभा उपाध्यक्ष) कार्यालयात कारवाई?

ही कारवाई ज्या ठिकाणी झाली, त्यावरून मोठी चर्चा सुरू आहे. सूत्रांच्या माहितीनुसार, तक्रार प्राप्त झाल्यानंतर एसीबीच्या सहा अधिकाऱ्यांच्या पथकाने विधानसभा उपाध्यक्ष नरहरी झिरवळ यांच्या कार्यालयाच्या परिसरात ही कारवाई केली. कारवाईदरम्यान काही काळ हे कार्यालय पूर्णपणे ताब्यात घेण्यात आले होते. तपास पूर्ण झाल्यानंतर आरोपी क्लार्कला अटक करून नेण्यात आले, त्यानंतरच कार्यालयाचे कामकाज पूर्ववत झाले.

विरोधी पक्षाचा सरकारवर हल्लाबोल

या घटनेनंतर राजकीय वातावरण चांगलेच तापले आहे. काँग्रेस प्रदेशाध्यक्ष हर्षवर्धन सपकाळ यांनी महायुती सरकारवर अत्यंत बोचरी टीका केली आहे.

"महाभ्रष्ट महायुती सरकारच्या काळात मंत्रालयात आता खुलेआम लाचखोरी आणि कमिशनखोरी सुरू आहे. जनतेची कामे पैशांशिवाय होत नाहीत, ही अत्यंत गंभीर बाब आहे. एका महत्त्वाच्या कार्यालयात अशा प्रकारे लाच घेतली जाते, याचा अर्थ भ्रष्टाचार मुळापर्यंत पोहोचला आहे. मुख्यमंत्र्यांनी या प्रकरणाची नैतिक जबाबदारी स्वीकारून जनतेला उत्तर द्यावे आणि संबंधित भ्रष्ट यंत्रणेवर कठोर कारवाई करावी," अशी मागणी सपकाळ यांनी केली आहे.