वसंत ग्रामीण बिगर शेती सहकारी पतसंस्थेचा उद्या सुवर्ण महोत्सवी सोहळा!

मोठी बातमी! झेडपीनंतर आता ग्रामपंचायतींचे बिगुल; प्रभाग रचनेचा कार्यक्रम जाहीर, 'या' तारखेपासून कामाला सुरुवात

मुंबई  राज्यातील जिल्हा परिषद निवडणुकांची रणधुमाळी संपताच आता ग्रामीण राजकारणाचे केंद्र असलेल्या ग्रामपंचायत निवडणुकांचे पडघम वाजू लागले आहेत. जानेवारी २०२६ ते डिसेंबर २०२६ या कालावधीत मुदत संपणाऱ्या आणि नव्याने स्थापन झालेल्या ग्रामपंचायतींसाठी राज्य शासनाने प्रभाग (वॉर्ड) रचनेचा अधिकृत कार्यक्रम घोषित केला आहे. मंत्रालयातून यासंदर्भातील आदेश जारी करण्यात आले असून, प्रशासकीय यंत्रणेला सज्ज राहण्याच्या सूचना दिल्या आहेत.

२० फेब्रुवारीपासून प्रभाग रचनेचा श्रीगणेशा

ग्रामविकास विभागाच्या सहसचिव वर्षा भरोसे यांनी जारी केलेल्या आदेशानुसार, येत्या २० फेब्रुवारी २०२६ पासून प्रभाग रचनेच्या कामाला प्रत्यक्ष सुरुवात होणार आहे. प्रभाग रचनेची संपूर्ण जबाबदारी जिल्हाधिकारी, उपविभागीय अधिकारी आणि तहसीलदार यांच्यावर सोपवण्यात आली आहे.

प्रभाग रचनेचा 'थ्री-स्टेप' प्लॅन

निवडणूक प्रक्रियेत पारदर्शकता आणण्यासाठी यंदा प्रभाग रचना तीन महत्त्वाच्या टप्प्यांत पूर्ण केली जाणार आहे:

टप्पा	काम	अंतिम तारीख
पहिला	'गुगल अर्थ'च्या साहाय्याने गावांचे नकाशे निश्चित करणे.	२० फेब्रुवारी २०२६
दुसरा	तलाठी व ग्रामसेवकांकडून प्रत्यक्ष जमिनीवर जाऊन सीमा निश्चिती.	२७ फेब्रुवारी २०२६
तिसरा	जिल्हाधिकाऱ्यांच्या तपासणीनंतर निवडणूक आयोगाची प्राथमिक मान्यता.	२३ मार्च २०२६

हरकती आणि सुनावणीचे वेळापत्रक

प्रभाग रचनेबाबत नागरिकांना आपले आक्षेप नोंदवण्यासाठी प्रशासनाने वेळ निश्चित केला आहे:

• प्रारूप प्रसिद्धी: ७ एप्रिल २०२६ रोजी प्रभाग रचनेचा मसुदा जाहीर होईल.

• हरकतींची मुदत: ७ ते १३ एप्रिल २०२६ या कालावधीत नागरिक हरकती नोंदवू शकतात.

• सुनावणी: २१ एप्रिल २०२६ पर्यंत उपविभागीय अधिकाऱ्यांकडे सुनावणी पार पडेल.

४ मे रोजी अंतिम प्रभाग रचना जाहीर होणार

सर्व हरकतींचा निपटारा केल्यानंतर आणि प्रस्तावांची पडताळणी पूर्ण झाल्यावर, जिल्हाधिकारी २८ एप्रिलपर्यंत अंतिम अहवाल राज्य निवडणूक आयोगाकडे सादर करतील. त्यानंतर, ४ मे २०२६ रोजी अधिकृतरीत्या अंतिम प्रभाग रचना प्रसिद्ध केली जाईल.

या घोषणेमुळे राज्यातील ग्रामीण भागातील राजकीय वातावरण पुन्हा एकदा तापणार आहे. जिल्हा परिषद निवडणुकीत मिळालेल्या यशापयशाचा विचार करून राजकीय पक्षांनी आता गावपातळीवर मोर्चेबांधणी करण्यास सुरुवात केली आहे.