विधान परिषदेसाठी सोलापूरच्या नेत्यांच्या जोर बैठका; राजेंद्र राऊत, राजन पाटील, राम सातपुते यांची चढाओढ, मुख्यमंत्री आणि पालकमंत्र्यांच्या संमतीनेच एकालाच संधी?

राळेगावमध्ये मानवी तस्करी आणि देहव्यापाराचा धक्कादायक प्रकार; कथित ऑडिओ क्लिपमध्ये ‘मुली काढणाऱ्या रॅकेट’चा खुलासा; आरोपी मजहर कुरेशीचा समावेश, गृह विभागाला माहिती

  यवतमाळ: यवतमाळ जिल्ह्यातील राळेगाव तालुक्यात गेल्या सहा महिन्यांत तब्बल ३४ आदिवासी मुली बेपत्ता झाल्याची धक्कादायक बाब समोर आली आहे. या मुलींची मानवी तस्करी आणि देहव्यापारासाठी विक्री केली जात असल्याचा गंभीर आरोप भाजपचे जिल्हाध्यक्ष प्रफुल्ल चव्हाण यांनी केला आहे. या प्रकरणातील एका कथित ऑडिओ क्लिपमधून ‘मुली काढणाऱ्या रॅकेट’ची गोष्ट समोर आली आहे. या आरोपांची दखल आदिवासी विकास मंत्री डॉ. अशोक उईके यांनी घेतली असून, पोलीस अधीक्षकांना तातडीने चौकशीचे आदेश दिले आहेत.

भाजप जिल्हाध्यक्षांचे गंभीर आरोप

प्रफुल्ल चव्हाण यांनी पत्रकार परिषदेत सांगितले की, राळेगाव तालुक्यात अल्पवयीन आदिवासी मुलींना प्रलोभने दाखवून परराज्यात नेले जात आहे. तेथे त्यांची देहव्यापारासाठी विक्री केली जाते. चव्हाण म्हणाले, “ही केवळ एक-दोन मुलींची बाब नाही, तर गेल्या सहा महिन्यांत ३४ मुली बेपत्ता झाल्याची नोंद आहे. यामागे एक सुसंघटित टोळी कार्यरत असून, यात मानवी तस्करी, देहव्यापार, लव्ह जिहाद आणि धर्मांतराचा अँगलही असू शकतो.”

त्यांनी पुढे दावा केला की, या प्रकरणातील मुख्य आरोपी म्हणजे राळेगावमधील मजहर कुरेशी. तसेच मदन कुरेशी, कल्याणी आत्या, पूनम आत्या यांचाही या रॅकेटमध्ये सहभाग असल्याचे चव्हाण म्हणाले.

ऑडिओ क्लिपमध्ये नेमके काय? – धक्कादायक खुलासे

या प्रकरणात एका मुलगी आणि तिच्या प्रियकरातील कथित ऑडिओ क्लिप समोर आली आहे. या संभाषणात मुलगी स्वतःच माहिती सांगताना दिसते. संवाद अंशतः असा आहे:

मुलगी: “पोरीचं काम घेऊन चालली मी पुण्याले.”

मुलगा: “एकटी?” 

मुलगी: “एकटी नाही, दहा जण नेणार का? शुभम मामा आहे, पोरी काढणारा.

मुलगा: “शुभम मामा कोण?” 

मुलगी: “आपल्याच गावातला, फुकटनगरचा.”

पुढे ती म्हणते, “कल्याणी आत्या मोबाईलवर काम करते. तिला या कामासाठी जेलही झाली होती. तीच निल झालं की जाईल.”  

मुलगा विचारतो, मजहर कुरेशी?”

मुलगी उत्तर देते, “हो, त्याचं दिल होत करून. खतरनाक काम आहे.” 

तसेच, “मदन कुरेशी हे काम करते. पैसा लय आहे पण बद्दूव्वा लागते. यात काम करते रॅकेट आहे. पूनम आत्या आहे. किती जण आहेत सांगू शकत नाही.”

या ऑडिओ क्लिपवरून मुली कशा ‘कामा’साठी नेल्या जातात, त्यांना पैशाचे आमिष दाखवले जाते, तसेच एक सुसंघटित रॅकेट कार्यरत असल्याचे स्पष्ट होते.

पोलिसांची भूमिका – आरोपीला पकडलं, पण सोडलं?

प्रफुल्ल चव्हाण यांनी पोलिसांच्या भूमिकेवरही प्रश्न उपस्थित केले. ते म्हणाले, “या प्रकरणातील एका संशयित आरोपीला पोलिसांनी चौकशीसाठी ताब्यात घेतले होते. मात्र, नंतर त्याला सोडून देण्यात आले. तो तेलंगणामध्ये पळून जात असताना पुन्हा पकडला गेला. यात पोलिसांनीच आरोपीला मदत केल्याचा संशय आहे. ज्या पोलिसांनी आरोपीला मदत केली, त्यांना तपासापासून दूर ठेवून त्यांच्यावर निलंबनाची कारवाई व्हावी.”

त्यांनी पुढे सांगितले की, या प्रकरणाची माहिती त्यांनी गृह विभागाला दिली आहे. राज्य सरकार या प्रकरणाकडे गांभीर्याने पाहत असल्याचेही चव्हाण म्हणाले.

मंत्री अशोक उईके यांची दखल – चौकशीचे आदेश

आदिवासी विकास मंत्री डॉ. अशोक उईके यांनी या प्रकरणाची गंभीर दखल घेतली आहे. त्यांनी अप्पर पोलीस अधीक्षकांची भेट घेऊन पोलीस अधीक्षक अशोक थोरात यांना तातडीने तपास करण्याच्या सूचना दिल्या आहेत. तसेच, उपविभागीय अधिकारी बन्सल यांच्याशीही चर्चा करून त्यांना ‘जातीने लक्ष घाला, वेगाने तपास करा’ अशा सूचना दिल्या आहेत.

मात्र, मंत्र्यांच्या तक्रारीनंतरही या प्रकरणी अद्याप गुन्हा दाखल झालेला नसल्याने आश्चर्य व्यक्त केले जात आहे. स्थानिक पोलिसांनी अद्याप कोणीही अधिकृत एफआयआर नोंदवला नसल्याची माहिती आहे.

लव्ह जिहाद, धर्मांतराचाही संशय’

प्रफुल्ल चव्हाण यांनी या प्रकरणात लव्ह जिहाद आणि धर्मांतराचा अँगलही उपस्थित केला आहे. ते म्हणाले, “आदिवासी मुलींना पैशाचे आमिष दाखवून, त्यांच्यावर प्रेमाचा बहाणा करून त्यांना फसवले जात आहे. त्यानंतर त्यांचे धर्मांतर करून देहव्यापारात ढकलले जाते. या सर्वांची तपासणी व्हायला हवी.” त्यांनी गृह विभागाला याबाबतची माहिती दिल्याचेही सांगितले.

ग्रामस्थांमध्ये भीतीचे वातावरण

राळेगाव तालुक्यातील अनेक आदिवासी कुटुंबांनी आपल्या मुली बेपत्ता झाल्याची तक्रार नोंदवली आहे. मात्र, पोलिसांकडून अद्याप या प्रकरणी ठोस कारवाई झालेली नाही. यामुळे ग्रामस्थांमध्ये भीतीचे वातावरण आहे. एका स्थानिक आदिवासी महिलेने नाव न छापण्याच्या अटीवर सांगितले, आमच्या पोरींना पैसे देऊन मोठी शहरे दाखवण्याचे आमिष दाखवले जाते. पण त्या परत येत नाहीत. आमची चौकशी करण्याची ताकद नाही.”

राजकीय आणि सामाजिक परिणाम

या प्रकरणाने राज्यात खळबळ उडवून दिली आहे. विरोधी पक्षांनी सरकारवर निष्क्रियतेचा आरोप केला आहे. भाजप जिल्हाध्यक्षांनी स्वतः ही बाब उघडकीस आणल्याने, आता राज्य सरकारवर त्वरित कारवाईचा दबाव आहे. आदिवासी विकास मंत्री अशोक उईके यांनी चौकशीचे आदेश दिले असले तरी, प्रत्यक्ष अटक आणि एफआयआरची प्रतीक्षा आहे.

पुढची वाटचाल काय?

आता पोलीस अधीक्षक अशोक थोरात यांना या प्रकरणाचा तपास वेगाने पूर्ण करण्याचे आदेश आहेत. तसेच, मंत्री उईके यांनी स्पष्ट केले आहे की, दोषी कोणीही असो, त्याच्यावर कठोर कारवाई केली जाईल. प्रफुल्ल चव्हाण यांनी मागणी केली आहे की, ज्या पोलिसांनी आरोपीला मदत केली, त्यांना तपास समितीबाहेर ठेवून त्यांच्यावर निलंबनाची कारवाई व्हावी.

यवतमाळच्या राळेगावमध्ये सहा महिन्यात ३४ आदिवासी मुली बेपत्ता झाल्याची धक्कादायक घटना समोर आली आहे. मानवी तस्करी, देहव्यापार आणि लव्ह जिहादच्या अँगलने हे प्रकरण अधिक गंभीर बनले आहे. भाजप जिल्हाध्यक्ष प्रफुल्ल चव्हाण यांच्या आरोपांनंतर आदिवासी मंत्री अशोक उईके यांनी दखल घेत पोलीस अधीक्षकांना चौकशीचे आदेश दिले आहेत. मात्र, अद्याप गुन्हा दाखल झाला नसल्याने आणि आरोपी मजहर कुरेशीला पोलिसांनी सोडल्याने या प्रकरणी मोठा वाद निर्माण झाला आहे. या प्रकरणाचा पुढील तपास आणि कारवाई महत्त्वाची ठरणार आहे.