म्हसवड पालिकेच्या स्वीकृत नगरसेवक निवडी का रखडल्या; शेखर गोरेंची पुन्हा निराशा होणार का?

'ऑपरेशन टायगर' यशस्वी; शिंदे-खासदार कॉन्फरन्स कॉल; आजच्या बैठकीत ६ खासदार गैरहजर; उदय सामंत म्हणाले – 'ज्यांनी ऑपरेशन यशस्वी झालं नाही असे म्हटलं, त्यांच्यासाठी स्टेटस'

क्रांती न्यूज (प्रतिनिधी) - सचिन मेनकुदळे

दिल्ली / मुंबई : महाराष्ट्राच्या राजकारणात 'ऑपरेशन टायगर'च्या चर्चांदरम्यान शिवसेना शिंदे गटाचे नेते आणि मंत्री उदय सामंत (Uday Samant) यांनी ठेवलेल्या व्हॉट्सॲप स्टेटसने राजकीय वर्तुळात खळबळ उडाली आहे. या स्टेटसमध्ये उपमुख्यमंत्री एकनाथ शिंदे (Eknath Shinde) यांचा हसरा चेहरा आहे. तसेच 'मोठे मोठे गार केले गंमतमध्ये...' हा डायलॉगही म्हटला आहे. गल्लीपासून दिल्लीपर्यंत याची जोरदार चर्चा रंगली आहे. दरम्यान, शिवसेना (उबाठा) च्या संसदीय बैठकीला ६ खासदार गैरहजर राहिल्याने 'ऑपरेशन टायगर' यशस्वी झाल्याचे संकेत मिळत आहेत.

 उदय सामंत यांचे व्हॉट्सॲप स्टेटस आणि स्पष्टीकरण

उदय सामंत यांच्या या स्टेटसची सर्वत्र चर्चा सुरू झाल्यानंतर त्यांनी स्वतः याबाबत स्पष्टीकरण दिले. ते म्हणाले, "एकनाथ शिंदे जिथे पुढाकार घेतात, ते यशस्वी होतंच. शिंदेंनी जी जी ऑपरेशन्स हाती घेतली, ती सर्व यशस्वी झाली आहेत. ज्यांनी ऑपरेशन यशस्वी झालं नाही असे म्हटलं त्यांच्यासाठीच मी ते स्टेटस ठेवलं."

सामंत यांचे हे वक्तव्य अशा वेळी आले आहे, जेव्हा ठाकरे गटाचे ६ खासदार शिंदे गटात प्रवेश करणार असल्याच्या चर्चांना उधाण आले आहे. उदय सामंत यांनी शिंदे यांच्या नेतृत्वावर पूर्ण विश्वास व्यक्त करताना, या यशस्वी ऑपरेशनची झलक त्यांच्या स्टेटसद्वारे दिल्याचे स्पष्ट केले.

 शिंदे-खासदार कॉन्फरन्स कॉल; ६ खासदारांना आश्वासन

दरम्यान, मंगळवारी (१६ जून) रात्री उशिरा एकनाथ शिंदे यांनी ठाकरे गटातील ६ खासदारांशी कॉन्फरन्स कॉल केल्याची महत्त्वपूर्ण माहिती समोर आली आहे. या कॉलमध्ये सर्व ६ खासदार सहभागी झाल्याचे सांगितले जात आहे.

सूत्रांनी दिलेल्या माहितीनुसार, एकनाथ शिंदे यांनी सर्व सहा खासदारांसोबत ३० मिनिटे सविस्तर चर्चा केली. संभ्रम असलेले ओमराजे निंबाळकर आणि संजय दिना पाटील हे खासदारही या कॉन्फरन्स कॉलमध्ये सहभागी झाले होते.

शिंदे यांनी या कॉलमध्ये खासदारांना आश्वासन दिले की, "ऑपरेशन टायगर यशस्वीरित्या पार पडले आहे. शिवसेना सर्व खासदारांच्या पाठिशी खंभीर उभी राहणार आहे." तसेच, खासदारांना पक्षात येण्यासाठी कोणत्याही अडचणी येणार नाहीत, असेही त्यांनी सांगितले.

 दिल्लीत श्रीकांत शिंदेंची जबाबदारी

हे सर्व ऑपरेशन गोपनीय पद्धतीने राबवण्याची जबाबदारी खासदार श्रीकांत शिंदे यांना दिल्लीत देण्यात आली आहे. ऑपरेशन यशस्वी करण्यासाठी श्रीकांत शिंदे दिल्लीत ठाण मांडून आहेत. त्यांनीच सर्व ६ खासदारांना एकत्र आणण्यासाठी प्रयत्न केले आणि ही प्रक्रिया यशस्वीरीत्या पार पाडली.

श्रीकांत शिंदे यांनी सर्व खासदारांशी समन्वय साधला आणि लोकसभा अध्यक्षांना पत्र देण्याची प्रक्रिया पूर्ण केली.

 आजची शिवसेना (उबाठा) संसदीय बैठक

आज (१८ जून) सकाळी ११ वाजता नवी दिल्ली येथे शिवसेना (उद्धव बाळासाहेब ठाकरे) ची संसदीय बैठक बोलावण्यात आली होती. या बैठकीला केवळ ४ खासदार उपस्थित राहिले, तर ६ खासदार गैरहजर राहिले.

बैठकीला उपस्थित खासदार:

१. संजय राऊत (राज्यसभा)

२. अरविंद सावंत (लोकसभा)

३. अनिल देसाई (लोकसभा)

४. राजाभाऊ वाजे (लोकसभा)

 बैठकीला गैरहजर खासदार:

१. संजय जाधव (परभणी)

२. संजय देशमुख (यवतमाळ-वाशिम)

३. नागेश पाटील आष्टीकर (हिंगोली)

४. ओमराजे निंबाळकर (धाराशिव)

५. भाऊसाहेब वाकचौरे (शिर्डी)

६. संजय दिना पाटील (मुंबई उत्तर-पूर्व

या ६ खासदारांच्या अनुपस्थितीने 'ऑपरेशन टायगर' यशस्वी झाल्याची चर्चा अधिक बळकट झाली आहे.

 'ऑपरेशन टायगर'ची टाइमलाइन

१० जून : एनडीए बैठकीदरम्यान अमित शाह आणि शिंदे यांच्यात ऑपरेशन टायगरबाबत चर्चा. दिल्लीत पंचतारांकित हॉटेलमध्ये खासदारांची शिंदेंसोबत भेट.

१४ जून : मातोश्रीवर उद्धव ठाकरेंची खासदार बैठक. ३ खासदार हजर, ३ ऑनलाइन, ३ गैरहजर.

१६ जून : रात्री ६ खासदार दिल्लीला रवाना. शिंदे-खासदार कॉन्फरन्स कॉल.

१७ जून : ६ खासदारांनी स्वतंत्र गट स्थापन करून लोकसभा अध्यक्षांना पत्र दिल्याचा दावा.

१८ जून : ठाकरे गटाची संसदीय बैठक; ६ खासदार गैरहजर.

 ठाकरे गटाचे ९ खासदार आणि शिंदे गटात जाणारे ६

ठाकरे गटाचे ९ खासदार:

१. अनिल देसाई

२. अरविंद सावंत

३. संजय दिना पाटील

४. राजाभाऊ वाजे

५. संजय जाधव

६. संजय देशमुख

७. नागेश पाटील आष्टीकर

८. ओमराजे निंबाळकर

९. भाऊसाहेब वाकचौरे

 शिंदे गटात गेलेले ६ खासदार:

१. संजय जाधव (परभणी)

२. संजय देशमुख (यवतमाळ-वाशिम)

३. नागेश पाटील आष्टीकर (हिंगोली)

४. ओमराजे निंबाळकर (धाराशिव)

५. भाऊसाहेब वाकचौरे (शिर्डी)

६. संजय दिना पाटील (मुंबई उत्तर-पूर्व)

 'ऑपरेशन टायगर' यशस्वी, आता पुढील घडामोडींकडे लक्ष

उदय सामंत यांच्या व्हॉट्सॲप स्टेटसने राजकीय वर्तुळात जोरदार चर्चा निर्माण केली आहे. 'मोठे मोठे गार केले गंमतमध्ये' या डायलॉगमधून शिंदे गटाचा आत्मविश्वास स्पष्टपणे दिसून येतो. ठाकरे गटाच्या संसदीय बैठकीला ६ खासदार गैरहजर राहिल्याने 'ऑपरेशन टायगर' यशस्वी झाल्याचे स्पष्ट झाले आहे. आता २१ जूननंतर या ६ खासदारांच्या विलीनीकरणाची अधिकृत घोषणा होण्याची शक्यता आहे. या घडामोडींमुळे महाराष्ट्राच्या राजकारणात पुन्हा एकदा मोठा भूकंप झाला आहे. पुढील काही दिवस अत्यंत रंजक राहणार आहेत.